ستاتيستيكاعا سايكەس سوڭعى 4 جىلدا ەلىمىزدە 55 مىڭعا جۋىق جول-كولىك وقيعاسى تىركەلىپ, ونىڭ سالدارىنان 60 مىڭنان استام ادام زارداپ شەككەن, تاعى 8 مىڭنان استام ادام قازا تاپقان.
بۇل رەتتە «سەرگەك» اپپاراتتىق-باعدارلامالىق جۇيەسى ەنگىزىلگەن ساتتەن باستاپ, ەلىمىزدىڭ جولدارىندا ءولىم-ءجىتىمنىڭ 50%-دان اسا تومەندەۋى بايقالىپ, قوعامدىق ورىندارداعى قىلمىس ايتارلىقتاي ازايعان.
سونداي-اق جول قوزعالىسى ەرەجەلەرىن ساقتاماعانى ءۇشىن تولەنەتىن ايىپپۇلداردىڭ ەسەبىنەن بيۋدجەتكە 50 ملرد تەڭگەگە جۋىق قاراجات تۇسكەن.
اتالعان زاماناۋي جۇيەنىڭ جۇمىسىنداعى وڭ ناتيجەنى ەسكەرە وتىرىپ, قر يدم كولىكتىك باقىلاۋ قىزمەتتەرىن اۆتوماتتاندىرۋ ماقساتىندا وسى تەحنولوگيانى پايدالانۋدىڭ مۇمكىندىگىن قاراستىرىپ وتىر.
قازىر ۆەدومستۆومەن «استانا-تەمىرتاۋ» جولدارىندا قاناتقاقتى جوبانى ىسكە اسىرۋ ءۇشىن «كوركەم تەلەكوم» جشس-مەن ىنتىماقتاستىق تۋرالى مەموراندۋم جاساسۋ بويىنشا كەلىسسوزدەر جۇرگىزىلىپ جاتىر.
مينيسترلىك وكىلدەرى جوبانىڭ ءىرى كولەمدى جانە اۋىر سالماقتى اۆتوكولىكتەردىڭ قاتىسۋىمەن ورىن الاتىن قۇقىق بۇزۋشىلىقتى, سونداي-اق جولاۋشىلار مەن باگاجدى تۇراقتى نەمەسە تۇراقتى ەمەس تاسىمالداۋ كەزىندەگى قاۋىپسىزدىكتى اۆتوماتتى تۇردە انىقتاپ, كولىكتىك باقىلاۋدى جۇزەگە اسىرۋ كەزىندە ادامي فاكتور مەن سىبايلاس جەمقورلىق تاۋەكەلدەرىن بولدىرماۋ ارقىلى جول توسەمىنىڭ ساقتالۋىن قامتاماسىز ەتۋ بويىنشا الەۋمەتتىك جانە ەكونوميكالىق تيىمدىلىككە قول جەتكىزۋگە سەپتىگىن تيگىزەتىنىن ايتتى.
