– بەرىك نوعاي ۇلى, جۋىردا «پروكۋراتۋرا تۋرالى» جاڭا زاڭ قابىلدانىپ, قۇجاتقا كونستيتۋتسيالىق مارتەبە بەرىلدى. پروكۋرورلار مارتەبەسىنىڭ ارتۋى – جوعارى قاداعالاۋ ورگانى جاڭا قازاقستان قالىپتاستىرۋدىڭ نەگىزگى تەتىكتەرىنىڭ ءبىرى بولادى دەگەن ءسوز. وسى ورايدا ەگەمەن ەلىمىزدىڭ جوعارى قاداعالاۋ ينستيتۋتىنىڭ دامۋ جولدارىنا, بۇگىنگى پروكۋراتۋرانىڭ ميسسياسىنا توقتالا كەتسەڭىز.
– راسىندا, پروكۋراتۋرانىڭ ءتول تاريحى بار. ءار كەزەڭ تالابىنا ساي مىندەتتەر قويىلدى. وكىلەتتىكتەر كولەمى وزگەرىپ وتىردى. بىراق قاي ۋاقىتتا دا پروكۋراتۋرانىڭ باستى فۋنكتسياسى وزگەرگەن جوق. ول – بارلىق سالادا زاڭدىلىقتى قامتاماسىز ەتۋ.
پروكۋراتۋرانىڭ باستى ميسسياسى – ادامدى, ونىڭ ءومىرىن, قۇقىقتارى مەن بوستاندىقتارىن قورعاۋ. كونستيتۋتسيادا نەگىزگى ءۇش فۋنكتسيا كورسەتىلگەن: زاڭدىلىقتىڭ ساقتالۋىن جوعارى قاداعالاۋ, سوتتا مەملەكەت مۇددەسىن ءبىلدىرۋ, قىلمىستىق قۋدالاۋ.
تاۋەلسىزدىك جىلدارى, پروكۋراتۋرا كەڭەستىك جازالاۋ ورگانىنان قۇقىق قورعاۋ ينستيتۋتىنا اينالدى. ونىڭ قوعامدىق ورنى جاڭعىردى. ەگەمەندى ەلىمىزدى قالىپتاستىرۋدىڭ بارلىق نەگىزگى قۇجاتتارىندا پروكۋراتۋرانىڭ ءرولى مەن قىزمەتتەرى ناقتى كورسەتىلىپ وتىردى. مىسالى, ەلىمىزدىڭ ءبىرىنشى ەڭ جوعارعى ساياسي قۇجاتى – 1990 جىلعى 25 قازانداعى مەملەكەتتىڭ ەگەمەندىگى تۋرالى دەكلاراتسيادا رەسپۋبليكا اۋماعىندا زاڭداردىڭ دالمە-ءدال جانە بىركەلكى ورىندالۋىن پروكۋراتۋرا قاداعالايدى دەپ كورسەتىلدى.
1991 جىلى 6 جەلتوقساندا پروكۋراتۋرا ورگاندارىنىڭ بىرىڭعاي جۇيەسىن قۇرۋ, ولاردىڭ دەربەستىگىن جانە تاۋەلسىزدىگىن قامتاماسىز ەتۋ تۋرالى جوعارعى كەڭەستىڭ قاۋلىسى قابىلدانىپ, ەلىمىزدىڭ قاداعالاۋ ورگانى تاريحىندا جاڭا بەلەس باستالدى. وسى كۇننەن باستاپ قازاقستان پروكۋراتۋراسى كەڭەس وداعى پروكۋراتۋراسىنىڭ قۇرامىنان شىعىپ, دەربەس مارتەبە الدى. سول كۇن-
نەن بەرى, مىنە, وتىز ءبىر جىل ءوتتى.
