بىلتىردان بەرى مقۇ اكتيۆتەرى 54,7 پايىزعا, 997 ملرد تەڭگەگە دەيىن كوبەيدى. ال ميكرونەسيەنىڭ ۇسىنىلۋ كورسەتكىشى 58 پايىزدى قۇرادى, ياعني 838,3 ملرد تەڭگە. ولاردىڭ بۇلاي قارقىندى وسۋىنە نەگىزگى سەبەپ – بانكتەرمەن سالىستىرعاندا كليەنت اۋديتورياسىنىڭ اۋقىمدى بولۋى. بانكتەر كوبىنە وبلىس ورتالىقتارى, قالا, ءارى كەتكەندە اۋدانمەن شەكتەلسە, ميكروقارجى ۇيىمدارى شالعاي ەلدى مەكەندەردە دە قىزمەت كورسەتە بەرەدى. بۇل ولاردىڭ تارالۋ اۋقىمىن ارتتىرا تۇسەدى. دەگەنمەن مقۇ-لاردىڭ كوبى الماتى جانە جەتىسۋ وبلىستارىنا ورتاق الماتى قالاسىندا شوعىرلانعان. وڭتۇستىك استانادا 116 كومپانيا جۇمىس ىستەيدى. اقمولا وبلىسى مەن استاناداعى مقۇ سانى 27-گە ەندى جەتكەن. ارينە, مقۇ-لاردىڭ شالعاي اۋداندار مەن ەلدى مەكەن تۇرعىندارى ءۇشىن قولجەتىمدى بولۋى سول وڭىردەگى حالىقتىڭ نەسيە راسىمدەۋگە دەگەن مۇمكىندىگىن ۇلعايتادى.
قانشاما مقۇ-نىڭ ىشىنەن ءۇش ۇيىمدى دارالاپ ايتۋعا بولادى. كوش باسىندا تۇرعان KMF-ءتىڭ ەل اۋماعى بويىنشا 14 فيليالى مەن 116 قىزمەت كورسەتۋ نىسانى بار. ودان كەيىنگى ورىندا – 16 رەسمي ديلەرلىك ورتالىعى بار «تويوتا فاينانشل سەرۆيسەز قازاقستان» جانە 116 ساتىلىم نۇكتەسى بار Solva ميكروقارجى ۇيىمى.
سوڭعى ۋاقىتتا مقۇ-لار قىزمەت كورسەتۋدە تسيفرلىق تەحنولوگيالاردى بەلسەندى قولدانۋعا كوشتى.
جاقىندا قارجى نارىعىن رەتتەۋ جانە دامىتۋ اگەنتتىگى ەكى قۇجاتتى تالقىلاۋعا ۇسىندى. بىرىنشىدەن, جەكە تۇلعالار ءۇشىن ميكروزايمدار بويىنشا شەكتى سىياقىنى ەنگىزۋ تۋرالى قاۋلى. قارىز الۋشىنىڭ قارىز جۇكتەمەسىن شەكتەۋ ماقساتىندا 2023 جىلدىڭ 1 قاڭتارىنان باستاپ 20 پايىز دەڭگەيىندە بىرىڭعاي نەسيە مولشەرلەمەسىن بەكىتۋ جوسپارلانىپ وتىر. قازىرگى تالاپقا سايكەس م ۇلىك كەپىلدىگىمەن قامتاماسىز ەتىلگەن نەسيە بويىنشا 20 پايىزدىق مولشەرلەمە بولسا, كەپىلسىز نەسيە بويىنشا مولشەرلەمە – 25 پايىز كولەمىندە.
ەكىنشى, «ميكروقارجىلىق قىزمەت ماسەلەلەرى بويىنشا كەيبىر نورماتيۆتىك قۇقىقتىق اكتىلەرگە وزگەرىستەر مەن تولىقتىرۋلار ەنگىزۋ تۋرالى» قاۋلى جوباسىنا سايكەس نارىق تالاپتارىنا بىرقاتار ماڭىزدى وزگەرىس ەنگىزىلمەك. مقۇ مەنشىك كاپيتالىنىڭ مينيمالدى مولشەرى 100 ملن تەڭگەدەن 2024 جىلدىڭ باسىنا دەيىن بىرتىندەپ 200 ملن تەڭگەگە دەيىن كەزەڭ-كەزەڭىمەن وسەدى. مقۇ قىزمەتىن پايدالاناتىن قارىز الۋشىنىڭ قارىز جۇكتەمەسى كوەففيتسيەنتىن ەسەپتەۋ ءادىسى دە وزگەرۋى مۇمكىن.
مقۇ نارىعىندا جاڭا تەحنولوگيالاردى ەنگىزىپ, كليەنت ءۇشىن سەرۆيستى جەتىلدىرىپ جاتقان كومپانيالار بار. تيىسىنشە, بيزنەس مودەلىن تەك وسىمقورلىق قاعيداتىنا نەگىزدەپ العان الدامشى ۇيىمدار دا جەتەرلىك. سوندىقتان ميكروقارجىلىق ۇيىمدار قاۋىمداستىعىنىڭ باسشىسى ەربول ومارحانوۆ مەنشىك كاپيتالىنىڭ مينيمالدى مولشەرىن كوبەيتۋدى دۇرىس دەپ سانايدى.
«نارىقتا ءوز بيزنەسىن دامىتا الاتىن, قارجىلىق تۇرعىدا ورنىقتى كومپانيالار عانا جۇمىس ىستەۋى كەرەك. الايدا قۇجات جوباسىندا مەنشىك كاپيتالىنىڭ مينيمالدى مولشەرىنەن بولەك باسقا دا وزگەرىستەر ۇسىنىلىپ وتىر. ول وزگەرىستەر نارىققا تىم قاتتى قىسىم جاساپ, سالدارىنان كوپتەگەن ۇيىم جاڭا جۇكتەمەگە شىداس بەرە الماي قالۋى ىقتيمال», دەيدى.
ونىڭ ايتۋىنشا, مقۇ بيزنەسىنىڭ رەنتابەلدىلىگى بۇگىندە 20 پايىزدان تومەن. سونىمەن قاتار مولشەرلەمەنى 25-تەن 20 پايىزعا دەيىن تومەندەتۋ مقۇ كىرىستىلىگىن ۇشتەن بىرىنە دەيىن تومەندەتىپ تاستايدى دەيدى.
ايتا كەتەيىك, بيىل اگەنتتىك 600 ملن تەڭگە كولەمىندەگى ميكروزايمداردى كەشىرۋ تۋرالى شەشىم قابىلدادى. وسىلايشا, 28 مىڭ قارىز الۋشىنىڭ نەسيەسى كەشىرىلمەك. قارجى نارىعىن رەتتەۋ جانە دامىتۋ اگەنتتىگى توراعاسىنىڭ ورىنباسارى نۇرلان ءابدىراحمانوۆتىڭ ايتۋىنشا, جىل سوڭىنا دەيىن 432 مىڭ قارىز الۋشىنىڭ 33,1 ملرد تەڭگە كولەمىندەگى قارىزى قايتا قۇرىلىمدالادى. 107 مىڭ قارىز الۋشىنىڭ 0,8 ملرد تەڭگەسى ءىشىنارا, ال 28 مىڭ قارىز الۋشىنىڭ 0,6 ملرد تەڭگەسى ءبىرجولا كەشىرىلەدى.
2022 جىلدىڭ 1 قىركۇيەگىندەگى جاعداي بويىنشا كەپىلسىز تۇتىنۋشىلىق ميكروزايم كولەمى 416 ملرد تەڭگە بولدى.
