گازەت, ينتەرنەت سايتتارى – قوعام ايناسى, سوندىقتان عالىم ءسوزىن سول كۇيىندە ۇسىنىپ وتىر دەپ سانايمىز. سونىمەن بىرگە تاريحشى ح.ءابجانوۆتىڭ تاريح تاقىرىبىندا ءجيى جازاتىن بىلىكتى زەرتتەۋشى, قوعام قايراتكەرى ەكەنىن دە جاقسى بىلەمىز. بىراق ءبىز ءۇشىن ماڭىزدىسى – اقپاراتتىڭ وقىرمانعا ءدال جەتۋى, سونداي-اق عالىمدارىمىزدىڭ فاكت نەگىزىندە ەموتسياسىز مالىمەت بەرۋى.
وسى رەتتە ايتارىمىز: اتالعان مالىمەت شىندىققا سايكەس كەلمەيدى. ويتكەنى ساياسي قۋعىن-سۇرگىن قۇرباندارىن تولىق اقتاۋ جونىندەگى مەملەكەتتىك كوميسسيا (بۇدان ءارى –مەملەكەتتىك كوميسسيا) پرەزيدەنت جارلىعىن جۇزەگە اسىرۋ بارىسىندا جانە قولدانىستاعى زاڭ اياسىندا 311 مىڭ 349 ساياسي قۋعىن-سۇرگىن قۇربانىن اقتادى.
مەملەكەتتىك كوميسسيا جۇمىسىندا انىقتالعان قۇرباندار مەن زارداپ شەككەندەردى (جالپى سانى 3 ميلليوننان استام) اقتاۋ ءۇشىن زاڭدىق باعىتتاعى جۇمىس توبىن ەلىمىزگە بەلگىلى زاڭگەر-عالىم, قوعام قايراتكەرى ي.ش. بورچاشۆيلي باسقارادى. وسى توپ «ساياسي قۋعىن-سۇرگىن قۇرباندارىن جانە زارداپ شەككەندەردى اقتاۋ تۋرالى» جانە «قازاقستاننىڭ تاۋەلسىزدىگى ءۇشىن كۇرەسكەندەر مارتەبەسى جانە ساياسي اقتاۋ تۋرالى» ەكى زاڭ جوباسىن ازىرلەدى.
اتالعان زاڭداردى پارلامەنت قابىلداعاننان كەيىن كەڭەستىك كەزەڭدەگى قۋعىن-سۇرگىن قۇرباندارى مەن زارداپ شەككەندەر تولىق اقتالادى. ويتكەنى ساياسي قۋعىن-سۇرگىن قۇرباندارىن اقتاۋ ءتيىستى زاڭدار قابىلداعان سوڭ عانا جۇزەگە اسادى. اتالعان ماسەلەنىڭ شەشىمى ەندىگى جەردە پارلامەنت دەپۋتاتتارىنىڭ وكىلەتتىگى مەن جاۋاپكەرشىلىگىندە ەكەنىن اتاپ وتكىم كەلەدى.
ايبار ءىلياس,
ساياسي قۋعىن-سۇرگىن قۇرباندارىن تولىق اقتاۋ جونىندەگى مەملەكەتتىك كوميسسيا قىزمەتىن سۇيەمەلدەۋ بويىنشا جوبالىق كەڭسە باسشىسىنىڭ ورىنباسارى
