ەۋرازيالىق ەكونوميكالىق وداق ازاماتتارىمىزعا جاڭا جۇمىس ورىندارىن تابۋعا مۇمكىندىك بەرەدى

استانا. 5 ماۋسىم. قازاقستان ازاماتتارىنا ەۋرازيالىق ەكونوميكالىق وداق اياسىنداعى ارىپتەس ەلدەرگە بارىپ, جاڭا جۇمىس ورىندارىن تابۋعا قولايلى جاعداي تۋىپ وتىر. ورتالىق كوممۋنيكاتسيالار قىزمەتىندە وتكەن بريفينگتە  سەنات دەپۋتاتى ۆلاديمير بوبروۆ وسىلاي دەدى. بۇل تۋرالى ortcom.kz حابارلادى. «ينتەگراتسيالىق ۇردىستەر» تاقىرىبى اڭگىمە ارقاۋىنا اينالعان باسقوسۋدا ۆلاديمير بوبروۆ دۇنيەجۇزىندە ەكونوميكالىق بىرلەستىكتەر ءوز باسىمدىقتارىن دالەلدەپ وتىرعانىن ايتا كەلە: «ەۋرازيالىق ەكونوميكالىق وداق الەۋمەتتىك تۇرعىدان قازاقستاندىقتارعا الەۋمەتتىك پاكەتتەردى بىرتىندەپ تەڭەستىرۋگە, ءبىلىم جانە مەديتسينالىق قىزمەتتەردى شەكتەۋسىز الۋعا, تەك قازاقستاندا عانا ەمەس, مۇشە-مەملەكەتتەردىڭ كەز-كەلگەنىنەن جاڭا جۇمىس ورىندارىن تابۋعا مۇمكىندىكتەرى بەرىپ وتىر», – دەدى. ونىڭ ايتۋىنشا, قازاقستاننىڭ ءاربىر ازاماتى ارىپتەس مەملەكەتتەردىڭ اۋماعىندا كاسىپكەرلىك ءۇشىن بارلىق قاجەتتى مۇمكىندىكتەردى پايدالانا الادى. جالپى, ەۋرازيالىق ەكونوميكالىق وداقتىڭ پايداسىنا كۇمان جوق. جولدىباي بازار. دەرەككوز: ortcom.kz. فوتو: Minplan.kz.