بۇگىندە 6 جەلتوقسان كاسىبي مەرەكە كۇنى رەتىندە اتالىپ, تاۋەلسىز قازاقستاننىڭ قاداعالاۋ ورگانىنىڭ تاريحى باستاۋ العان كۇنى دەپ سانالادى. جوعارى قاداعالاۋ جۇيەسىنىڭ قالىپتاسۋ جولىنداعى كەلەسى قادام – 1993 جىلعى ەلىمىزدىڭ ءبىرىنشى كونستيتۋتسياسىنىڭ قابىلدانۋى بولدى. وندا پروكۋراتۋراعا ارنالعان جەكە تاراۋدا زاڭداردىڭ دالمە-ءدال جانە بىركەلكى ورىندالۋىن قاداعالاۋدى جۇزەگە اسىرادى دەپ بەكىتىلدى.
1995 جىلعى كونستيتۋتسياعا كەلسەك, ول پروكۋراتۋرا مارتەبەسىن ناقتى انىقتاپ, پرەزيدەنتكە تىكەلەي ەسەپ بەرەتىن ورگان رەتىندە بەكىتتى. وتكەن ۋاقىت ىشىندە پروكۋراتۋرا قىزمەتكەرلەرى كاسىبي بورىشتارىن ءمىنسىز ورىنداپ كەلەدى.
مىنانى ەسكەرە كەتكەن ءجون بولار, پروكۋراتۋرا – ەڭ ءبىرىنشى قۇرىلعان ۇلتتىق ورگانداردىڭ ءبىرى. ويتكەنى ەلىمىزگە سەنىمدى قۇقىقتىق قالقان كەرەك بولدى.
جاس مەملەكەت الدىندا كوپتەگەن سىناق تۇردى. وتپەلى كەزەڭدە ەلىمىزدى ساقتاپ قالۋ, اياققا تۇرىپ كەتۋ ەڭ ماڭىزدى ماسەلە ەدى. قىلمىس ءورشىپ كەتتى. ءوندىرىس توقتاپ قالدى. جاپپاي جۇمىسسىزدىق. جالاقى, زەينەتاقى ۋاقىتىندا تولەنبەدى. وسىنداي قيىن ۋاقىتتا پروكۋراتۋرا قوعامدا زاڭدىلىق پەن ءتارتىپتى بەكىتۋگە كۇش سالدى. ياعني ەلىمىز ءۇشىن اۋىر دا جاۋاپتى كەزەڭدە پروكۋراتۋرا قىلمىسپەن, اسىرەسە ونىڭ ۇيىمداسقان تۇرىمەن كۇرەستە ەلىمىزدىڭ بارلىق قۇقىق قورعاۋ قۋاتىن بىرىكتىرىپ, مەملەكەتتىك م ۇلىكتى جەكەشەلەندىرۋدىڭ زاڭدىلىعىن, مەملەكەت يەلىگىنەن الۋ كەزىندە ونى زاڭسىز قول سۇعۋدان قورعاۋدى ەرەكشە باقىلاۋىنا الدى.
– قازاقستان پروكۋراتۋراسىن العاش باسقارعان ازاماتتار كىمدەر ەدى؟
– قازاق جەرىندە 1922 جىلى پروكۋراتۋرا العاش قۇرىلعاندا ءبىرىنشى ادىلەت حالىق كوميسسارى ءارى رەسپۋبليكا پروكۋرورى بولعان شافحات بەكمۇحامەدوۆتىڭ ەسىمى ەسكەرۋسىز قالماۋعا ءتيىس. سونىمەن قاتار قازاق كسر-ءنىڭ ءبىرىنشى پروكۋرورى سۇلەيمەن ەسقاراەۆتىڭ ەسىمى ءبىز ءۇشىن قىمبات.
تاۋەلسىزدىك تاريحىنا كەلسەك, جاڭا ۇلگىدەگى پروكۋراتۋرانى قالىپتاستىرۋعا قازاقستاننىڭ باس پروكۋرورلارى – جارماحان تۇياقباي, ماقسۇت نارىكباەۆ, ستەپان شۋتكين, يۋري حيترين, راشيد تۇسىپبەكوۆ, قايرات ءمامي جانە باسقالارى ەرەن ەڭبەك ءسىڭىردى.
