قازان ايىنان بەرى استانا مەن الماتى قالالارىنىڭ مەكتەپتەرىندە باستاۋىش سىنىپ وقۋشىلارىنا ارنالعان اسپازدىق شەبەرلىك بايقاۋلارى ءوتىپ جاتىر. كەلەشەك ۇرپاقتىڭ دەنساۋلىعىن ساقتاۋعا باعىتتالعان باستامالاردىڭ قاي-قايسىسى دا قولداۋ مەن نازار اۋدارۋدى قاجەت ەتەتىندىكتەن, الماتى قالاسىنداعى №52 جالپى ءبىلىم بەرەتىن مەكتەپكە باس اسپاز وتكىزگەن شەبەرلىك ساباعىنا كەلدىك.
بۇل جولى «سالاۋاتتى تاماقتانۋ مەكتەبى» ءبىلىم بەرۋ باعدارلاماسى اياسىندا وتكەن دارىسكە 3-سىنىپ وقۋشىلارى اتا-انالارىمەن بىرگە قاتىستى. ايتقانداي, ءىس-شاراعا 2030 جىلعا دەيىن دۇنيە جۇزىندەگى 50 ملن-عا دەيىن بالانى دۇرىس تاماقتانۋعا داعدىلاندىرۋعا باستاماشى بولىپ وتىرعان «نەستلە قازاقستان» مەن الماتى قالالىق ءبىلىم بەرۋدەگى جاڭا تەحنولوگيالار عىلىمي-ادىستەمەلىك ورتالىعى ۇيىتقى بولدى.
ءبىلىم بەرۋدەگى جاڭا تەحنولوگيالار قالالىق عىلىمي-ادىستەمەلىك ورتالىعىنىڭ ءبولىم باسشىسى تاتيانا ەجوۆا بالالاردى دۇرىس تاماقتانۋعا ادەتتەندىرۋ تۋرالى ايتا كەلە: «باعدارلاما بارىنشا جەڭىل بولعاندىقتان, بالالار پايدالى تاعامدار, دارۋمەندەر, ديەتا قۇرۋ نەگىزدەرىن بىلۋگە ىقىلاسپەن ۇمتىلادى», دەيدى. ال «نەستلە» ءبىلىم بەرۋ باعدارلامالارى ءبولىمىنىڭ باسشىسى, پەداگوگيكا عىلىمدارىنىڭ كانديداتى الەكساندرا ماكەەۆا «سالاۋاتتى تاماقتانۋ مەكتەبى» ءبىلىم بەرۋ باعدارلاماسى ءوزىنىڭ 10 جىلدىعىنا قادام باسىپ كەلە جاتقانىنا توقتالا كەلە: «وسى اۋقىمدى جوبانىڭ اياسىندا تاعى ءبىر قوسىمشا باستامانى قولعا الدىق. بالالار ساباقتان تىس ۋاقىتتا مەكتەپتە نەمەسە ۇيدە باس اسپازدار جۇرگىزگەن ونلاين شەبەرلىك-دارىستەرى ارقىلى دەنساۋلىققا پايدالى تاعامدار ازىرلەپ, كونكۋرس پلاتفورماسىنا ورنالاستىرادى. بىرىنشىدەن, بۇل تاعامداردىڭ دايىندالۋى وتە قاراپايىم, ەكىنشىدەن وتە پايدالى, ۇشىنشىدەن ءدامدى ءارى كوڭىلدى. كەيىن بالالارعا ءومىر بويى قاجەت بولاتىن ويىن تۇرىندەگى بايقاۋ جەلتوقسان ايىندا اياقتالادى. ارينە, جەڭىمپازدار ماراپاتتالادى. ەڭ قىزىعى, باعدارلاماعا تارتىلعان وقۋشىلار ۇيدە اكە-شەشەلەرىن دۇرىس تاماقتانا بىلۋگە ۇيرەتەدى ەكەن», دەيدى.
الماتى
