ارنا باسىنداعى داۋ

شارۋالاردىڭ جاقىن ماڭداعى تۇرعىن ءۇي يەلەرى مەن شارۋاشىلىق قۇرىلىستاردىڭ سۋ وتكىزۋگە كەدەرگى كەلتىرەتىنىنە الاڭدايتىنىن ەسكەرگەن ءوڭىر باسشىسى ءتيىستى تۇلعالارعا ناقتى شارالار قابىلداۋدى ەسكەرتكەن ەدى. ودان بەرى ءبىرشاما ۋاقىت ءوتتى.

الايدا قاراشا ايىندا سەڭكىباي ارناسىنا قاتىستى جۇرت جانايقايىن باق وكىلدەرىنە جەتكىزدى. جەرگىلىكتى جۇرتشىلىقتىڭ ايتۋىنشا، 14 ەلدى مەكەنگە سۋ جەتكىزىپ وتىرعان كانالدى اركىم ءوز بەتىنشە بىتەپ تاستاعان ەكەن. سونىڭ سالدارىنان ەگىس القاپتارىنا بىرنەشە جىل بويى سۋ جەتپەي كەلەدى. وسى ماسەلەنى وڭىنان شەشۋدى تالاپ ەتكەن جۇرتشىلىق ۋشىققان ماسەلەگە جەرگىلىكتى اتقارۋشى بيلىك نۇكتە قويسا دەگەندى العا تارتادى.

«كانالدىڭ بويىندا وتىرعان حالىق­تى كىم ويلايدى؟ الدەكىمدەردىڭ ارنانى بىتەۋى سالدارىنان حالىق جاپا شە­گىپ وتىر. جەرگىلىكتى اتقارۋشى بيلىك وكىل­دەرى ءبىزدىڭ شىمبايىمىزعا باتقان وسى ماسەلە­نى شەشىپ بەرسە دۇرىس بولار ەدى. حالىق­قا قارايلاساتىن كىم بار ءوزى؟»، دەگەن سەڭ­كىباي اۋىلىنىڭ تۇرعىنى ءانۋار سەرىك­باەۆ­تىڭ جانايقايى ەشكىمدى بەيجاي قالدىرماسا كەرەك.

راسىندا دا ۋاقىتىندا ارناسىنان اسىپ اققان كانال سۋىنىڭ تاراز قالاسىنان شىعار تۇسىنىڭ قاڭسىپ قالعانى كىمدى دە بولسىن ويلاندىرماي قويمايدى. شىلىڭگىر شىلدەدە سۋ ىزدەپ سارىلعان حالىقتى الدە­كىم­دەردىڭ ارنانى قولدان قۇرعاتىپ وتىر­­عانى اشىندىرعانى اقيقات. ولار ىق­پال­دى ادامداردىڭ ءوز تىرلىگى ءۇشىن جۇرت­­تىڭ جۇيكەسىنە شي جۇگىرتكەنىنە وكپەلى. مۇنداي كەلەڭسىزدىكتىڭ ارى قاراي جالعاس­قانىن قالامايدى. 

وتكىر ماسەلەگە بايلانىستى ءۇن قاتقان تاراز قالاسى اكىمىنىڭ ورىنباسارى نۇربول قالدىباەۆ ماسەلەنىڭ مانىسىنە تەرەڭ ۇڭىلەتىنىن ايتقان بولاتىن.

«بۇل دەرەك بويىنشا ەندى عانا حاباردار بولىپ تۇرعان جايىم بار. الداعى ۋاقىتتا وسى ماسەلەگە قاتىستى ناقتى جۇمىستاردى باستاي­تىن بولامىز. قورعاۋ اۋماعىنا كىرگەن جە­كەمەنشىك كاسىپكەرلەر، جەكە ۇيلەر بار، زاڭسىز مەنشىكتەپ الۋ بار، كانالدارعا كارىز جۇيەلەرىن شىعارىپ قويعان دەرەكتەر كەزدەسەدى. سول بويىنشا جۇ­مىستار جۇرگىزەمىز»، دەيدى تاراز قالاسى اكىمىنىڭ ورىنباسارى.

راسىندا دا جاز مەزگىلىندە ارنا سۋى­نا جارىماعان جۇرتتىڭ جانايقايىن بىرنەشە مارتە ەستىگەن بولاتىنبىز. ماسەلەن، سارىسۋ اۋدانىنا قاراستى ۇيىم ەلدى مەكەنىنىڭ شارۋالارى «سارىوزەك» ارناسىنان كەلەتىن سۋعا جارىماي وتىرعانىن، سۋ تاپشىلىعى سالدارىنان شىعىنعا بات­قانىن ايتىپ دابىل قاققان ەدى. اتال­عان ماسەلە «Egemen Qazaqstan» گازەتىن­دە تامىز ايىندا «شىعىنعا باتقان شارۋالاردىڭ ماسەلەسىن كىم شەشەدى؟» دەگەن تاقىرىپپەن جاريالانعان.

قىس مەزگىلىنىڭ قامىن جازدا ويلايتىن جۇرت جازدىڭ ماسەلەسىن قىس كەزىندە قامدا­عاندى ءجون كورەتىن سەكىلدى. ونى ولاردىڭ جانايقايىنان اڭعارۋ قيىن ەمەس. ولار وسىلايشا قارلى قاراشا ايىندا سەڭكىباي ارناسىنىڭ ماسەلەسىنە باس اۋىرتقان ەدى.

قالا اكىمىنىڭ ورىنباسارى اتال­عان ماسەلە بويىنشا تالداۋ جۇمىس­تارىن جۇر­گىزگەن دە بولار. ايتسە دە، جاز مەزگىلىندە مۇنداي ماسەلە قاي­تالان­باسىنا كىم كەپىل؟ سەڭكى­بايداعى جانايقاي تولىعىمەن شەشىمىن تاپتى ما، الدە پروبلەما كۇيىندە قالدى ما؟ ۋاقىتىندا كورە جاتارمىز. جالپى، جۇرتتىڭ جانايقايى نازارىمىزدان تىس قالماق ەمەس. ويتكەنى جاز مەزگىلى كەلسە بولدى، شارۋالاردىڭ ماسەلەسى الدىمىزدان ءجيى شىعادى. جۇرتتىڭ تىلەگىن جەرگىلىكتى بيلىك دەر كەزىندە ەسكەرسە دەيسىڭ.

جامبىل وبلىسى