قازاقستاندىق 7 بوكسشى الەم چەمپيونى اتاندى

الماتىدا ماۋسىمنىڭ 3-ءى كۇنى مارەگە جەتكەن بوكستان اسكەريلەر اراسىنداعى الەمنىڭ 55-ءشى چەمپيوناتىندا 7 قازاقستاندىق چەمپيون اتاندى. ءبىزدىڭ قۇرامانىڭ بىردە-ءبىر مۇشەسى جۇلدەسىز قالعان جوق. ولار 7 «التىننان» بولەك, تاعى 1 كۇمىس جانە 2 قولا مەدالداردى جەڭىپ الدى. فينالدىق ايقاستى 49 كيلوعا دەيىنگى ولجاس باينيازوۆ پەن رەسەيلىك تارلان بەليك گالانوۆ باستادى. ءبىزدىڭ جاس پەرى كورشى ەلدىڭ 2012, 2013 جىلدارعى چەمپيونىنان قايمىققان جوق. ناتيجەسىندە تورەشىلەردىڭ باعامى بويىنشا 3:0 ەسەبىمەن جەڭىسكە جەتتى. ال ءتۋرنيردى شيرەك فينالدان باستاعان ولجاس العاشىندا پاكستاندىق اسيف رازانى 2-راۋندتا تەحنيكالىق نوكاۋتپەن جەڭسە, جارتىلاي فينالدا سولتۇستىك كورەيا وكىلى حو چوي تايدى 3:0 ەتىپ ۇتقان بولاتىن. كوماندالاس اتتاسىنىڭ جەڭىستى جولىن 52 كيلوداعى ولجاس ساتتىباەۆ تا ءساتتى جالعاستىرا ءبىلدى. ونىڭ بۇل جولعى قارسىلاسى – ماروككولىق ابدەلالي داررا وڭاي شاعىلاتىن جاڭعاق ەمەس ەدى. سوعان قاراماستان, ءبىزدىڭ باعلاننىڭ باسىمدىعى ەشكىمنىڭ كۇمانىن تۋعىزعان جوق. ءبىر ايتا كەتەتىنى, بۇل كۇنى وتپەي قالعان فرانتسۋز الەكسيس ۆاستين مەن رەسەيلىك الەكساندر بەسپۋتين اراسىنداعى ۇرىستان باسقا ايقاستاردىڭ ءبارى جوعارىداعى ەسەپپەن اياقتالدى. تۋرنيرگە شيرەك فينالدان ات قوسقان ولجاس سول سىناقتا تۋنيستىك موۋنتاسار ءبوۋاليدى 1-راۋندتا-اق ىسكە العىسىز ەتىپ تاستادى. ونىڭ سوڭىنان كورەيالىق كيم جا كيۋنگتى 3:0 ەتىپ تىزە بۇكتىردى. قازاقستان قورجىنىنا ءۇشىنشى التىن مەدالدى 56 كيلولىق قايرات ەراليەۆ ءتۇسىردى. وسى كەزگە دەيىن گرۋزين تورنيكە توتلادزەنى (3:0), كحدر بوكسشىسى چول گۋك كۆوندى (3:0) جانە يتاليان الەسسيو دي ساۆينونى (2:1) جولدان تايدىرعان ول اقىرعى شايقاستا الجيرلىك فاحەم حامماچيدەن باسىم ءتۇستى. مۇنىڭ ارتىنشا 60 كيلوعا دەيىنگى سالماق دارەجەسىندەگى بەكمان سويلىباەۆتىڭ دا التىننان القا تاعاتىن كەزەگى كەلدى. ول مۇنى قىتايلىق كسيا لينگجيەنى تالاسسىز جەڭۋ ارقىلى جاسادى. ءسويتىپ, وسىنىڭ الدىنداعى بىرىككەن اراب امىرلىگىنىڭ اتلەتى حاماد الزاابي مەن شريلانكالىق ن.ل. پادماكۋمارانىڭ ەكەۋىن بىردەي 1-راۋندتا نوكاۋتقا جىبەرگەن ەڭبەگى فينالدا قايتتى. بۇدان كەيىن قازاقستاندىق بوكسشىلار 75 كيلوعا دەيىنگى سالماقتا اقتىق جەكپە-جەككە شىقتى. وندا ەلىمىز جالاۋىن جەلبىرەتكەن بابىرجان مومىنوۆ برازيليالىق تانىمال بوكسشى پەدرو ليماعا بەسىنشى بۇرىش ىزدەتتى. ال ونىڭ وسى كەزگە دەيىن جارىس جولىنان شىعارىپ تاستاعان قارسىلاستارى اراسىندا امىرلىكتەن موحامەد موۋسابيح ال-شابلي (نوكاۋت, 1-راۋند) مەن گەرمانيالىق ابۋ-ليبدەح ابدۋلراحمان (3:0) بولدى. وكىنىشكە قاراي, وسىنىڭ سوڭىن الا رينگكە كوتەرىلگەن 81 كيلوداعى ارمان رىسپەك بەلگىلى گوللاند سپورتشىسى پەتەر مۋللەنبەرگتەن اسا المادى. مۇنىڭ ەسەسىنە, وسىدان كەيىن سوڭعى ەكى سالماقتاعى ساڭلاعىمىز دا تىلەۋلەستەرى كوڭىلىنەن شىقتى. اتاپ ايتقاندا, 91 كيلولىق اسقار ابدۋللاەۆ يتاليان فابيو ءتۋرچيدى, ال 91 كيلودان جوعارى سالماقتاعى قامشىبەك قوڭقاباەۆ برازيليالىق رافاەل ليمانى ەمىن-ەركىن ۇتتى. بۇعان قوسىمشا ايتا كەتەتىن نارسە, بۇلاردىڭ ءبىرىنشىسى التىن جۇلدەگە دەيىن ءۇش بوكسشىنى وراسا, ەكىنشىسى ەكى باسەكەلەسىن قاپى قالدىردى. اسقارعا ىرىكتەۋ سىناعىندا قىتايلىق ۆانگ كسۋانكسۋان قارسى شىعا الماي قالسا, پاكستاندىق نيسار حان ودان 2-راۋندتا نوكاۋت الدى. جارتىلاي فينالدا نەمىس يوحانن ۆيتت 0:3 بولىپ جەڭىلدى. ءوز كەزەگىندە قامشىبەك سوڭعى سىنعا پاكستاندىق احمەد الي (3:0) مەن كۋۆەيتتىك سالەم ال-ءشامماريدى (3:0) ۇتىپ كەلدى. چەمپيوناتتا ەلدوس سارقۇلوۆ (64 كگ) پەن ساعادات راحمانقۇلوۆ (69 كگ) قولا جۇلدەنى قاناعات تۇتتى. تۋرنيردە سونداي-اق فرانتسۋز الەكسيس ۆاستين مەن گوللانديالىق پەتەر مۋللەنبەرگتەن بولەك, فينالدا تۋنيستىك شيلي الاانى ۇتقان موڭعول باتتارسۋكح چينزوريگ (64 كگ) تە چەمپيوندىق اتاققا قول جەتكىزدى. دامير قوجامقۇل.