جاس تالانتتار بيىل عىلىمي جوبالار دايىنداپ, كەيبىرى ەرلىك تانىتىپ, ءتۇرلى جارىستاردا ەرەكشەلەندى.
«بۇگىن ءبىز وقۋدا, سپورتتا, ونەردە جانە باسقا دا سالالاردا ەرەكشە كوزگە تۇسكەن جاس پاتريوتتاردى ماراپاتتاي وتىرىپ, بالالار جىلىن قورىتىندىلايمىز. سىزدەردىڭ ارقايسىلارىڭىز ەلىمىزدىڭ ماقتانىشى جانە بولاشاعىسىزدار. مەملەكەت بالالاردىڭ شىعارماشىلىق الەۋەتىن دامىتىپ, زياتكەرلىك مۇمكىندىكتەرىن ىسكە اسىرۋ ءۇشىن بارىنشا قولايلى جاعداي جاساپ جاتىر. سىزدەرگە تولاعاي تابىستار تىلەيمىن», دەدى مادەنيەت جانە سپورت ءمينيسترى داۋرەن اباەۆ.
سونداي-اق, بۇگىن رەسپۋبليكالىق تالانتتار بايقاۋىنىڭ قاتىسۋشىلارى ماراپاتتالدى. ۇزدىك جۇمىستاردىڭ اۆتورلارى نوۋتبۋكتەر مەن باسقا دا باعالى سىيلىقتارعا يە بولدى.
بارلىعى 10 نوميناتسيا بويىنشا 30 جەڭىمپاز انىقتالدى: «ۇزدىك ەسسە» – بەرەكە سۇلەيمان, نۇرباقىت بورانباەۆ, گاۋھار ءالىپتۇر; «جاس اقىن» – اڭسار ابدىرازاقوۆ, ەلسيار قۇلاحمەت, جانشىراق سەرجان; «ۇزدىك سۋرەتشى» – اسەم كۇزدىمباەۆا, ىڭكار جۇماعالي, نيكيتا ۋليانيچەۆ; «ۇزدىك مەديا كونتەنت» – راسۋل باۋىرجان, ايانا باۋىرجانوۆا, جانداربەك امانقوسوۆ; «جاس ارتيست» – اريانا اسقار, دياس قاۋسىلوۆ, اياۋلىم يمانگەلدى «IT -جوبا» – ارتەم ليسين, ءادىل سەرىك, بەكسۇلتان سايلاۋباي; «جاس تەحنيك» – نۇراسىل ءشارىپوۆ, مەڭدىبەك تەمىرحانوۆ, مۇستافا عالىمجان ۇلى; «جاس عالىم» – اينۇر الىمقىزى, ءامىر امانگەلدى, «جاس باتىر» – جاڭبىرباي دىنمۇحاممەد, مەرەي باقىت, رۋسلان وماروۆ; «جاس سپورتشى» – دوسمان ءالي, ايناز ادىلگەرەەۆا, انگەلينا كۋزميچەۆا.
