ايماقتار • 06 جەلتوقسان، 2022

قاراعاندىلىق كاسىپكەرلەر 50 ميلليون تەڭگەگە دەيىن نەسيە الا الادى

قاراعاندى وبلىسىنىڭ كاسىپكەرلەرى قوسىمشا مەملەكەتتىك قولداۋعا يە بولادى. وسى ماقساتتا وبلىستا ارنايى «كاسىپكەر» باعدارلاماسى ازىرلەندى. مونوقالالار مەن وبلىس ورتالىعىنىڭ شاعىن جانە ورتا بيزنەس وكىلدەرى بيزنەسىن دامىتۋ ءۇشىن جەڭىلدىكپەن نەسيە الا الادى، دەپ حابارلايدى Egemen.kz.

ايانا توعانبەك

كاسىپكەرلەردىڭ وتىنىشتەرىن قابىلداۋ جەلتوقسان ايىنىڭ ەكىنشى جارتىسىندا باستالادى. باعدارلامانى ىسكە قوسۋعا 500 ميلليون تەڭگە ءبولىندى. ونىڭ جارتىسى قاراعاندى وبلىسىنىڭ اكىمدىگىنە، قالعان 250 ميلليون تەڭگە «دامۋ» قورىنا ءبولىندى. 2023 جىلى نەسيە پورتفەلىن ميلليارد تەڭگەگە جەتكىزۋ جوسپارلانۋدا.

ء«بىر كاسىپكەرگە بەرىلەتىن نەسيە سوماسى جىلدىق 5 پايىزبەن 50 ميلليون تەڭگەدەن اسپايدى. نەسيە مەرزىمى 5 جىلعا دەيىن. كەپىلدىك جەتكىلىكسىز بولعان جاعدايدا «دامۋ» قورى نەسيە سوماسىنىڭ 85%-عا دەيىن ءىشىنارا نەسيەگە كەپىلدىك بەرۋ قۇرالىنا مەملەكەتتىك قولداۋ كورسەتەدى»، دەدى كاسىپكەرلىك ءبولىمىنىڭ باسشىسى نۇرلان ءالىمجانوۆ.

نەسيە بەرۋ «بانك تسەنتركرەديت» جانە Bank RBK ارقىلى وتەدى.

كولىك جانە قويمالاۋ; تۇرۋ جانە تاماقتاندىرۋ قىزمەتتەرى; اقپارات جانە كوممۋنيكاتسيا; كاسىپتىك، عىلىمي جانە تەحنيكالىق قىزمەت; جالعا بەرۋ; تۋروپەراتورلار، تۋراگەنتتەر جانە تۋريزم سالاسىندا قىزمەت كورسەتەتىن باسقا دا ۇيىمدار; ءبىلىم بەرۋ; دەنساۋلىق ساقتاۋ جانە الەۋمەتتىك قىزمەتتەر; سپورت، دەمالىس جانە ويىن-ساۋىق; كومپيۋتەرلەردى، جەكە زاتتار مەن تۇرمىستىق زاتتاردى جوندەۋ; باسقا دا جەكە قىزمەتتەردى كورسەتۋ دەگەن سالالارداعى كاسىپكەرلەر جەڭىلدەتىلگەن نەسيەنى الا الادى.

نۇرلان ءالىمجانوۆتىڭ ايتۋىنشا، بۇل سالالارداعى كاسىپكەرلەردى قولداۋ جەرگىلىكتى ءوندىرىستى كەڭەيتىپ، كاسىپكەرلىك بەلسەندىلىكتى ارتتىرادى.