كومەك كەرۋەنى

شىعىسقازاقستاندىقتار سۋ تاسقىنىنان زارداپ شەككەن رەسەيدىڭ التاي ايماعىنا گۋمانيتارلىق كومەك جىبەردى. التاي ايماعىنىڭ گۋبەرناتورى الەكساندر كارلين­گە ءوڭىر جۇرتشىلىعى اتىنان ايماق باسشىسى بەردىبەك ساپارباەۆ قازا بولعان ادامدار ءۇشىن كوڭىل ايتىپ, گۋمانيتارلىق كومەك جىبەرىلگەنىن جەتكىزدى. شىعىس جۇرتى ءۇشىن تابيعاتتىڭ توسىن جاعدايى ەرتەدەن تانىس. ءوڭىر تۇرعىندارى وسىدان ءتورت جىل بۇرىن ورىن العان تابيعي اپاتتى ۇمىتا قويعان جوق. قالىڭ تۇسكەن قار, كۇرت جىلىعان كۇن, ەرىگەن قار سۋى مەن وعان قوسا جاۋعان جاڭبىر سول كەزدە شىعىسقازاقستاندىقتاردى ابدەن ابىگەرگە سالعان. بىرقاتار ەلدى مەكەندەر قارعىن سۋدىڭ استىندا قالعان كەزدە قالىڭ ەلدىڭ قولداۋىنا سۇيەنگەن شىعىسقازاقستاندىقتار قايىرىمدىلىق كومەكتىڭ قيىن-قىستاۋ كەزدە قانشالىقتى دەمەۋ ەكەنىن جاقسى بىلەدى. – جاقىنىڭا كومەكتەسۋ – وتە ساۋاپتى ءىس. ءبىزدىڭ جانىمىزدا وتە مەيىرىمدى ادامدار ءومىر ءسۇرىپ جاتىر. شىعىس قازاقستان وبلىسى ءاردايىم تابيعي جاعدايدان زارداپ شەككەن اۋداندارعا قولۇشىن سوزىپ, كومەك كورسەتىپ كەلەدى. سۋ تاسقىنى بولىپ, باسىمىزعا اۋىرتپالىق تۇسكەن ساتتە بىزگە دە كومەك كەلگەن بولاتىن, – دەپ ەسكە الادى گۋمانيتارلىق كومەكتى جيناۋعا قاتىسۋشىلاردىڭ ءبىرى ناتاليا شيمولينا. التاي ايماعىنا كومەك كورسەتۋگە كوپ­تەگەن اۋداندار ۇلەس قوستى. ءبىر عانا شەمو­نايحا اۋدانى ۇن, قاراقۇمىق, اسبۇرشاق, ارپا سىندى 20 توننا ازىق-ت ۇلىك قورىن جيناپ بەردى. زىريان اۋدانىنىڭ ەرىكتىلەرى 2 ميلليون تەڭگەدەن استام گۋمانيتارلىق كومەك كورسەتتى. ال بورودۋليحالىقتار 100 دانا جىلى جامىلعى, 100 دانا جاستىق, 100 دانا كيىم ازىرلەدى. دۋمان اناش, «ەگەمەن قازاقستان». وسكەمەن.