ءتول تاريحىمىزداعى ورنى بولەك تۇلعا – وتەگەن سەيىتوۆ. كەلەسى جىلى وتەگەن سەيىتوۆتىڭ 100 جىلدىق مەرەيتويىن اتاپ ءوتۋدى جوسپارلاپ وتىرمىز. بۇل باستامانى ارداگەرلەرىمىز دە قولدادى.
جالپى, ارداگەرلەرىمىزگە دەگەن ىقىلاسىمىز شەكسىز. قازىر پروكۋراتۋرا ارداگەرلەرىنىڭ جالپى سانى 1 700-دەن استام. ولار پروكۋراتۋرا ورگاندارىنىڭ ارداگەرلەرى وداعىن قۇرىپ, ءالى كۇنگە دەيىن جوعارى قاداعالاۋدىڭ ورىستەۋىنەن قول ۇزگەن ەمەس.
– قازىرگى كەزدە پروكۋراتۋرانىڭ الەۋەتى قانداي؟
– بۇگىنگە كەلسەك, قاداعالاۋ پوتەنتسيالى نىعايدى. پروكۋراتۋرا حالىقارالىق ستاندارتتار نەگىزىندە دامىپ كەلەدى. بۇل الدىمەن – تاۋەلسىزدىك ءپرينتسيپى, قاداعالاۋ قىزمەتىنە ارالاسۋعا جول بەرمەۋ. باستى نازارىمىزدا ادام قۇقىعىن قورعاۋ تۇر. پروكۋراتۋرانىڭ باستى ءبىر فۋنكتسياسى – سوتتا مەملەكەتتىك ايىپتاۋدى قولداۋ, ياعني سوتتا زاڭدىلىقتىڭ ساقتالۋىن قامتاماسىز ەتۋ, كىناسى جوق ادامدى قىلمىستىق جاۋاپقا تارتۋعا جول بەرمەۋ.
تەك سوڭعى ەكى جىلدا پروكۋرورلاردىڭ باستاماسىمەن سوتتاردا 257 سوتتالعان ادامنىڭ جازاسى قىسقاردى نەمەسە جەڭىل جازاعا اۋىسىپ, 57 ادام تولىق اقتالدى. ونىڭ ۇستىنە, حالىقارالىق سالاعا ۇلكەن كوڭىل بولۋدەمىز. بۇل باعىتتاعى نەگىزگى جۇمىسىمىز – باسقا ەلدە جاسىرىنىپ جۇرگەن قىلمىسكەرلەردى الدىرۋ, شەتەلدە جازاسىن وتەپ جاتقان ازاماتتارىمىزدى ەلگە قايتارۋ, وزگە مەملەكەتتەرگە قىلمىستىق ىستەر بويىنشا قۇقىقتىق كومەك كورسەتۋ.
وسى ماسەلەلەر بويىنشا شەتەلدەرمەن حالىقارالىق شارتتار جاساۋ وڭ جولعا قويىلدى. بۇگىندە 34 ەلمەن 72 حالىقارالىق شارتقا قول قويىلدى. ونىڭ ىشىندە قىتاي, اقش, ۇلىبريتانيا, ءۇندىستان, برازيليا سياقتى ءىرى مەملەكەتتەر بار. بۇۇ-نىڭ قىلمىسپەن كۇرەس, ادام قۇقىقتارىن قورعاۋ تۋرالى نەگىزگى كونۆەنتسيالارىنا قوسىلدىق. قازىر ەۋروپا كەڭەسىنىڭ قىلمىستىق سوت تۋرالى كونۆەنتسيالارىنا قوسىلۋدى قاراستىرىپ جاتىرمىز.
