تۇرمىستىق قالدىقتار قالاي زالالسىزداندىرىلادى؟

پرەزيدەنت جانىنداعى ورتالىق كوممۋنيكاتسيالار قىزمەتىندە ءداستۇرلى بريفينگ ءوتتى. باسقوسۋدىڭ بۇل جولعى قوناعى قورشاعان ورتا ءجا­نە سۋ رەسۋرستارى ءمينيسترى نۇر­لان قاپپاروۆ بولدى.  «ەل ۇكىمەتىنىڭ قاۋلىسىمەن ەلىمىزدىڭ سۋ رەسۋرستارىن باسقارۋدىڭ مەملەكەتتىك باعدارلاماسىن ىسكە اسىرۋ جونىندەگى ءىس شارالار جوسپارى بەكىتىلدى. بۇل قۇجات ەلباسى نۇرسۇلتان نازارباەۆتىڭ قازاقستاننىڭ سۋ رەسۋرستارىن باسقارۋ مەملەكەتتىك باعدارلاماسىن بەكىتۋ تۋرالى جارلىعىن ىسكە اسىرۋ ماقساتىندا ازىرلەندى. جوسپاردىڭ ءىس-شارالارى مەملەكەتتىك باعدارلامادا كوزدەلىپ, سۋ ۇنەمدەۋگە, سۋ رەسۋرستارىن قوسىمشا ۇلعايتۋ جانە سۋ وبەكتىلەرىن باسقارۋ جۇيەسىن جەتىلدىرۋگە باعىتتالعان بەس ماقساتتى ينديكاتورلار بويىنشا توپتاستىرىلدى», دەدى قورشاعان ورتا جانە سۋ رەسۋرستارى ءمينيسترى ن.قاپپاروۆ. جوسپارداعى ءىس-شارالاردى جۇزەگە اسىرۋ ناتيجەسىندە 2700 شاقىرىمنان استام ماگيسترالدى جانە ءبولىپ تاراتۋ كانالدارى قايتا جاڭعىرتۋدان جانە كۇردەلى جوندەۋدەن وتكىزىلىپ, 29 جاڭا سۋ قويماسى سالىنباق. ۇنەمى سۋارىلاتىن 400 مىڭ جانە شابىندىق تاسىلمەن سۋارىلاتىن 100 مىڭ گەكتار القاپتارداعى گيدرومەليوراتسيالىق جۇيەلەر جاڭارتىلىپ, قايتا جاڭعىرتىلادى. جۋىردا ۇكىمەت قازاقستاندا تۇرمىستىق قاتتى قالدىقتاردى باسقارۋ جۇيەسىن جاڭعىرتۋ باعدارلاماسىن قولدادى. مۇنداعى ماقسات تۇرمىستىق قاتتى قالدىقتاردى باسقارۋ سالاسىندا كورسەتىلگەن قىزمەتتەر كەشەنىنىڭ تيىمدىلىگىن جوعارىلاتۋ, ەكولوگيالىق جانە الەۋمەتتىك تۇرعىدان قولايلى ەتۋ بولسا, تۇرمىستىق قالدىقتاردى وڭدەۋ ۇلەسىن ۇلعايتۋ مەن ولاردىڭ قاۋىپسىز كومىلۋىن قامتاماسىز ەتۋ دە وسى قاتاردا. سونداي-اق, وسىنىڭ ءبارى «جاسىل» قاعيداتتار تالاپتارىنا سايكەس جۇيەلى تۇردە جۇرگىزىلمەك. سونىمەن بىرگە, باعدارلامانىڭ نەگىزگى بولىمدەرىنىڭ ءبىرى ءوندىرۋشىنىڭ كەڭەيتىلگەن جاۋاپكەرشىلىگى نورمالارىن ەنگىزۋ بولىپ تابىلادى. تاۋار جانە قاپتاما ءوندىرىسىنىڭ نەمەسە يمپورتتاۋشىنىڭ ولاردى پايدالانعاننان كەيىن تۇزىلەتىن قالدىقتاردى جيناۋ جانە قايتا وڭدەۋدى جۇزەگە اسىرۋ مىندەتتەمەسىن زاڭنامالىق تۇرعىدان بەكىتۋ قاجەت. اتالعان ءمىن­دەتتەردى قولداۋ شارالارىن ەنگىزبەي ىسكە اسىرۋ مۇمكىن ەمەس. باعدارلاما مىندەتتەرىن ويداعىداي ورىنداۋ مەن جەكە سەكتوردى جۇمىلدىرۋ ءۇشىن بىرقاتار قولداۋ شارالارى كوزدەلگەن. مەملەكەتتىك جانە جەكە تاراپتاردىڭ قىزمەتتەرىن ۇيلەستىرۋ مەن تىعىز قارىم-قاتىناسىن ورناتۋ ماقساتىندا مينيسترلىكتىڭ قازىرگى ەنشىلەس كومپانيا­سى «جاسىل دامۋ» اق نەگىزىندە تقق باسقارۋ بويىنشا بىرىڭعاي ورتالىعى قۇرىلماق. قازىرگى تاڭدا ەلىمىزدە اكىمدىك, ينۆەستور جانە قوقىس شىعاراتىن كومپانيا اراسىنداعى كەلىسىمشارتتار ءوزارا قاتىناستاردى رەتتەمەۋى ناتيجەسىندە قوقىس وڭدەيتىن زاۋىتتار توقتاپ قالۋدا. اتقارىلعان جۇمىستارعا كەلەر بولساق, ەلىمىزدىڭ 9 قالاسىندا تقق باسقارۋ بويىنشا ينۆەستيتسيالار تارتۋ جۇمىستارى باستالعان. اقتاۋ جانە قاراعاندى قالالارىندا جوبالاردى ىسكە اسىرۋ جۇمىستارى باستالىپ تا كەتكەن. ءابدىراحمان قىدىربەك, «ەگەمەن قازاقستان».