«ەلىمىزدە مەديا سالاسىنداعى ەڭ مارتەبەلى پۋليتتسەر سىيلىعىن العان جۋرناليست جوق. بىراق وسى سىيلىققا ءبىزدىڭ باق وكىلدەرى بولاشاقتا يە بولادى دەگەن ءۇمىت بار. وسىعان وراي ورتالىق ازيادا ۇيىمداستىرىلعان العاشقى مەديا فورۋمعا ليۋ حەن شينگ مىرزانى شاقىرعان بولاتىنبىز. شاقىرتۋىمىزدى قابىل العان ليۋ مىرزاعا العىسىمدى بىلدىرەمىن», دەدى اقپارات جانە قوعامدىق دامۋ ءمينيسترى دارحان قىدىرالى.
ليۋ حەن شينگ گونكونگتا دۇنيەگە كەلگەن. ونىڭ سۋرەتكە ءتۇسىرۋ اۋەستىگى نيۋ-يورك قالالىق ۋنيۆەرسيتەتىنىڭ حانتەر كوللەدجىندە وقىپ جۇرگەن كەزىندە باستالعان. ليۋ كوللەدجگە 1969 جىلى گونكونگتاعى مەكتەپتى بىتىرگەن سوڭ تۇسكەن. «نيۋ-يوركتە ءتۇرلى فەستيۆالگە قاتىسىپ, ولاردىڭ ءبارىن تاسپاعا ءتۇسىردىم, مەنىڭ مادەنيەتىم وسى قالادا قالىپتاستى», دەپ ەسكە الادى اقش-تاعى ءومىرىن فوتوجۋرناليست.
ليۋ الەمگە تانىمال فوتوگراف دجون ميليدەن ساباق الىپ, ونىڭ شەبەرلىك مەكتەبىنەن وتكەن. تالىمگەرى سۋرەتكە تۇسىرگەندە جارىق پەن كومپوزيتسيانى سايكەستەندىرىپ تاسپالاۋعا ەرەكشە ماڭىز بەرىپ, ليۋ حەن شينگ وسى تەحنيكانى مەڭگەرۋگە ۇمتىلعان. وسى ءادىس بويىنشا ول 1991 جىلى ميحايل گورباچەۆتىڭ قول قويۋ ءساتىن وبەكتيۆكە تۇسىرگەن. بۇل سۋرەت ونىڭ ەڭ تانىمال ءارى باعالى جۇمىسىنا اينالعان.
1976 جىلى اناسى قايتىس بولعان سوڭ ليۋ تۋعان ەلىنە ورالادى. فوتوجۋرناليست رەتىندە ول قىتايدا قالىپتاسىپ, وسى ماماندىقتىڭ ۇڭعىل-شۇڭعىلىن شەبەرلىكپەن مەڭگەرەدى. تاجىريبە جيناقتاعان سوڭ «Associated Press» اگەنتتىگىنىڭ ءفوتوتىلشىسى بولادى. ول كوپتەگەن ەلدى ارالاپ, ساياسي تۇلعالاردى تاسپاعا تۇسىرەدى.
«مەن ءۇندىستان, اۋعانستان, پاكىستاندا بولدىم. شري-لانكاداعى قاقتىعىستى سۋرەتكە ءتۇسىردىم. 1989 جىلى «Associated Press» باسشىلىعى: «ماسكەۋگە باراسىڭ با؟» دەپ سۇرادى. ارينە, كەلىستىم. ويتكەنى مەنى كەڭەس وكىمەتىنىڭ كەڭىستىگى قاتتى قىزىقتىراتىن. ءسويتىپ كەڭەس وداعىمەن كەڭىرەك تانىسۋعا مۇمكىندىك الدىم», دەيدى ليۋ حەن شينگ.
كەڭەس وداعى ىدىراعان سوڭ ماسكەۋگە كەلگەن ليۋ رەسەيدىڭ سول كەزدەگى تىرشىلىگىن قاز-قالپىندا كادرلارعا توعىستىرىپ, تاسپاعا تارتادى. كەيىن 1992 جىلى وسى فوتوسۋرەتتەرى ءۇشىن ول جۋرناليستيكاداعى ەڭ بەدەلدى سىيلىق پۋليتسەردى يەلەنەدى. فوتوجۋرناليستكە وسى سالاداعى تانىمال سىيلىق رەسەيدە جاساعان جۇمىستارى ءۇشىن بەرىلگەن.
شەبەرلىك ساعاتىندا ليۋ حەن شينگ رەسمي ءىس-شارانى, شەنەۋنىكتى قالاي سۋرەتكە ءتۇسىرۋ قاجەت, قانداي دەتال قامتىلۋى قاجەت ەكەنىن ايتىپ, تاجىريبەسىمەن ءبولىستى.
«رەسمي تۇلعالار مەن رەسمي جيىندى تاسپاعا تۇسىرگەن كەزدە جارىققا باسا ءمان بەرۋ قاجەت. ودان ادامنىڭ ءتۇر-تۇلعاسى, سول كەزدەگى كوڭىل-كۇيى ناقتى كورىنەدى. ەگەر جارىق دۇرىس پايدالانىلماي, «وبەكتى» دۇرىس جاعىنان نىساناعا الىنباسا, جاعىمسىز بولمىستى ادام سەكىلدى كورىنىپ قالۋى مۇمكىن. ويتكەنى فوتوسۋرەتتەن ادامنىڭ بولمىسى ايقىن كورىنەدى. رەسمي تۇلعا سۋرەت ارقىلى دا حالىققا جاعىمدى سيپاتتا كورىنەدى. ونىڭ شىنايىلىعىن ءدال كورسەتۋ كەرەك. وسى شەبەرلىكتى مەڭگەرسەڭىزدەر, اسەرلى تۋىندى شىعارى ءسوزسىز», دەيدى 71 جاستاعى فوتوگراف.
قازىر فوتوجۋرناليست ليۋ حەن شينگ شانحاي قالاسىندا تۇرادى. قالاداعى فوتوگرافيا ورتالىعىندا ونىڭ جەكە گاللەرەياسى بار. جيىن سوڭىندا اقپارات جانە قوعامدىق دامۋ ءمينيسترى دارحان قىدىرالى ليۋ حەن شينگكە ەستەلىككە سىيلىق تابىستادى.
