ەۋرازيالىق ەكونوميكالىق وداق ىشكى نارىق سىيىمدىلىعىن كەڭەيتەدى

استانا. 4 ماۋسىم. ەۋرازيالىق ەكونوميكالىق وداقتىڭ ىقپالىمەن ىشكى نارىق سىيىمدىلىعىن كەڭەيتۋگە جول اشىلادى. ورتالىق كوممۋنيكاتسيالار قىزمەتىندە وتكەن بريفينگتە پارلامەنتى سەناتىنىڭ دەپۋتاتى اقان بيجانوۆ وسىلاي دەدى. بۇل تۋرالى «قازاقپارات» حابارلادى. اقان بيجانوۆ: «ەاەو-نى قۇرۋ ىشكى نارىق سىيىمدىلىعىن ايتارلىقتاي ارتتىرا تۇسەدى. «ۇشتىك» ەلدەرىنىڭ ورتاق نارىعىنىڭ كولەمى 2,5 ترلن. دوللاردى, جالپى وندىرىستىك الەۋەتى 600 ملرد. دوللاردى قۇرايدى. ال ادامي رەسۋرس 168 ملن.-نان اسادى», – دەدى. سەناتوردىڭ ايتۋىنشا, ىشكى ەكونوميكالىق شەكتەۋلەردى الىپ تاستاۋ, بىرىڭعاي تاريفتىك ساياسات ەنگىزۋ سىندى كوپتەگەن ءتيىمدى ارەكەتتەر وتاندىق وندىرۋشىلەر ءۇشىن وتكىزۋ نارىعىن ۇلعايتا تۇسەدى. سونداي-اق, ول: «ءۇش ەلدىڭ بيزنەس ورتاسى مەملەكەتتىك ساتىپ الۋ جۇيەسىنە تەڭ قولجەتىمدىلىككە يە بولادى. بۇل ءوز كەزەگىندە تاۋارلار مەن قىزمەتتەر جەتكىزۋدەگى زور نارىققا جول اشادى. ماسەلەن, تەك وتكەن جىلدىڭ وزىندە رەسەي مەن بەلارۋستىڭ مەملەكەتتىك ساتىپ الۋ نارىعى 198 ملرد. دوللاردى قۇراعان», – دەدى. جولدىباي بازار. دەرەككوز: «قازاقپارات». فوتو: today.kz.