بۇقارا اراسىنداعى بەدەلدى قۇرىلىم

“استانا قالاسى مەن اقمولا وبلىسى ءبىلىم جانە عىلىم قىزمەت­كەر­لەرى كاسىپوداعى” قوعامدىق ءبىر­لەستىگىنىڭ ەسىل اۋداندىق فيليالى وڭىردەگى ونەگەلى ىستەردىڭ ۇيىتقىسى رەتىندە زور بەدەلگە يە. ونى 2008 جىلعى قۇرىلتاي كونفەرەنتسياسى ءبىراۋىزدان سايلاعان ۇلاعاتتى ۇستاز جانات كوككوزوۆا باسقارادى. كاسىپوداق كەڭەسى جالپى ءبىلىم بە­رە­تىن 30 مەكتەپتىڭ, جاستار شىعار­ما­شى­لىق ءۇيىنىڭ, بالالار مۋزىكا مەك­تەبىنىڭ, “گۇلدەر” بالاباقشاسىنىڭ, كاسىبي مەكتەپ پەن بالالار ءۇيىنىڭ ۇجى­مىن بىرىكتىرەدى. ءبىلىم مەكەمە­لەرىندە 1193 ادام قىزمەت اتقارسا, سونىڭ 1174-ءى كاسىپوداق مۇشەسى ەكەندىگى بەدەل بەلەسىنىڭ بيىكتەگەنىن بىلدىرەدى. اۋداندىق كەڭەس پەن كاسىپوداق كوميتەتتەرىندە جۇمىس بەرۋشىلەرمەن ەكىجاقتى كەلىسىم مەن ۇجىمدىق شارت جاسالعان. مۇندا قىزمەتكەرلەردىڭ الەۋمەتتىك سۇرانىستارىنا, ەڭبەك قا­تىناستارىنا, كاسىپوداق مۇشەلەرىنىڭ دەمالىسى مەن ساۋىقتىرىلۋىنا, ولار­دى ماراپاتتاۋ مەن قوسىمشا ەڭبەك دەمالىسىن بەلگىلەۋ, تاعى باسقا ماسەلەلەرگە ايرىقشا كوڭىل بولىنەدى. قابىلدانعان شەشىمنىڭ ورىندالۋى باقىلاۋدان تۇسكەن ەمەس. سونداي-اق, كاسىپوداق وتىرىستارىنىڭ حات­تا­ماسىمەن تانىسقان كىسى ەڭبەكاقىنىڭ ۋاقىتىندا تولەنۋى, ەڭبەككە ۋاقىتشا جارامسىزدىق قاعازدارىن جۇرگىزۋ, زەينەتاقى قورلارىنا جارنا قارا­جاتىن اۋدارۋ, كاسىپوداق مۇشەلەرىنىڭ ءوتىنىش-تىلەكتەرىن قاراۋ دا باستى باعىت سانالاتىنىن اڭعارادى. وسى­نىڭ ارقاسىندا سوڭعى بەس جىلدا ادىستەمەلىك بىرلەستىكتەر جەتەك­شى­لە­رىنە 15 پايىزدىق, اۋىل مۇعالىمدەرىنە 25 پايىزدىق ۇستەمە تولەنىپ كەلەدى. جىل سايىن “جىل مۇعالىمى”, “ۇزدىك سىنىپ جەتەكشىسى”, “جاس ۇستاز”, “ۇزدىك كاسىپوداق ۇيىمى” سياقتى باي­قاۋ­لار وتكىزۋدىڭ ونەگەلى قىرلارى كوپ. جاس ماماندار مەن اۋىلعا ات­تانعان مۇعالىمدەرگە جەڭىلدىكتەر قاراستىرۋ دا كۇن تارتىبىنەن تۇسكەن ەمەس. سونىڭ ءبىر ايعاعى رەتىندە كاسىپوداق بىرلەستىگىنىڭ ۇسىنىسىمەن سەگىز مۇعالىمنىڭ ەسىل قالاسىندا جاڭادان سالىنعان ۇيدەن پاتەر الۋىن ايتار ەدىك. باقبەرگەن امالبەك, اقمولا وبلىسى.