الىپ جەردىڭ ماڭىزدى ءبىر بولشەگى سانالاتىن تىنىق مۇحيتىندا دومبىرا بەينەسىندە ۇلكەن كوپىر سالىنعانىن وسى جۇرتتىڭ ءبىرى بىلسە, ءبىرى بىلمەس. ونىڭ قۇرىلىسىن جوبالاعان – ورلەۋحان قيسا ۇلى ەسىمدى شەتەلدەگى قانداسىمىز. ونىڭ تاباندى ىزدەنىسى اقىرى ۇلكەن جەتىستىككە جول اشتى. تىنىق مۇحيتىنىڭ كىرەبەرىسىنە ورنالاسقان گونكونگ, ماكاو, دجۋحاي سياقتى ءۇش ءىرى قالانى ءبىر-بىرىنە تۇتاستىرىپ تۇرعان دومبىرا ءپىشىندى كوپىر بۇل كۇندەرى الەم جۇرتشىلىعىنىڭ تاڭدايىن قاقتىرادى.
اتالعان كوپىر جوباسى 2009 جىلدىڭ اياعىندا باستالعان. الىپ كوپىردى اياقتاۋعا توعىز جىل ۋاقىت كەتىپتى. قۇرىلىس جول, تۋننەل جانە جاساندى ارال سياقتى ءۇش ۇلكەن بولىكتەن تۇرادى. ال جول التى بولىكتەن قۇرالعان. جالپى ۇزىندىعى 55 شاقىرىم, ونىڭ 38 شاقىرىمى كوپىر بولىپ تابىلادى. ۇلتىمىزدىڭ ۇلى اسپابى بەينەلەنگەن كوپىردىڭ 7 شاقىرىمى مۇحيت استىنان وتەتىن تۋننەلدەردەن تۇرادى.
قازاق ساۋلەتشىسىنىڭ قولىنان شىققان الىپ نىسان پايدالانۋعا بەرىلگەن سوڭ, گونكونگ پەن دجۋحاي قالالارى اراسىنداعى ءۇش ساعاتتىق جول ۋاقىتى نەبارى جارتى ساعاتقا قىسقارعان. ءبىر عاجابى, قۇرىلىستىڭ ماڭىزدى بولىگى سانالاتىن تۋننەلدەر سۋ استىندا 48 مەتر تەرەڭدىكتە ورنالاسقان. اتالعان جوباعا الەمدەگى تاڭداۋلى قۇرىلىستاردى سالعان لوندون قالاسىندا ورنالاسقان «Arup Group» كومپانياسى.
ارحيتەكتور ورلەۋحان قيسا ۇلى قىتايعا قاراستى التاي ايماعىندا دۇنيەگە كەلگەن. يتاليا تەحنيكالىق ۋنيۆەرسيتەتىنىڭ ماگيسترى. جاپونياداعى شىعىس ۋنيۆەرسيتەتىندە ارحيتەكتور ماماندىعى بويىنشا دوكتورلىق ديسسەرتاتسيا قورعاعان. ءوزى جوبالاعان دومبىرا بەينەلى كوپىر پايدالانۋعا بەرىلگەن ساتتە ول: «بۇل دومبىرا كوپىردىڭ عۇمىرى 120 جىل دەپ ەسەپتەدىك, تەحنيكالىق باقىلاۋ جۇمىستارىن ارتتىرۋ ارقىلى ونىڭ شىدامدىلىعىن 150 جىلعا دەيىن ۇزارتۋعا بولادى» دەگەن ويىن جەتكىزگەن.
ءيا, الەمنىڭ ءار شەتىندە ءوز سالاسىندا تابىس جاراتىپ, ۇلكەن جەتىستىكتەرگە جەتكەن قازاق قاندى اعايىن بارشىلىق. ۇلكەن جوبانى باستاردا اتا-باباسىنىڭ سان عاسىرلىق سىرى مەن مۇڭى, بۇكىل ءومىرى جازىلعان قاسيەتتى دومبىرانىڭ بەينەسىن ۇلى مۇحيتتى كەسىپ ءوتىپ, ۇلكەن شاھارلاردى ءبىر-بىرىنە جالعاعان الىپ كوپىرگە اينالدىرۋ ورلەۋحانداي ازاماتتىڭ الداعى اسۋلارى بۇدان دا بيىك ەكەنىن كورسەتسە كەرەك.