– سوڭعى جىلدارى قىلمىستىق رەفورمالاۋ باعىتىندا قانداي وزگەرىستەر بار؟ جالپى, قىلمىستىق پروتسەستەگى پروكۋروردىڭ ءرولى قانداي؟
– بۇگىندە قىلمىستىق پروتسەسكە ءۇش بۋىندى مودەل ەنگىزىلدى. ۇلگى رەتىندە دامىعان ەلدەردىڭ تاجىريبەسى الىندى. بۇل ءبىزدىڭ ستراتەگيالىق باعىتىمىز دەپ ايتۋعا بولادى. مودەلدىڭ باستى ماقساتى – تەرگەۋ ورگاندارى, پروكۋراتۋرا جانە سوت اراسىندا قۇزىرەتتەردى ناقتى ءبولۋ.
جاڭا ءتارتىپ قىلمىستىق پروتسەستە 2 جىلدان بەرى قولدانىلىپ كەلەدى. 2021 جىلدان بەرى تەرگەۋدىڭ نەگىزگى شەشىمدەرى پروكۋرور كەلىسىم بەرسە عانا زاڭدى بولىپ ەسەپتەلەدى. ناتيجەسى جاقسى. تەرگەۋ كەزىندە زاڭ بۇزۋشىلىق ازايدى. 2 جىلدا پروكۋرورلار 700 مىڭنان استام شەشىمدى بەكىتىپ, 77 مىڭ زاڭسىز شەشىمدى قايتاردى. بيىلدان باستاپ تەرگەۋدىڭ باستى قۇجاتى – ايىپتاۋ اكتىسىن پروكۋرور ءوزى جازىپ, بەكىتەتىن بولدى.
قىلمىستىق سالانى تسيفرلاندىرۋ دا ءبىزدىڭ ماڭىزدى جەتىستىگىمىز. بۇگىندە قىلمىستىق ىستەردىڭ 90 پايىزى ەلەكتروندى تۇردە تەرگەلەدى. بۇل فالسيفيكاتسياعا جول بەرمەيدى. ەڭ باستىسى, قىلمىستىق پروتسەستىڭ جىلدامدىعى ارتتى.
– باس پروكۋرورمەن سۇحباتتاسىپ وتىرىپ, قاڭتار وقيعاسىنان اينالىپ وتە المايمىز. «قاسىرەتتى قاڭتارعا» قاتىستى ىستەردى تەرگەۋ قالاي ءجۇرىپ جاتىر؟ سوتتاردا قانشا ءىس قارالدى؟ كىنالى ادامدارعا قانداي جازا تاعايىندالدى؟
– قاڭتار وقيعاسى بويىنشا 5 مىڭنان استام ءىس قوزعالدى. كوپشىلىگى سوتقا جولداندى. بۇگىندە 1 مىڭنان اسا ادامعا سوت ۇكىمى شىعارىلدى. ءماسىموۆ پەن ۇلتتىق قاۋىپسىزدىك كوميتەتىنىڭ باسقا باسشىلارىنا جانە بۇرىنعى قورعانىس ءمينيسترى بەكتانوۆقا قاتىستى ىستەر قازىر سوت قاراۋىندا جاتىر. ولار مەملەكەتكە وپاسىزدىق, بيلىكتى اسىرا پايدالانۋ بويىنشا ايىپتالۋدا.
ازاپتاۋ تۋرالى ىشكى ىستەر جانە ۇلتتىق قاۋىپسىزدىك ورگاندارىنىڭ 29 قىزمەتكەرىن تەرگەۋ اياقتالدى. الماتى قالاسى, الماتى, قىزىلوردا وبلىستارى ۇلتتىق قاۋىپسىزدىك دەپارتامەنتتەرى, الماتى وبلىسى پوليتسيا دەپارتامەنتىنىڭ بۇرىنعى باسشىلارى تەرگەۋ ماتەريالدارىمەن تانىسىپ جاتىر.
– بەرىك نوعاي ۇلى, قاڭتار وقيعالارىنا قاتىسقان قانشا ادامعا راقىمشىلىق جاسالادى؟ كىمدەر راقىمشىلىققا ىلىنبەيدى, ولارعا قانداي تالاپتار قويىلادى؟
– ارينە, قاڭتاردا ەلىمىزدىڭ تاۋەلسىزدىگى, تۇتاستىعى, ۇلتتىق قاۋىپسىزدىگىنە قاتەر ءتوندى. وسىنىڭ بارىنە قاراماستان پرەزيدەنت باتىل قادامعا بارىپ, جاپپاي تارتىپسىزدىك كەزىندە قىلمىس جاساعاندارعا راقىمشىلىق بەرۋ تۋرالى شەشىم قابىلدادى. قازىر امنيستيا ءجۇرىپ جاتىر.
