دەپۋتات سەناتورلاردىڭ قوستاناي وبلىسىنداعى امانگەلدى جانە جانگەلدى اۋداندارى مەن ارقالىق قالاسىنا ساپارى كەزىندە ازاماتتار ايتقان وتىنىشتەر وسى ساۋالعا سەبەپ بولعانىن اتاپ ءوتتى.
اۋە قاتىناسىنىڭ جوقتىعى, ارقالىق قالاسىنا دەيىن عانا اپاراتىن تەمىرجولدىڭ توزۋى مەن ەسكى ۆاگوندار جانە اۆتوموبيل جولدارىنىڭ كەلەڭسىز جاعدايى ءوڭىر ەكونوميكاسىنىڭ دامۋىنا تەرىس اسەر ەتەتىن باستى ماسەلەلەرگە جاتادى. سەناتور «استانا-ارقالىق-تورعاي-ىرعىز-شالقار» اۆتوجولىنىڭ قۇرىلىسىن جەدەلدەتۋدى ۇسىنىپ وتىر. بۇل ءوڭىر ەكونوميكاسىنىڭ دامۋىنا سەرپىن بەرەدى جانە كورشى ايماقتارمەن ءوزارا ءىس-قيمىلدى ورىستەتۋگە مۇمكىندىك بەرەدى. سەناتور سونىمەن قاتار ءوڭىردى اۋىز سۋمەن جانە جىلۋمەن قامتاماسىز ەتۋ دەڭگەيىنىڭ تومەندىگىن دە اتاپ ءوتتى.
«بۇگىنگى تاڭدا سۋ قۇبىرىنىڭ توزۋى 86,5%, جىلۋ قۇبىرى 87%, ەلەكتر جەلىسى بويىنشا 92%, كارىز قۇبىرىنىڭ توزۋ دەڭگەيى 92,8%-دى قۇرايدى. ءبىر سوزبەن ايتقاندا ينجەنەرلىك-كوممۋنيكاتسيالىق جۇيەدە توتەنشە جاعدايلاردىڭ جوعارى دەڭگەيى قالىپتاسقان. سوندىقتان ارقالىق قالاسى مەن امانگەلدى, جانگەلدين اۋداندارىنداعى ينفراقۇرىلىم جۇيەسىنىڭ ناقتى جاعدايىن انىقتاۋ ءۇشىن ۇكىمەت تاراپىنان ارنايى كوميسسيا شىعارتۋ قاجەت», دەلىنگەن دەپۋتاتتىق ساۋالدا.
دەپۋتات سونىمەن قاتار تورعاي تۇرعىندارىنىڭ ۇيالى بايلانىس پەن ينتەرنەتكە قول جەتكىزە الماي وتىرعانى, ءوڭىردى تابيعي گازبەن قامتاماسىز ەتۋدىڭ ەكونوميكالىق جانە الەۋمەتتىك ماڭىزى, ارقالىق پوليتەحنيكالىق كوللەدجىنىڭ مورالدىق جانە فيزيكالىق تۇرعىدان ەسكىرگەن عيماراتى تۋرالى دا ايتتى.
«جوعارىدا ايتىلعان پروبلەمالاردى شەشۋ ءۇشىن قوستاناي وبلىسىنىڭ تورعاي ءوڭىرىن سەرپىندى دامىتۋ ماقساتىندا ارنايى وڭىرلىك باعدارلاما قابىلدانىپ, قاجەتتى كولەمدە قارجى ءبولىنىپ, ۇكىمەت دەڭگەيىندە قولداۋ كورسەتىلۋى ءتيىس دەپ ەسەپتەيمىز», دەدى سەناتور.
