قىرعىزستاندا ەۋرازيا ۇلتتىق ۋنيۆەرسيتەتىنىڭ فيليالى اشىلدى

وندا ەۇۋ مامانداردىڭ ساپالى دايارلىعىن قامتاماسىز ەتىپ، حالىقارالىق عىلىمي جانە ءبىلىم بەرۋ سالاسىنداعى ىنتىماقتاستىقتى بەلسەندى دامىتادى. ۇلتتىق ۋنيۆەرسيتەت 2024 جىلدىڭ سوڭىنا دەيىن شەتەلدە تاعى ءبىر فيليال اشۋدى جوسپارلاپ وتىر.

ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ فيليالى وش قالاسىندا قۇرىلدى. ونىڭ رەسمي اشىلۋ راسىمىنە ەۇۋ-ءنىڭ عىلىم، كوممەرتسيالاندىرۋ جانە ينتەرناتسيونالداندىرۋ جونىندەگى پرورەكتورى جاننا قۇرمانعاليەۆا، وش مەملەكەتتىك ۋنيۆەرسيتەتىنىڭ رەكتورى قۇدايبەردى قوجوبەكوۆ، قازاقستان رەسپۋبليكاسىنىڭ وش قالاسىنداعى كونسۋلى مۇحتار كارىباي، وقىتۋشىلار مەن ستۋدەنتتەر قاتىستى.

«ەۇۋ فيليالىنىڭ اشىلۋى ءبىزدىڭ ەلدەر اراسىنداعى دوستىق پەن تاتۋ كورشىلىكتىڭ، ءبىلىم جانە عىلىممەن قاتار بارلىق سالادا ىنتىماقتاستىقتى ارتتىرۋعا ءوزارا ۇمتىلىستىڭ ارقاسىندا مۇمكىن بولىپ وتىر. كادرلاردى جوعارى ساپادا دايارلاۋ، ناتيجەلى عىلىم، باسەكەگە قابىلەتتى پاتريوت جاستار باۋىرلاس حالىقتارىمىزدىڭ، جالپى ءوڭىردىڭ بولاشاعى ءۇشىن ۋنيۆەرسيتەتتەردىڭ ەلەۋلى ۇلەسى بولماق. فيليال قازاقستان مەن قىرعىزستاننىڭ ەڭ دارىندى ستۋدەنتتەرى مەن عالىمدارىن تارتادى دەپ ۇمىتتەنەمىن. بۇل باعىتتا ەۇۋ حالىقارالىق ءبىلىم بەرۋ نارىعىندا ءوزىنىڭ باسەكەگە قابىلەتتىلىگىن تۇراقتى تۇردە ارتتىرىپ كەلەدى. ءبىزدىڭ ۋنيۆەرسيتەت QS World University Ranking رەيتينگىندە الەمنىڭ ۇزدىك 300 جوعارى وقۋ ورىندارىنىڭ قاتارىنا كىرىپ، 277 ورىندى يەلەندى. جاقىندا ەۇۋ زەرتتەۋ ۋنيۆەرسيتەتى مارتەبەسى بەرىلدى. بۇل ءوز كەزەگىندە عىلىمي-اكادەميالىق كوللابوراتسيا مۇمكىندىكتەرىن كەڭەيتەدى»، دەپ اتاپ ءوتتى ەۇۋ پرورەكتورى جاننا قۇرمانعاليەۆا.

بۇگىندە ەۇۋ فيليالىندا 30-عا جۋىق ستۋدەنت ءبىلىم الۋدا. ولار اعاشقى ەكى كۋرستى وش قالاسىندا، كەيىنگى ەكى جىلدا قازاقستاندا تاڭداعان كاسىپتەرىن مەڭگەرەدى. وقۋ باعدارلاماسى اياسىندا قىرعىز جاستارى قازاق ءتىلىن مەڭگەرۋدە. كەلەسى جىلى «قازاقستان تاريحى» ءپانىن ەنگىزۋ جوسپاردا بار. فيليالدا جوعارى كاسىبي ءبىلىم بەرۋدىڭ ەكى باعىتى بويىنشا مامانداردى دايارلاۋ جۇرگىزىلەدى: «اۋدارما ءىسى» جانە «ورىس ءتىلى مەن ادەبيەتى».

الداعى ۋاقىتتا جاراتىلىستانۋ عىلىمى، فيزيكا جانە IT باعىتىندا ءبىلىم بەرۋ باعدارلامالارىنىڭ سانىن كوبەيتۋ جوسپارلانۋدا.

«ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ فيليالى باۋىرلاس حالىقتار اراسىنداعى دوستىقتىڭ تاعى ءبىر كوپىرىنە اينالادى، قازاقستان مەن قىرعىزستاننىڭ ءبىلىم بەرۋ جۇيەلەرىنىڭ ينتەگراتسياسىنا ىقپال ەتەدى. سونىمەن بىرگە بۇل ءبىزدىڭ جوعارى وقۋ ورىندارى اراسىنداعى ىنتىماقتاستىقتى ساپالى جاڭا دەڭگەيگە كوتەرەدى»، دەپ اتاپ ءوتتى وش مەملەكەتتىك ۋنيۆەرسيتەتىنىڭ رەكتورى قۇدايبەردي قوجوبەكوۆ.

ەۇۋ عىلىمي-ءبىلىم بەرۋ جوبالار، اكادەميالىق ۇتقىرلىق باعدارلامالار، بىرلەسكەن ءبىلىم بەرۋ باعدارلامالارى، شەتەلدىك مامانداردى تارتۋ بويىنشا قىرعىز ارىپتەستەرىمەن بىرلەسە بەلسەندى جۇمىس جۇرگىزەدى.

بيىلعى وقۋ جىلىندا ۋنيۆەرسيتەتتىڭ «Welcome to ENU» اكادەميالىق ۇتقىرلىق باعدارلاماسى اياسىندا قىرعىزستاننان 46 ستۋدەنت ءبىلىم الۋدا.

ايتا كەتۋ كەرەك، بۇگىندە ل.ن.گۋميلەۆ اتىنداعى ەۇۋ-دىڭ الەم بويىنشا 12 ورتالىعى مەن وكىلدىگى بار. سونداي-اق ۇلتتىق ۋنيۆەرسيتەت 450-دەن استام جەتەكشى شەتەلدىك ۋنيۆەرسيتەتتەرمەن حالىقارالىق ىنتىماقتاستىق ورناتقان.