قاسىم-جومارت توقاەۆقا سىرتقى جانە ىشكى نارىقتارداعى احۋال, ينفلياتسيانىڭ ءوسۋ قارقىنى مەن ونىڭ بولجامى, سونداي-اق التىن-ۆاليۋتا رەزەرۆتەرىنىڭ جاي-كۇيى جونىندە باياندالدى.
كەزدەسۋ بارىسىندا ۇلتتىق بانكتىڭ قابىلداعان شارالارى تەڭگەلەي سالىنعان دەپوزيتتەردىڭ بۇرىن-سوڭدى بولماعان دەڭگەيگە دەيىن وسۋىنە, ۆاليۋتا نارىعىن تۇراقتاندىرۋعا جانە ەكونوميكانى كرەديتتەۋ ءوسىمىن جالعاستىرۋعا وڭ ىقپال ەتكەنى اتاپ ءوتىلدى.
پرەزيدەنتكە تسيفرلىق تەڭگەنى ەنگىزۋ قاجەتتىگىنە قاتىستى جۇرگىزىلگەن زەرتتەۋ قورىتىندىلارى باياندالدى. عالىمجان ءپىرماتوۆتىڭ ايتۋىنشا, نارىق قاتىسۋشىلارى, ناقتى تۇتىنۋشىلار مەن ساۋدا-سەرۆيستىك كاسىپورىندارىنىڭ قاتىسۋىمەن وتكەن تسيفرلىق تەڭگە پلاتفورماسىن تەستىلەۋ ءساتتى بولدى. تسيفرلىق تەڭگەنىڭ ەنگىزىلۋى قولما-قول اقشاسىز تولەمنىڭ قولجەتىمدىلىگىن ارتتىرىپ, مەملەكەتتىك شىعىنداردىڭ اشىقتىعىن قامتاماسىز ەتەدى جانە يننوۆاتسيالىق قارجى ونىمدەرىن جاساۋعا مۇمكىندىك بەرەدى. ۇلتتىق بانك توراعاسى تسيفرلىق تەڭگە 2025 جىلدىڭ سوڭىنا دەيىن قولدانىسقا ەنگىزىلەتىنىن جەتكىزدى. تسيفرلىق تەڭگەنى اينالىمعا ەنگىزۋ جوسپارى ءۇش كەزەڭنەن تۇرادى. مەملەكەت باسشىسى جوبانى ودان ءارى جۇزەگە اسىرۋ جونىندە مىندەت جۇكتەدى.
كەزدەسۋ سوڭىندا قاسىم-جومارت توقاەۆ اقشا-كرەديت ساياساتىن ءتيىمدى ىسكە اسىرۋعا باعىتتالعان بىرقاتار ناقتى تاپسىرما بەردى.