راقىمشىلىق شامامەن 1,5 مىڭعا جۋىق ادامدى قامتيدى. بۇگىندە ولاردىڭ جارتىسىنا امنيستيا جاسالدى. راقىمشىلىق تۋرالى زاڭنىڭ بىرقاتار ەرەكشەلىگى بار. قىلمىستىق كودەكستىڭ راقىمشىلىققا جاتاتىن ناقتى باپتارى جانە كەزەڭى بەكىتىلدى. ولار – قاڭتار ايىندا بولعان قىلمىستار. سول كۇندەرى تارتىپسىزدىك جاپپاي ورىن الدى.
تەرروريزم, ەكسترەميزم, جاپپاي تارتىپسىزدىكتى ۇيىمداستىرعان, ازاپتاۋمەن ايىپتالعان ادامدار, رەتسيديۆيستەر راقىمشىلىققا جاتپايدى. ونشا اۋىر ەمەس, اۋىرلىعى ورتاشا قىلمىس جاساعاندار جازادان تولىق بوساتىلادى. سوتتىلىعى الىنىپ تاستالادى. اۋىر قىلمىستار بويىنشا جازانىڭ تورتتەن ءۇش بولىگى, ال اسا اۋىر قىلمىستار بويىنشا جارتىسى قىسقارادى. تۇزەتۋ مەكەمەسىنەن شىققاندارعا الەۋمەتتىك, مەديتسينالىق كومەك, جۇمىسقا ورنالاستىرۋ سياقتى قولداۋ كورسەتۋ كوزدەلگەن.
– كوپشىلىكتى قاڭتاردا ۇستالعانداردى ازاپتاۋ ماسەلەسى تولعاندىرىپ وتىر. بۇل باعىتتا قانداي جۇمىستار جۇرگىزىلىپ جاتىر؟
– وزدەرىڭىزگە بەلگىلى بولعانداي, قاڭتار وقيعاسىنان كەيىن ۇستالعاندارعا قاتىستى ازاپتاۋ فاكتىلەرى تۋرالى ارىز-شاعىمدار كوبەيىپ كەتتى. الەۋمەتتىك جەلىلەردە ۆيدەولار جانە ءتۇرلى جازبالار تاراتىلا باستادى.
وسىعان بايلانىستى مەملەكەت باسشىسى ازاپتاۋ قىلمىستارىن پروكۋراتۋرا تەرگەۋگە ءتيىس دەپ تاپسىرما بەردى. سوندىقتان جۋىردا قىلمىستىق-پروتسەستىك كودەكسكە تۇزەتۋلەر جاسالدى. كەلەسى جىلدان باستاپ ازاپتاۋدى پروكۋرورلار عانا تەرگەيدى.
قازىر باس پروكۋراتۋرا ازاپتاۋدى بولدىرماۋ ءۇشىن كەشەندى جۇمىس اتقارىپ جاتىر. ارنايى توپ قۇرىلدى. ولار يزولياتورلاردا, تۇزەتۋ ورىندارىندا ازاپتاۋعا جول بەرمەۋ شارالارىن قولعا الدى. بۇگىندە 23 جازانى وتەۋ مەكەمەسىندە تولىق بەينە-باقىلاۋ ەنگىزىلدى. كەلەسى جىلى بارلىعى قامتىلادى. قازىر پروكۋرورلار بەينەكامەرالاردى ونلاين رەجىمدە قاداعالاپ وتىر.
