توتەنشە جاعدايلاردى الدىن الۋ ماقساتىندا كولىك جۇرگىزۋشىلەرىنە تۇراقتى نەگىزدە داۋىل تۋرالى حابارلامالار جىبەرىلەدى. الىس ساپارعا شىقپاۋعا كەڭەس الاتىن جۇرگىزۋشىلەر نەمقۇرايلىق تانىتىپ, قار قۇرساۋىندا قالىپ جاتادى.
ماسەلەن جول سالاسىنىڭ ماماندارى كۇرە جولداردىڭ بويىندا 600-گە جۋىق ادامعا كومەك كورسەتكەن. اتاپ ايتقاندا اۋا رايىنىڭ قولايسىزدىعىنا بايلانىستى 232 كولىك جىلى بوكستارعا ورنالاستىرىلسا, 563 ادام جىلىتۋ پۋنكتتەرىنە جەتكىزىلدى.
بۇل رەتتە اۆتوموبيل جولدارىن كۇتىپ ۇستايتىن قىزمەتكەرلەردىڭ تەحنيكاسى كولىكتى قار قۇرساۋىنان شىعارۋعا نەمەسە ەۆاكۋاتسيالاۋعا بەيىمدەلمەگەنىن ەسكەرتە كەتكەن ءجون. سوعان قاراماستان سالا ماماندارى ءتيىستى ەسكەرتۋدى ەلەمەگەن جۇرگىزۋشىلەردىڭ باتىپ قالعان كولىكتەرىن شىعارۋعا ءماجبۇر بولادى.
ايتا كەتسەك, بيىلدان باستاپ اۋا رايىنىڭ قولايسىزدىعىنا قاتىستى كولىك قوزعالىسىن شەكتەۋ جونىندەگى حابارلامانى ەسكەرمەگەن تۇلعالارعا اكىمشىلىك جاۋاپكەرشىلىك قاراستىرىلعان. ءتيىستى وزگەرىس ۇكىمەتتىڭ «جولدارداعى كولىك قۇرالدارىنىڭ قوزعالىسىن توقتاتۋ نەمەسە ۋاقىتشا شەكتەۋ قاعيدالارىن بەكىتۋ تۋرالى» قاۋلىسىنا ەنگىزىلدى.
