كورمەنى قازاقستاننىڭ كورەيا رەسپۋبليكاسىنداعى ەلشىلىگىنىڭ قولداۋىمەن الماتى قالاسى مۇراجايلارىنىڭ بىرلەستىگى ۇيىمداستىردى. وعان الماتى قالاسىنىڭ مۇراجايى مەن ىقىلاس اتىنداعى ۇلتتىق مۋزىكالىق اسپاپتار مۇراجايىنىڭ كوللەكتسياسىنان 130-دان استام ەتنوگرافيالىق ەكسپوناتتار قويىلعان.
كورمە دالادا كوشپەلى ءومىر سۇرگەن تۇركى حالىقتارىنىڭ داستۇرلەرىن مۇرا ەتكەن قازاقستاننىڭ ءومىرى تۋرالى تۇسىنىك بەرەدى. سونداي-اق قازاقتاردىڭ ءداستۇرلى مادەنيەتى, تىرشىلىكتى قامتاماسىز ەتۋ جۇيەسى, شارۋاشىلىق جانە تۇرمىس سالتى, رۋحاني مادەنيەتى تۋرالى باياندايدى.
ءىس-شاراعا قازاقستاننىڭ ەلشىسى باقىت دۇيسەنباەۆ, الماتى قالاسى مادەنيەت باسقارماسىنىڭ باسشىسى عاني مايلىباەۆ, الماتى قالاسى مۇراجايلار بىرلەستىگىنىڭ ديرەكتورى ءلاززات ساعىندىقوۆا, سەۋل تاريحى مۇراجايىنىڭ ديرەكتورى كيم يونگ سوك, سەۋل قالالىق كەڭەسىنىڭ, ديپكورپۋستىڭ, بيزنەس توپتاردىڭ, جۇرتشىلىق پەن باق وكىلدەرى قاتىستى.
قۇتتىقتاۋ سوزىندە ب. دۇيسەنباەۆ بۇل كورمەنىڭ اشىلۋى ەكى مەملەكەت اراسىنداعى ديپلوماتيالىق قاتىناستاردىڭ ورناعانىنا 30 جىل تولۋ اياسىندا وتكىزىلىپ جاتقان ەڭ جارقىن ءىس-شارالاردىڭ ءبىرى ەكەنىن اتاپ ءوتتى.
