بۇگىندە قالا تۇرعىندارىنىڭ جارتىسىنان كوبى قوعامدىق كولىكتى پايدالانادى.
«2020 جىلدىڭ ناۋرىز ايىنان باستاپ 18 جاسقا دەيىنگى بالالار تەگىن جول ءجۇردى. وسى كەزەڭدە وقۋشىلار 50 ميلليوننان استام ساپار جاسادى. ءبىر وتباسىندا بىرنەشە بالا بولعانداعى قيىندىقتى بىلەمىز. مۇندايدا تەگىن جول ءجۇرۋ وتە ۇلكەن قولداۋ بولماق, ويتكەنى وقۋشى تەك مەكتەپكە عانا ەمەس, ءتۇرلى ۇيىرمەلەر مەن سەكتسيالارعا اۆتوبۋسپەن تەگىن قاتىناي الادى», دەپ ءتۇسىندىردى نۇركەنوۆ.
ول ەلوردانىڭ بارلىق ەلدى مەكەنى اۆتوبۋس مارشرۋتتارىمەن قامتىلعانىن اتاپ ءوتتى. سول سياقتى ەلورداعا ىرگەلەس ايماقتارعا ساپالى كولىك قىزمەتىن كورسەتەتىن 25 قالا ماڭىنداعى مارشرۋت بار.
ەلوردانىڭ اۆتوپاركىن جاڭارتۋ بويىنشا جۇمىستار بەلسەندى ءجۇرىپ جاتىر. ماسەلەن, 2014 جىلدان باستاپ 853 زاماناۋي اۆتوبۋس ساتىپ الىندى. قورشاعان ورتانىڭ لاستانۋىن ازايتۋ ءۇشىن 2019 جىلى 100 ەلەكتروبۋس ساتىپ الىندى.
«كولىك كەشەنىن ۇنەمى جاڭعىرتۋ جۇمىسى ءجۇرىپ جاتىر. ماسەلەن بيىل 3 جاڭا باعىت ىسكە قوسىلدى – №43, 121, 327. قولدانىستاعى مارشرۋتتار قوزعالىسىنىڭ 27 سحەماسىن وڭتايلاندىرۋ جۇرگىزىلدى, 16 بىرلىك مارشرۋتقا كەستەلەر سانى ۇلعايتىلدى. قوعامدىق كولىكتىڭ ءجۇرۋ ۋاقىتىن قىسقارتۋ ءۇشىن ۇزىندىعى 4,3 كم بولاتىن 2 Bus Lane ۋچاسكەسى ەنگىزىلدى, 15 بىرلىك جاڭا ايالداما پۋنكتى ورناتىلدى. سونداي-اق جەكە اۆتوبۋس پاركتەرىنىڭ كۇشىمەن 35 جاڭا اۆتوبۋس ساتىپ الىندى», دەدى قالا اكىمىنىڭ ورىنباسارى.
2023 جىلى ەلوردانىڭ اۆتوبۋس پاركتەرىن 300 كولىككە جاڭارتۋ جوسپارلانىپ وتىر.
قازىر 300-دەن استام اۆتوبۋستى جاڭارتۋ جانە تولىقتىرۋ بويىنشا ءۇش الەۋەتتى ينۆەستورمەن جۇمىس ءجۇرىپ جاتىر.
ءبىر ەرەكشەلىگى, بارلىق ينۆەستور اۆتوبۋس پاركىن قۇرۋدى جوسپارلاپ وتىر جانە اتموسفەرانى زياندى شىعارىندىلارمەن لاستاماي, ۇنەمدى ءارى ەكولوگيالىق تازا ەلەكتر اۆتوبۋستارىن ساتىپ الادى. بۇل اسىرەسە قالالىق جاعدايدا ماڭىزدى.
«بۇل شارالار جىلجىمالى قۇرامنىڭ قازىرگى تاپشىلىعىن ازايتۋعا جانە مارشرۋتتاعى كەستەلەر سانىن كوبەيتۋگە مۇمكىندىك بەرەدى, بۇل اۆتوبۋستاردىڭ ءجۇرۋ ارالىعىن قىسقارتۋعا اكەلەدى», دەپ قورىتىندىلادى سپيكەر.
