قاسيەتتى سەمەيدىڭ قاينار اۋىلىنان تۇلەپ ۇشقان ونەرلى ورەن بولمىسىنا, سۋرەتكەرلىك كوزقاراسىنا الاش ارىستارىنا قۇت مەكەن بولعان كيەلى توپىراقتىڭ قۇتى قونىپ, رۋحى دارىعانداي. ونى فارحاد قولتاڭباسىنان شىققان ءار سپەكتاكل ايشىقتى دالەلدەپ بەرەدى. قۋانتارلىعى سول, جاس رەجيسسەر قانداي قويىلىمدى قولعا السىن, ونىڭ ارقايسىسىنىڭ استارىندا ۇلتتىق رۋح پەن قازاقى بولمىستىڭ ءيىسى اڭقىپ تۇرادى. سونىسىمەن دە فارحادتىڭ ساحناداعى ىزدەنىسى ەشقاشان كوزىقاراقتى كورەرمەن نازارىنان تىس قالعان ەمەس, سەزىمى بار تالعامپاز قاۋىمدى سەلت ەتكىزبەي وتكەنى سيرەك. م.اۋەزوۆتىڭ «قاراگوزى», ءى.جانسۇگىروۆ «قۇلاگەر», ح.التاي مەن ح.ورالتاي «التايدان اۋعان ەل», ۋ.شەكسپيردىڭ ء«ىىى ريچارد» پەن «لير پاتشاسى», ب.سوقپاقباەۆ «مەنىڭ اتىم قوجا», ءا.نۇرشايىقوۆ «ماحاببات, قىزىق مول جىلدار» شىعارمالارى نەگىزىندە جازىلعان تۋىندىلار جاس رەجيسسەر تابيعاتىن جان-جاقتى تانىتاتىن ءتىنى مىقتى, رۋحى بيىك, كوركەمدىك دەڭگەيى جوعارى تابىستى جۇمىستار ساناتىندا.
اسىرەسە فارحاد قولتاڭباسىندا كورەرمەنىمەن قاۋىشقان «قۇلاگەردىڭ» ورنى ەرەك. ونداعى قۇلاگەر تاعدىرى ارقىلى بەرىلگەن الاش ارىستارىنىڭ وكىنىشكە تولى ءومىرى مەن ساحنالىق استارلى ايشىقتاۋ تاسىلدەرى ءھام سيمۆولدىق سويلەتۋ تىلىمەن كەستەلەنگەن كوركەمدىك شەشىمدەر كورۋشىسىن ءبىر ءسات تە بەيجاي قالدىرمايدى. كەرىسىنشە جان الەمىڭدى الەمتاپىرىق كۇيگە ءتۇسىرىپ, كوكىرەگىڭە اششى وكسىك تىعادى. «قاراگوزى» دە ءدال سولاي. ال «ماحاببات, قىزىق مول جىلدار» مەن «مەنىڭ اتىم قوجاداعى» رومانتيكالىق ءھام ليريكالىق اتموسفەرانى سەزىنۋ ءۇشىن اتالعان قويىلىمداردى تەك ساحنادان بارىپ كورۋ كەرەك.
ع.مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاسوسپىرىمدەر تەاترى ساحناسىنا سونى سەرپىن اكەلگەن ۋ.شەكسپيردىڭ «لير پاتشاسى» – ول ءوز الدىنا بولەك اڭگىمەنىڭ ارقاۋى. رەجيسسەردىڭ ايتۋلى جۇمىسى كاسىبي تەاتر سىنشىلارى مەن ونەر ماماندارىنىڭ باعالاۋىمەن جىل سوڭىندا مادەنيەت جانە سپورت مينيسترلىگى تاراپىنان تاعايىندالعان ونەر سالاسىنداعى تۇڭعىش ۇلتتىق سىيلىق – «Umai» ۇزدىكتەرىنىڭ قاتارىنان كورىندى.
بۇل – فارحادتىڭ العاشقى جۇلدەسى ەمەس. بۇعان دەيىن دە تالاي فەستيۆالدەردە توپ جارىپ, تالانتىمەن كوپتى تاڭداي قاقتىرىپ جۇرگەن تالانتتى جاستىڭ ءار جۇمىسى قالىڭ كورەرمەننىڭ ءجىتى نازارىندا.
ونىڭ ايقىن دالەلى – فارحاد ماسكەۋ تەاتر ماماندارىمەن شىعارماشىلىق تىعىز قارىم-قاتىناستا. 2017 جىلى «تمد, بالتىق ەلدەرى جانە گرۋزيا جاس رەجيسسەرلەرى زەرتحاناسىنا قاتىسىپ, پايدالى دارىستەن شابىتتانعان سۋرەتكەر ءوزىنىڭ جەكە «StarDrama» شىعارماشىلىق زەرتحاناسىن اشتى. زەرتحانانىڭ العاشقى قويىلىمى 1986 جىلعى جەلتوقسان كوتەرىلىسى تۋرالى «86» ساۋندراماسى بولدى. ايتۋلى شىعارما «وتكروۆەنيە» فەستيۆالىندە سىلكىنىس تۋدىرىپ قانا قويماي, رۋمىنياعا جولداما الدى. سونداي-اق جاس دارىن گيتيس رەسەي تەاتر ونەرى ۋنيۆەرسيتەتى ۇيىمداستىرعان VIII حالىقارالىق ستۋدەنتتىك ءوز بەتىنشە رەجيسسەرلىك جۇمىستار بايقاۋىندا قازىلار تورەلىگىنە ورالحان بوكەيدىڭ «شىراعىڭ سونبەسىن» جانە ۋيليام شەكسپيردىڭ ء«ىىى ريچارد» قويىلىمدارىن ۇسىنىپ, گران-پري جۇلدەسىن قانجىعاسىنا بايلادى. گيتيس ماراپاتىن رەجيسسەر «ەنەرگياسى, تەمپەرامەنتى جانە رەجيسسەرلىك ويلاۋداعى ايرىقشا قولتاڭباسى» ءۇشىن جەڭىپ الدى.
ءوزىنىڭ جاستىعىنا قاراماي فارحات مولداعالي بۇگىندە ىرگەلى ونەر ورداسى – ع.مۇسىرەپوۆ اتىنداعى قازاق مەملەكەتتىك اكادەميالىق دراما تەاترىنىڭ كوركەمدىك جەتەكشىسى, مەملەكەتتىك «دارىن» جاستار سىيلىعىنىڭ لاۋرەاتى, تۇڭعىش پرەزيدەنت قورى ستيپەندياسىنىڭ يەگەرى. قارا شاڭىراقتا قايتالانباس تۋىندىلارىن ومىرگە اكەلىپ قانا قويماي, جاستار تەاترىنىڭ كوركەمدىك كەمەلدىككە ۇمتىلۋىنا دا قالتقىسىز قىزمەت ەتىپ كەلەدى.
