وكتەمدىككە شەك قويار كەز كەلدى

جاسىراتىنى جوق, قازىر كاسىپوداقتار قىزمەتىنە قاتىستى ءارتۇرلى پىكىرلەر ايتىلىپ قالاتىنى بار. كوپ رەتتە كەزىندەگى قوعام ومىرىندەگى, ەڭبەككەرلەردىڭ مۇڭ-مۇددەسىن قورعاۋداعى بەلسەندى ءىس-قيمىلى وسالسىپ كەتكەن دەگەن تۇرعىدا سىن بىلدىرىلەدى. شىندىعىندا سولاي دا كورىنۋى مۇمكىن. الايدا قالىڭ قاۋىم ارقا تۇتقان, ءوز مۇقتاج-تىلەكتەرىن ارتقان بۇل ۇيىمنىڭ جۇرتپەن بايلانىسى بۇرىنعىسىنشا قالپىندا ەكەنىن ايتار ەدىم. راس, ىستەرىمىز كوزگە كورىنبەيتىن سياقتى بولعانىمەن, جۇكتەلگەن سەنىم مەن ءۇمىتتى اقتاۋ جولىندا ايانىپ قالماي جۇرگەنىمىزدى كوپشىلىك بىلەدى. اشىعىن ايتقاندا, وتكەندەگىدەي قولداۋ, قامقورلىق جوق. ءبىراز ۇساق ۇيىمدار جەكەمەنشىك قۇرىلىمدار قاس-قاباعىنان اسا المايدى. ال قۇرامى ۇلكەن, مۇشەلەرى كوپ توپتاسقان ءىرى كاسىپوداق كوميتەتتەرى تۋرالى بۇلاي ايتپاس ەدىك. سولاردىڭ قاتارىندا 20 مىڭنان استام مۇشەسى بار ءبىزدىڭ كومىرشىلەردىڭ كاسىپوداعىن اتاۋعا بولادى. بۇل شاحتالاردا ەڭبەك ەتۋشىلەردىڭ 99 پايىزى كاسىپوداققا قامتىلعان. شاحتەرلەرگە ارنالعان الەۋمەتتىك-تۇرمىستىق نىساندار دەنىنىڭ ساقتالىپ قالۋى ۇيىمىمىز بەدەلىنىڭ ءبىر مىسالى. بۇگىندە “شاحتەر” دەمالۋ, “جارتاس” ساۋىقتىرۋ ورىندارى, مەديتسينالىق ورتالىق ەسىگى ادەتىنشە كەنشىلەرگە ءاردايىم اشىق. ولار كاسىپوداق جولداماسىمەن دەمالىپ, دەنساۋلىق­تارىن تۇزەپ جاتادى. وندىرىستەگى كۇتپەگەن جاعدايلارعا سايكەس ماتەريالدىق جاردەم الادى, جەڭىلدىك تۇرلەرىن پايدالانادى. وسى جايلاردى اتاي كەلگەندە, جۇرتتىڭ كوكەيىن تەسكەن ماسەلەلەردىڭ از ەمەستىگىنە دە توقتالماسقا بولمايدى. الدىمەن اتاعاندا, ينفلياتسيا دەڭگەيىنە بايلانىستى ەڭبەكاقىنى يندەكستەۋ نەگىزگى تىلەك بولىپ وتىر. بۇل تۋرالى كاسىپوداق كوميتەتى مەن اكىمشىلىك اراسىندا جاسالعان ۇجىمدىق كەلىسىم-شارتتا دا كورسەتىلگەن بولاتىن. وكىنىشكە قاراي, “ارسەلور ميتتال تەمىرتاۋ” كومپانياسى باسشىلىعى ازىرگە ونى ەلەپ-ەسكەرەر ەمەس. سونىمەن قاتار, شاحتالار ونىڭ قول استىنا كوشكەندە جۇمىستان ءجونسىز قىسقارتىلعان, وندىرىستىك جاراقاتتان ەڭبەككە جارامسىز بولىپ قالعان, ءوتىل جەڭىلدىكتەرى قولدانىلماعان, زەينەتاقى دۇرىس بەلگىلەنبەگەن ادامدارعا ورتاشا ەڭبەكاقىنى ەسەپتەۋ ارقىلى ونى قايتا قاراۋ جونىندە ازاماتتار قۇقىن قورعاۋ ماقساتىنداعى ۇسىنىس-ەسكەرتپەلەرىمىز, مىنەكي, ون جىلدان استام بويىندا قوزعاۋسىز قالىپ كەلەدى. بۇل ءجايت ۇكىمەتكە دە ءمالىم. سەناتورلار سەرىك اقىلباەۆ پەن يۋري كۋبايچۋك تا بۇرىنعى شاحتەرلەردىڭ وسىناۋ تالاپ-تىلەگىن جەتكىزىپ ءجۇر. بىراق ماسەلەنىڭ جۋىر ارادا شەشىمىن تاباتىندىعى سەزىلمەيدى. ءسوز رەتىندە تاعى ءبىر جايدى ايتا كەتسەم دەيمىن. ءبىزدى اسا الاڭداتاتىنى – شاحتالارداعى كەنشىلەردىڭ شتاتتىق كەستەسى جىل وتكەن سايىن قىسقارىپ بارادى. ال كومىر ءوندىرۋ كولەمى وزگەرىسسىز. سوعان قاراماستان, بوس جۇمىس ورنى بولسا دا جاڭا كۇش قابىلدانبايدى. سونىڭ سالدارىنان شاحتەرلەر قالىپتىدان تىس ەڭبەك نورماسىن ورىنداۋعا ءماجبۇر. بىلايشا ايتقاندا, ەكى كىسىنىڭ جۇمىسىن اتقارادى. مۇنىڭ ءوزى دەنساۋلىققا, ەڭبەك قاۋىپسىزدىگىنىڭ ساقتالۋىنا كەرى اسەرىن تيگىزۋدە. شاعىمىمىز بويىنشا قۇقىق قورعاۋ ورگاندارى مۇنى تەكسەرىپ جاتىر. امال نە, كومپانيا قۇلاق اسپاعان سوڭ وسىنداي لاجعا بارۋعا تۋرا كەلەدى ەكەن. اسىلى, كاسىپوداقتاردىڭ بەدەلىن كۇشەيتەتىن, قۇقىن كەڭەيتەتىن جاڭا ەرەجەلەر قابىلدانۋى قاجەتتىگى ۋاقىت تالابى بولىپ تۇر. مىنە, كاسىپوداقتاردىڭ كەزەكتى جيىنى وتكىزىلگەلى وتىر. جوعارىدا ايتىلىپ وتكەن ماسەلەلەر قاراعاندى شاحتالارىنا عانا ءتان ەمەس شىعار. سوندىقتان ءىرى كومپانيالار وكتەمدىگىنە شەك قويار شارالار اشىق تالقىلانىپ, ناقتى شەشىمدەر قابىلدانىپ جاتسا, قۇبا-قۇپ بولار ەدى. مارات ميرگايازوۆ, كومىرشىلەردىڭ “قورعاۋ” كاسىپوداعى  قوعامدىق  بىرلەستىگىنىڭ توراعاسى. قاراعاندى.