دەپۋتاتتىڭ ايتۋىنشا, قازىرگى ۋاقىتتا قورداي اۋدانىندا ەلەكتر ەنەرگياسىنىڭ جەتىسپەۋى وتە قاتتى بايقالىپ وتىر. سەناتور اتاپ وتكەندەي, ەلەكتر ەنەرگياسىنىڭ 90%-ى كورشى قىرعىز رەسپۋبليكاسىنان الىنادى.
اۋدان اۋماعىندا ءىرى كاسىپورىندار بار, ولاردىڭ قىزمەتى دە ەلەكتر ەنەرگياسىنا بايلانىستى. مىسالى, قازاقستان-قىرعىز شەكاراسىنداعى اۆتوجول وتكىزۋ پۋنكتتەرىنىڭ ايماعىندا سالىنىپ جاتقان يندۋستريالىق-ساۋدا-لوگيستيكالىق كەشەندى ايتۋعا بولادى.
سەناتور بۇل ماسەلەنى «قورداي 220» ەلەكتر ستانتسياسىن سالۋ ارقىلى شەشۋگە بولادى دەپ ەسەپتەيدى. دەپۋتاتتىڭ ايتۋىنشا, ستانتسيا سالىنسا اۋدان تۇرعىندارىنىڭ ەلەكتر ەنەرگياسىنا تاۋەلدى بولۋى ماسەلەسى شەشىلەدى ءارى الەۋمەتتىك جانە كاسىپكەرلىك نىسانداردى سەنىمدى ەلەكتر قۋاتىمەن قامتاماسىز ەتىلەتىن بولادى.
«بۇگىنگى تاڭدا قورداي اۋدانىندا قۋاتى 63 مۆت قوسالقى ستانتسياسى مەن جوعارى ۆولتتى اۋە جەلىسىن سالۋ بويىنشا, مەملەكەتتىك ساراپتامانىڭ وڭ قورىتىندىسى الىنىپ, جالپى قۇنى 21 ملرد تەڭگەنى قۇرايتىن جوبا دايىندالدى. ول جۇزەگە اسقان جاعدايدا, جوسپارلانعان جانە قۇرىلىسى ءجۇرىپ جاتقان نىسانداردى ەلەكتر ەنەرگياسىمەن تولىق قامتاماسىز ەتىپ قانا قويماي, تاريف قۇنىن تومەندەۋىنە دە سەپتىگىن تيگىزەدى», دەدى سەناتور.
بەكبولات ورىنبەكوۆ وسىعان بايلانىستى پرەمەر-مينيستر ءاليحان سمايىلوۆتان وسى ماسەلەنى شەشۋگە جاردەمدەسۋدى, اتاپ ايتقاندا, جامبىل وبلىسىنىڭ قورداي اۋدانىن ەلەكتر ەنەرگياسىمەن قامتاماسىز ەتۋ ءۇشىن رەسپۋبليكالىق بيۋدجەتتەن قاجەتتى قارجىنى ءبولۋدى سۇرادى.
