مەديتسينا • 07 جەلتوقسان، 2022

500 مىڭنان استام استانالىق كۆي-گە قارسى ۆاكتسينا الدى

قازىرگى ۋاقىتتا حالىقتى كوروناۆيرۋسقا قارسى يممۋنداۋ ءۇشىن ەلوردادا 12 مىڭعا جۋىق ۆاكتسينا بار، دەپ حابارلايدى Egemen.kz.

جانبولات كەنجەعۇل

مەديتسينالىق-سانيتاريالىق العاشقى كومەك كورسەتۋ (مساك) ۇيىمدارىندا 34 ەگۋ كابينەتى جۇمىس ىستەيدى. ۆاكتسيناتسيانىڭ ماڭىزدىلىعى جانە حالىقتى يممۋنداۋدىڭ قالاي جۇرگىزىلەتىنى تۋرالى ونلاين-بريفينگتە قالالىق قوعامدىق دەنساۋلىق ساقتاۋ باسقارماسى باسشىسىنىڭ ورىنباسارى بەرىك قايكەنوۆ ايتتى.

بۇگىندە ەلوردانىڭ التى ينفەكتسيالىق ستاتسيونارىندا كوروناۆيرۋس پەن كوۆيد پنەۆمونياسىنان 105 پاتسيەنت ەمدەلۋدە. ولاردىڭ جۇكتەمەسى 53،8% قۇرايدى. رەانيماتسيا بولىمشەسىندە 7 پاتسيەنت ەم الىپ جاتىر.

امبۋلاتوريالىق دەڭگەيدە مساك ۇيىمدارىندا 170 ادام ەمدەلۋدە.

«2 اپتا ىشىندە كوروناۆيرۋستىق ينفەكتسيامەن سىرقاتتانۋ دەرەكتەرىنىڭ ءوسۋىنىڭ نەگىزگى سەبەبى - كوروناۆيرۋستىق ينفەكتسياعا قارسى يممۋنيتەتى بار ادامدار ۇلەسىنىڭ تومەندەۋى. ياعني ۆاكتسيناتسيالانعان ادامدار مەن سوڭعى 6 ايدا اۋىرىپ، انتيدەنەلەر سانىنىڭ جوعارى دەڭگەيى بار ادامدار سانى ازايدى. سوندىقتان ۋاقىتىلى رەۆاكتسيناتسيادان ءوتۋ قاجەت»، دەپ ءتۇسىندىردى ب. قايكەنوۆ.

ەلوردادا كۆي-گە قارسى ۆاكتسينانىڭ ءبىرىنشى كومپونەنتىمەن 537 863 ادام ەگىلدى، 520 822 ادام تولىق يممۋنداۋدان ءوتتى. رەۆاكتسيناتسيالانعانداردىڭ سانى 169 مىڭ ادام.

بەرىك قايكەنوۆ كوروناۆيرۋسقا قارسى ۆاكتسيناتسيا ەڭ كۇشتى پروفيلاكتيكالىق شارا بولعانىن جانە سولاي بولىپ قالا بەرەتىنىن اتاپ ءوتتى. ۆاكتسينا اۋرۋدىڭ اۋىر وتۋىنەن، اسقىنۋلاردان جانە ولىمنەن قورعايدى.

«ۋاقىتىلى ۆاكتسيناتسيالاۋ جانە رەۆاكتسيناتسيالاۋ كەزىندە ادام 90 پايىزدان استام جاعدايدا اۋرۋدىڭ اۋىر اسەرىنەن قورعالادى. قازىرگى ۋاقىتتا حالىقتى كوروناۆيرۋستان يممۋنداۋ ءۇشىن ەلوردادا 12 مىڭعا جۋىق ۆاكتسينا بار. سونىمەن قاتار مساك ۇيىمدارىندا 34 ەگۋ كابينەتى جۇمىس ىستەيدى»، دەدى سپيكەر.