ءبىر قاراعاندا ورتاق كەڭىستىككە قويىلعان رەناتا ماشەكەنوۆا مەن ەلەنا سەرەجەچكينانىڭ تۋىندىلارى ءبىر بىرىمەن تىلدەسىپ تۇرعانداي كورىنەدى. قىلقالام قۇدىرەتىمەن توعىسقان ەكى كوركەمدىك ءتاسىل ءبىر-ءبىرىن تولىقتىرا وتىرىپ, كورەرمەندەرىنە جاڭا تاقىرىپتاردى اشادى.
ەكى سۋرەتشىنىڭ دە شىعارمالارىنا ورتاق تاقىرىپ – كوبەلەك. سونشالىقتى نازىك كوبەلەكتەردىڭ بەينەسى وزگەرۋ مەن قايتا تۇلەۋدىڭ نىشانى ىسپەتتى. كوپتەگەن مادەنيەتتە كوبەلەك – جاندى بىلدىرەدى. جىگەرلەرى مىقتى رەناتا مەن ەلەنا كورەرمەندەرىنىڭ نازارى مەن ەمپاتياسىنان ءۇمىتتى ەكەندىكتەرىن دە جاسىرمايدى.
– مەن 5 جاسىمنان سۋرەت سالا باستاعانىممەن, بەينەلەۋ ونەرىنە سانالى تۇردە 16 جاسىمدا, ماكسيماليزم مەن جاسوسپىرىمدەر داعدارىسى ايقىن كورىنە باستاعاندا كەلدىم. سۋرەت سالۋ سىرتقى الەممەن قارىم-قاتىناس جاساۋ مەن ەموتسيالار كورىنىسىنىڭ وزىندىك ادىسىنە اينالدى. بۇل ونەر ءوزىمدى كوبىرەك بىلۋگە كومەكتەسىپ, دۇنيەتانىمىما بەلگىلى ءبىر دارەجەدە اسەر ەتتى, دەيدى «كىشكەنتاي ادامنىڭ شىندىعى» جوباسىن ۇسىنعان گەنەتيكالىق ەرەكشەلىكتەرى بار پسيحولوگ جانە سۋرەتشى ەلەنا سەرەجەچكينا.
ال رەناتا ماشەكەنوۆا – پسيحيكالىق دامۋ ەرەكشەلىكتەرى بار «دەيستۆيە بۋكۆالنو» ينكليۋزيۆتى تەاترىنىڭ اۋەسقوي سۋرەتشىسى ءارى اكتريساسى, 9 جاسىنان باستاپ سۋرەت سالىپ كەلەدى جانە ءوز تۋىندىلارىنىڭ جيناعى دا بار.
– مەنى بەينەلەۋ ونەرىنە جەتەلەگەن دە, سۋرەت ونەرىمەن تانىستىرعان دا اتام. ويتكەنى ماعان سۋرەتتەرىمدى ەلگە كورسەتىپ, ولاردىڭ تاڭدانىسى مەن قولپاشىنا يە بولۋ ماڭىزدى بولدى, دەيدى رەناتا ماشەكەنوۆا.
قالاي دەسەك تە, Efes Kazakhstan الەۋمەتتىك باستاماسىنىڭ ارقاسىندا ىسكە اسىپ جاتقان بۇل جوبا نازار اۋدارۋعا تۇرادى. دەمالىس كۇندەرى كومپانيا قايىرىمدىلىق نەگىزىندە كەڭسەسىنىڭ ءبىرىنشى قاباتىن ونەر كەڭىستىگىنە اينالدىرادى. بيىل قىركۇيەگىنەن باستاپ مۇندا اي سايىن قازاقستاندىق سۋرەتشىلەر مەن ارت-ۇجىمداردىڭ كورمەلەرى وتكىزىلە باستادى.
وسىلايشا, كومپانيا ءوز باستاماسى ارقىلى قىلقالام شەبەرلەرى مەن تالانتتى ونەر قايراتكەرلەرىن شابىتتاندىرىپ, جارقىن يدەيالارىنا قولداۋ كورسەتىپ, جاس تالانتتاردىڭ دا ءوزىن كورسەتۋلەرىنە جول اشىپ بەرىپ وتىر.
الماتى
