جەلتوقساننىڭ 22-ءسى كۇنى «قاراشىڭعىل» اڭشىلىق شارۋاشىلىعىنىڭ كۇزەتشىلەرىنە ەڭبەكشىقازاق اۋدانى بالتاباي اۋىلىنىڭ شەتىندە ۋكراينانىڭ ەكى كۇدىكتى ازاماتى تەكسەرىلگەنى تۋرالى حابارلاما كەلىپ تۇسكەن.
وقيعا ورنىنا كەلگەن پوليتسەيلەر جەدەل-ىزدەستىرۋ ءىس-شارالارى بارىسىندا 43 جانە 28 جاستاعى شەتەلدىكتەردىڭ كولىكتەرىن تەكسەرگەن جەردىڭ جانىنان قارا سومكەنى تاۋىپ العان, ونىڭ ىشىندە اق جانە تاڭبالى ءمولدىر پوليەتيلەن پاكەتتەر بولعان.
«ودان ءارى الماتى وبلىسى ەسىرتكىگە قارسى كۇرەس دەپارتامەنتىنىڭ قىزمەتكەرلەرى جەدەل ءىس-شارالار بارىسىندا ىقتيمال ەسىركى زەرتحانالارىنىڭ ەكى مەكەنجايىن انىقتادى. رۇقسات ەتىلگەن تەكسەرۋ بارىسىندا جەرگىلىكتى جەردە تاعى 6 ۋكراينا رەسپۋبليكاسىنىڭ ازاماتى ۇستالدى. سونىمەن بىرگە زەرتحانالىق قۇرال-جابدىقتار, شىنى توستاعاندار مەن كريستالدى زاتتار, حيميالىق زاتتار سالىنعان مەتالل قاڭىلتىرلار تاركىلەندى», دەپ حابارلادى الماتى وبلىسى پوليتسيا دەپارتامەنتىنىڭ ءباسپاسوز قىزمەتىنەن.
ءتىنتۋ كەزىندە 30 كەلىگە جۋىق «سپيد» ەسىرتكى زاتى تاركىلەندى.
اتالعان فاكتى بويىنشا سوتقا دەيىنگى تەرگەۋ ءجۇرىپ جاتىر. قىلمىستىق ءىس قر قك 297-بابىنىڭ 3-بولىگىمەن تىركەلدى. كۇدىكتىلەر ۋاقىتشا ۇستاۋ يزولياتورىنا قامالدى.
ايتا كەتەيىك, كىناسىن مويىنداۋ كەزىندە ۇستالعاندار وسىنداي تىيىم سالىنعان زاتتاردى وندىرەتىن ءۇشىنشى زەرتحانانى اشۋعا دايىندىق بارىسى تۋرالى ايتتى.
