بۇل استاناداعى «بارىس ارەنادا» وتكەن ء«بىز بىرگەمىز Fest» اتتى مۋزىكالىق قايىرىمدىلىق فەستيۆالىنەن كورىنىس ەدى. وندا ديماش قۇدايبەرگەنمەن بىرگە باسقا دا قازاقستاندىق ەسترادا جۇلدىزدارى مەن مۇگەدەكتىگى بار ارتىستەر ونەرلەرىن ورتاعا سالدى. مۇقتاج جاندارعا پاتەر كىلتى تابىستالعاندا, «بارىستا» مەيىرىم مەن قايىرىمعا كۋا بولدىق. 12 مىڭ ادام سىياتىن «بارىس ارەنا» لىق تولماسا دا, حالىق اتشاپتىرىم الاڭنىڭ جارىمىنان كوبىن الىپ وتىردى.
قايىرىمدىلىق كونتسەرتكە ونەرپازدار رەسپۋبليكانىڭ تۇكپىر-تۇكپىرىنەن تارتىلىپتى. دارىندى بالالار مەن مۇمكىندىگى شەكتەۋلى جاستار ەلىمىزدىڭ بارلىق وڭىرىنەن كەلىپتى. بالالار جىلى اياسىندا ۇيىمداستىرىلعان فەستيۆال ەرەكشە قاجەتتىلىكتەرى بار بالالاردى قولداۋعا ارنالعانى وسىدان-اق بەلگىلى.
ءىس-شاراعا پارلامەنت سەناتىنىڭ توراعاسى ماۋلەن اشىمباەۆ قاتىستى. سەنات توراعاسى مەملەكەت باسشىسىنىڭ تاپسىرماسى بويىنشا ەلىمىزدە حالىقتىڭ الەۋمەتتىك وسال توپتارىن قولداۋ ءۇشىن بارلىق شارا قابىلداناتىنىن اتاپ ءوتتى. «بەلگىلى وتاندىق ونەرپازدارمەن ءبىر ساحنادا ونەر كورسەتۋ ەرەكشە ءارى جاس تالانت يەلەرىن ىنتالاندىرا تۇسەتىنى انىق. انشىلەرگە شىعارماشىلىق تابىس تىلەيمىن. بۇگىنگى كونتسەرتتەن جينالعان قاراجات مۇگەدەكتىگى بار بالالارعا ارنالعان وڭالتۋ ورتالىعىنا جابدىق ساتىپ الۋعا جۇمسالادى. مۇنىڭ ءبارى ونەر كەز كەلگەن كەدەرگى مەن تاپتاۋرىنداردى بۇزىپ, يگى ىستەر جولىندا بارلىعىن بىرىكتىرە تۇسەتىنىن كورسەتەدى», دەدى ماۋلەن اشىمباەۆ.
كونتسەرت بارىسىندا مۇمكىندىگى شەكتەۋلى ءانشى كەنجەبەك نۇردولدايعا ەكىبولمەلى پاتەردىڭ كىلتى تاپسىرىلدى. جەتى ايلىق بالاسىمەن قالعان جالعىزباستى انا اسەل وماروۆا دا استانادان ءبىر بولمەلى پاتەردىڭ كىلتىنە يە بولدى. وعان دەمەۋشىلىك ەتكەن بىرنەشە كومپانيا, ءىرى بيزنەس ورتالىقتارىنا ۇيىمداستىرۋشى پەريزات قايرات حانىم العىس ءبىلدىردى.
فەستيۆال اياسىندا كەنجەبەك نۇردولداي, «Sensitive» بي توبى, التىنشاش مۇقاتاەۆا سىندى ەرەكشە قاجەتتىلىگى بار مۋزىكانتتار مەن بيشىلەر ونەر كورسەتتى. سونداي-اق ايگىلى ءانشى ديماش قۇدايبەرگەن, ەسترادا جۇلدىزدارى تامارا اسار, نازيما, «باستاۋ» توبى, ايدىن جانە تاعى باسقالارى ونەرلەرىن كورەرمەن نازارىنا ۇسىندى.
ءىس-شارانى «Biz birgemiz, Qazaqstan» قوعامدىق قورى جانە استانا قالاسىنىڭ اكىمدىگى ۇيىمداستىردى.
