اتالعان بايقاۋ ون ءتورت ەلدەن كەلگەن ونەرپازداردى ءبىر ارناعا توعىستىرىپ, بەكزات ونەردىڭ بايراعىن بيىككە اۋەلەتتى. ءدۇبىرلى بايگەدە «استانا وپەرانىڭ» شاشاسىنا شاڭ جۇقپاعان جۇيرىكتەرىمەن بىرگە قىتاي, گەرمانيا, رەسەي, ازەربايجان, بەلارۋس, ارمەنيا, وزبەكستان جانە تاعى باسقا مەملەكەتتەردىڭ توپجارعان تالانتتارى ونەر كورسەتىپ, ەلوردا تۇرعىندارى مەن قوناقتارىنا تاماشا تارتۋ جاسادى.
فەستيۆال شىمىلدىعى ۇلتتىق مۋزىكامىزدىڭ كلاسسيكاسىنا اينالعان, كورنەكتى كومپوزيتور مۇقان تولەباەۆتىڭ ء«بىرجان – سارا» وپەراسىمەن اشىلىپ, ودان كەيىن ل.مينكۋستىڭ «دون كيحوت», دج.ءپۋچچينيدىڭ «تۋراندوت», پ.چايكوۆسكيدىڭ «اققۋ كولى» جانە «ەۆگەني ونەگين» اتتى سپەكتاكلدەرى ۇسىنىلدى. سونداي-اق وپەرا جانە بالەت ونەرىنىڭ گالا-باعدارلامالارى دا مازمۇندى ءىس-شارانى ودان ءارى بايىتا ءتۇستى. ال بايقاۋ شىمىلدىعى ا.حاچاتۋرياننىڭ اڭىزعا اينالعان «سپارتاك» بالەتىمەن جابىلدى. بارلىق بىرەگەي قويىلىمداعى باستى پارتيالاردى ەلوردالىق تەاتر ارتىستەرى مەن شاقىرىلعان سوليستەر كەزەكتەسىپ سومداپ, كورەرمەندەردى كلاسسيكالىق مۋزىكانىڭ قاينارىنا قاندىردى.
شىندىعىندا, بۇل فەستيۆال – ونەر بايگەسى عانا ەمەس, وپەرا جانە بالەت ونەرپازدارىنىڭ ءبىر-بىرىمەن جاقىن تانىسىپ, تاجىريبە الماسۋعا كەڭ مۇمكىندىك بەردى. ماسەلەن, قىتايدا ومىرگە كەلىپ, قازىر باۆاريا مەملەكەتتىك وپەرا جانە بالەت تەاترىنىڭ جەتەكشى ءسوليسى بولىپ جۇرگەن تسزينحاو چجان «استانا وپەرانىڭ» ساحناسىندا اتالعان تەاتردىڭ بالەت ترۋپپاسىمەن بىرگە ونەر كورسەتكەنىنە ريزا ەكەنىن ايتسا, ازەربايجان مەملەكەتتىك اكادەميالىق وپەرا جانە بالەت تەاترىنىڭ ءسوليسى سابينا اسادوۆا ءبىزدىڭ ەلىمىزگە العاش كەلگەندەگى اسەرىمەن ءبولىستى. «مەن بۇعان دەيىن قازاقستاندا بولعان ەمەسپىن. ەندى جاقىن تانىدىم. اسىرەسە قازاق مادەنيەتى مەن سالت-ءداستۇرى ەرەكشە ۇنادى. سونداي-اق ساۋلەتى كەلىسكەن «استانا وپەرا» تەاترىنىڭ ساحناسىندا ونەر كورسەتكەنىمە قۋانىشتىمىن. فەستيۆالگە كەلگەندەگى سەنىمىم اقتالدى. قازاقستاندىق ارىپتەستەرىمە شىعارماشىلىق تابىس تىلەيمىن!» دەپ جۇرەكجاردى تىلەگىن جەتكىزدى. سونىمەن قاتار وزبەكستانداعى الىشەر ناۋاي اتىنداعى مەملەكەتتىك اكادەميالىق ۇلكەن تەاترىنىڭ ءسوليسى دجابرايل يدريسوۆ تا ەلوردالىق تەاتر مەن وندا قىزمەت ىستەيتىن ونەرپازدارعا جىلى لەبىزىن ءبىلدىردى.
قورىتا ايتقاندا, «استانا وپەرا» تەاترىندا دۇركىرەپ وتكەن «جىبەك جولى» حالىقارالىق فەستيۆالى – قازاقستاننىڭ الەمدەگى مادەني قاتىناستارعا ەسىگى ايقارا اشىق ەكەنىن كورسەتتى.
