ANTIKOR • 08 جەلتوقسان، 2022

كومپلاەنس قىزمەتىنىڭ قىر-سىرى

9 جەلتوقسان – حالىقارالىق سىبايلاس جەمقورلىققا قارسى كۇرەس كۇنى قارساڭىندا سىبايلاس جەمقورلىققا قارسى ءىس-قيمىل اگەنتتىگى مەن «سامۇرىق-قازىنا» قورىنىڭ ماماندارى مەكەمەنىڭ سىبايلاس جەمقورلىققا قارسى كومپلاەنس قىزمەتىنىڭ جۇمىسى تۋرالى بريفينگ وتكىزدى.

گۇلنار جولجان

ەلىمىز جەمقورلىققا جول بەرمەيتىن مەملەكەت قۇرۋدى كوزدەپ وتىر، وسىعان وراي وسى قىلمىسقا قارسى ءىس-قيمىل ساياساتىن جان-جاقتى جۇرگىزىپ كەلەدى. اسىرەسە سوڭعى كەزدەرى حالىقارالىق ستاندارتتار نەگىزىندە قوعامنىڭ اتالعان كەسەلىمەن كۇرەسۋ مىقتاپ قولعا الىندى.

سىبايلاس جەمقورلىققا قارسى ءىس-قيمىل اگەنتتىگى پرەۆەنتسيا قىزمەتىنىڭ باسشىسى سايان احمەتجانوۆتىڭ ايتۋىنشا، قازىر مەملەكەتتىك، كۆازيمەملەكەتتىك ورگاندار، كورپوراتيۆتىك، كوممەرتسيالىق سەكتورلار الەمدىك تاجىريبەدە سىنالىپ، سىبايلاس جەمقورلىققا قارسى كۇرەستە ءتيىمدى بولعان ISO 37001 «پاراقورلىقپەن كۇرەس مەنەدجمەنتى جۇيەسى» حالىقارالىق ستاندارتىن ەنگىزىپ كەلەدى. اتالعان ستاندارت سىبايلاس جەمقورلىق تاۋەكەلدەرىن بارىنشا ازايتۋعا مۇمكىندىك بەرەدى. بۇل ستاندارتتى ەنگىزگەن كەز كەلگەن ۇيىم «پاراساتتى كومپانيا» مارتەبەسىنە يە بولادى، سەبەبى مەكەمەلەردەگى كومپلاەنس قىزمەتكەرلەر جەمقورلىقتىڭ الدىن الۋ ءىس-شارالارىن جۇرگىزىپ، ونى بولدىرماۋدىڭ ارەكەتىن جاسايدى. سەبەبى ولاردىڭ قىزمەتى مەكەمەنىڭ ىشكى قۇجاتتارىن رەتتەپ، دۇرىس باعىتقا قويىپ، سىبايلاس جەمقورلىققا قارسى تاۋەكەلدەردى تومەندەتۋگە باعىتتالعان.

«سوڭعى ەكى جىلدا ەلىمىزدە 185 سىبايلاس جەمقورلىق قىلمىسى تىركەلدى. 2021 جىلى 89، وسى جىلدىڭ ون ايىندا 96 سىبايلاس جەمقورلىق قىلمىسى انىقتالدى. ونىڭ باسىم بولىگى – مەملەكەتتىك باعدارلامالاردى جۇزەگە اسىرۋ بارىسىندا قارجى جىمقىرۋ، پارا الۋ فاكتىلەرى»، دەدى سايان احمەتجانوۆ.

ال «سامۇرىق-قازىنا» قورىنىڭ كومپلاەنس قىزمەتىنىڭ باسشىسى داۋرەن اقشالوۆ: «سىبايلاس جەمقورلىق ءىس-شارالارىن بولدىرماۋدى ەڭ الدىمەن، مەكەمە باسشىلارى ءتۇسىنىپ، قولعا الۋى قاجەت. قازىر ەلىمىزدە 6118 سىبايلاس جەمقورلىققا قارسى كومپلاەنس قىزمەتى بار. ونىڭ 345-ءى – ورتالىق مەملەكەتتىك، 5619-ى جەرگىلىكتى اتقارۋشى ورگاندا جانە 154-ءى ۇلتتىق كومپانيالاردا جۇمىس ىستەيدى. «سامۇرىق-قازىنا» قورى جەمقورلىق تاۋەكەلدەرى بار قىزمەت تۇرلەرىنەن باس تارتا باستادى. ماسەلەن، بيىل بىزدەر ستاندارتقا سايكەس كەلمەيتىن بىرنەشە كومپانيامەن ەڭبەك شارتىن بۇزدىق»، دەدى.

سونىمەن قاتار س.احمەتجانوۆ كومپلاەنس وفيتسەرلەر دايىنداۋدىڭ ماڭىزىن اتاپ ءوتتى. ونىڭ ايتۋىنشا، كومپلاەنس وفيتسەرلەر ءاربىر مەكەمەگە قاجەت. «ۇيىمدارداعى كومپلاەنس قىزمەتتىڭ 80 پايىزى سىبايلاس جەمقورلىقتىڭ الدىن الۋدى كوزدەيدى، ال قالعان 20 پايىزى جازالاۋ شارالارى»، دەدى ول.

جالپى، كۆازيمەملەكەتتىك كومپانيالاردا سىبايلاس جەمقورلىققا قارسى كومپلاەنستى ەنگىزۋ بويىنشا مىندەت 2019 جىلدىڭ سوڭىنان باستاپ زاڭنامالىق تۇرعىدان ەنگىزىلگەن ەدى، ونىڭ باستى ماقساتى – كورپوراتيۆتىك ادالدىق ستاندارتتارىنىڭ ساقتالۋىن باقىلاۋ.