زالدار اقساي قالاسىندا, اقپاتەر, داريان, بۇلان جانە قاراۋىلتوبە اۋىلدارىندا ىسكە قوسىلدى. اقسايداعى زال جەكە سپورت زالى عيماراتىندا, كازتالوۆ اۋدانىنىڭ اقپاتەر اۋىلىندا تۇرعىن ءۇي عيماراتىندا, بايتەرەك اۋدانىنىڭ دارينسك اۋىلىنداعى زال تۇرعىن ءۇي عيماراتىندا, سىرىم اۋدانىنىڭ بۇلان اۋىلىندا سپورت كلۋبى عيماراتىندا, اقجايىق اۋدانىنىڭ قاراۋىلتوبە اۋىلىندا بالالار مەن جاسوسپىرىمدەر سپورت مەكتەبىنىڭ عيماراتىندا ورنالاسقان.
«بۇرىن بىزدە دزيۋدو ءبولىمى بولمادى. ەندى دزيۋدومەن اينالىسامىز, ءارى جارىستارعا دايىندالامىز. وسىنداي زاماناۋي زال اشقان بارشاڭىزعا العىس بىلدىرەمىز. وسىندا جاتتىققان وتە ۇنايدى», دەدى قاراۋىلتوبە اۋىلىنىڭ كىشكەنتاي تۇرعىنى رىسبەك وتەپبەرگەن.
زالدار «قازاقستان حالقىنا» قوعامدىق قورىنىڭ «24 بالالار سپورت زالى» جوباسى اياسىندا جاراقتاندىرىلدى. قور 5 زالدىڭ اشىلۋىنا 41,2 ملن تەڭگە باعىتتادى. «قازاقستان حالقىنا» قورىنىڭ قاراجاتى ەسەبىنەن سپورت زالداردا بوكس, كۇرەس, دزيۋدو جانە باسقا دا سپورت تۇرلەرىمەن اينالىسۋ ءۇشىن قاجەتتى سپورتتىق قۇرالدارمەن جابدىقتالدى. كۇرەس كىلەمدەرى مەن سومكەلەر, ەدەن جابىندارى, جاتتىعۋ مانەكەندەرى, سونداي-اق گانتەلدەر, بوكس قولعاپتارى مەن دۋلىعالار, جابدىقتار, ارقاندار, سپورتتىق جيناقتارى جانە ت.ب. ساتىپ الىندى. باستاما «باتىر بولامىن!» قورىمەن سەرىكتەستىكتە جۇزەگە اسىرىلۋدا. اتالعان قور جوبانىڭ ۇيىمداستىرۋشىلىق ماسەلەلەرىمەن اينالىسادى.
«سپورت زالدار شالعاي اۋىلداردا اشىلىپ وتىر. وسىعان دەيىن ەلدى مەكەندەردەردە زاماناۋي جابدىقتالعان زالدار بولمادى. سوندىقتان جەرگىلىكتى تۇرعىندار, ونىڭ ىشىندە بالالار مەن جاستار اشىلۋدى اسىعا كۇتتى. قازىردىڭ وزىندە ءار زالدا ءتۇرلى سپورت تۇرلەرى بويىنشا 30-40-قا جۋىق بالا جازىلدى. اۋىل ومىرىنە جاڭا دەم بەرىپ, اۋىل جاستارىنىڭ سپورتپەن شۇعىلدانۋىنا سەبەپكەر بولعان «قازاقستان حالقىنا» قورىنا العىس ايتامىز. جوبانى ىسكە اسىرۋعا وڭىرلەردەگى جەرگىلىكتى اتقارۋشى ورگاندار جاردەمدەسىپ, قولداۋ كورسەتكەنىن اتاپ وتكىم كەلەدى», دەدى اشىلۋ سالتاناتىندا «باتىر بولامىن!» قورىنىڭ ۆيتسە-پرەزيدەنتى ەرنۇر سابىكەن ۇلى.
ايتا كەتەيىك, «قازاقستان حالقىنا» قورى ىسكە اسىرىپ جاتقان «24 بالالار سپورت زالى» جوباسى ەلىمىزدىڭ شالعايداعى ەلدى مەكەندەرىندە نەمەسە بالالار ءۇشىن سپورتقا قولجەتىمدىلىك دەڭگەيى تومەن اۋىلدىق جەرلەردە بالالار سپورتىنىڭ قولجەتىمدىلىگىن ارتتىرۋعا باعىتتالعان. جوبانىڭ نەگىزگى ماقساتتى اۋديتورياسى – 5 جاستان 18 جاسقا دەيىنگى, از قامتىلعان جانە كوپبالالى وتباسىلاردان شىققان بالالار. 24 زالدى اشۋعا ارنالعان قايىرىمدىلىق باعدارلاماسىنىڭ بيۋدجەتى - 183 623 000 تەڭگە. بۇگىندە 16 زال اشىلىپ, جۇمىس ىستەپ جاتىر.
