«مەنىڭ تاپسىرماممەن ينۆەستيتسيالىق جوبالاردىڭ بىرىڭعاي جۇيەسى ازىرلەندى. الايدا بيىل جوسپارداعى 284 ينۆەستيتسيالىق جوبانىڭ 43-ءى عانا جۇزەگە اسىرىلعان. ياعني, نەبارى 15 پايىزى ىسكە قوسىلعان. مۇنىڭ بارىنە قۇر تسيفر رەتىندە قاراۋعا بولمايدى. ويتكەنى سونىڭ كەسىرىنەن كوپتەگەن جۇمىس ورنى اشىلماي قالدى», دەدى مەملەكەت باسشىسى.
سالدارىنان ەل ەكونوميكاسى ميللياردتاعان تەڭگە قارجىدان قاعىلعان. پرەزيدەنت بۇل ماسەلەدە سىرتقى ىستەر مينيسترلىگى شەتەلدەن ينۆەستور تارتۋ ءۇشىن ءتيىمدى جۇمىس اتقارىپ جاتقانىن اتاپ ءوتتى.
«ەلشىلەر شەتەلدەردە ءتۇرلى كەزدەسۋ وتكىزىپ, ەلىمىزگە ينۆەستورلاردى جەتەلەپ اكەلەدى دەۋگە بولادى. بىراق جوبانى جۇزەگە اسىراتىن كەزدە جەرگىلىكتى جەردە ءتۇرلى ماسەلە تۋىندايدى. ءبىر سوزبەن ايتساق, ءبىز دايىن ينۆەستورلاردان ايىرىلىپ قالىپ جاتىرمىز. تاعى دا قايتالاپ ايتامىن, ينۆەستيتسيالىق جوبالاردى جۇزەگە اسىرۋعا جاعداي جاساۋ ياعني, جەر ءبولۋ, رۇقساتناما بەرۋ, ينفراقۇرىلىممەن قامتۋ – اكىمدەردىڭ مىندەتى. ارينە, ورتالىققا دا وزگەرىس جاساۋ كەرەك. وسىعان قاتىستى بىرقاتار ۇسىنىس بار ەكەنىن بىلەمىن. پرەمەر-مينيستر ەكونوميكالىق ساياسات جونىندەگى كەڭەستە ءبارىن قايتادان تالقىلاپ, ءوزارا كەلىسىلگەن شەشىمدى ماعان ەنگىزۋى قاجەت», دەدى پرەزيدەنت.