– مەملەكەت باسشىسى سىزگە ەكونوميكالىق رەسۋرستاردىڭ زاڭسىز شوعىرلانۋىنا قارسى ءىس-قيمىل ماسەلەلەرى جونىندەگى ۆەدومستۆوارالىق كوميسسيانى باسقارۋدى تاپسىردى. قۇرىلعانىنا التى ايدان اسقان كوميسسيا جۇمىسىنىڭ ناتيجەسى قالاي؟
– «قاسىرەتتى قاڭتارعا» تۇرتكى بولعان سەبەپتەردىڭ ءبىرى – وراسان ەكونوميكالىق رەسۋرستاردىڭ ساناۋلى توپتىڭ قولىندا شوعىرلانۋى. سول سەبەپتى پرەزيدەنت وليگوپولياعا زاڭسىز وتكەن اكتيۆتەردى قايتارۋ جانە بولاشاقتا وعان جول بەرمەۋدى تاپسىردى. مەملەكەتتىك ورگانداردىڭ وكىلدەرىنىڭ قاتىسۋىمەن ارنايى كوميسسيا قۇرىلىپ, ونىڭ جۇمىسىن ۇيلەستىرۋ باس پروكۋراتۋراعا جۇكتەلدى.
كوميسسيانىڭ الدىنا ەلدەن زاڭسىز شىعارىلعان قاراجاتتى قايتارۋ جانە زاڭسىز الىنعان ەكونوميكالىق رەسۋرستاردى انىقتاۋ, ولاردى مەملەكەتكە قايتارۋ مىندەتى قويىلدى.
6 ايدا مەملەكەتكە 630 ملرد تەڭگە قايتارىلدى. ونىڭ 400 ميلليون دوللارى شەتەلدەن كەلدى. بۇدان بولەك, پروكۋرورلار 79 مىڭ گەكتار جەر ۋچاسكەسىن, 600 تەمىر جولدى مەملەكەت مەنشىگىنە قايتاردى. كەدەن سالاسىندا 57 ميلليارد تەڭگە بيۋدجەتكە ءتۇستى. سوتتارعا م ۇلىكتى مەملەكەتكە قايتارۋ تۋرالى تالاپ-ارىزدار بەرىلدى. جالپى سوماسى 13,5 ميلليارد تەڭگە.
باس پروكۋرور رەتىندە جوعارعى سوتقا وليگوپوليا مۇددەسىنە شىعارىلعان سوت شەشىمدەرىنە نارازىلىق ەنگىزدىم. 17-ءسىن جوعارعى سوت قولدادى. ولار بويىنشا بيۋدجەتكە 23 ميلليارد تەڭگە قايتارىلادى.
26 قاراشادا پرەزيدەنت زاڭسىز شىعارىلعان اكتيۆتەردى مەملەكەتكە قايتارۋ جونىندە ارنايى جارلىق قابىلدادى. ۇكىمەت پەن باس پروكۋراتۋراعا كەلەسى جىلدىڭ ناۋرىز ايىنا دەيىن ءتيىستى زاڭ جوباسىن ازىرلەۋ جانە شەتەلدەرمەن جۇيەلى ءىس-قيمىلدى قامتاماسىز ەتۋ تاپسىرىلدى. ول ءۇشىن ارنايى قۇرىلىمدىق بولىمشە جاساقتالۋ ماسەلەسى قاراستىرىلىپ جاتىر. بۇل جۇمىستى دا ابىرويمەن اتقارامىز دەپ سەنەمىن.
– قازىر مەملەكەت بيزنەستى قورعاۋعا جەتكىلىكتى نازار اۋدارىپ وتىر. وسى باعىتتا پروكۋراتۋرا قانداي شارالار قولدانادى؟
– پروكۋراتۋرانىڭ باستى مىندەتتەرىنىڭ ءبىرى – كاسىپكەرلەر قۇقىقتارىن قورعاۋ. بيزنەسكە قىسىم كورسەتۋدىڭ جولىن كەسۋ ءۇشىن بىرقاتار ناقتى قادام جاسالدى. اسىرەسە قىلمىستىق سالادا. 2 قىركۇيەكتە تەرگەۋ ورگاندارىنا قىلمىستىق ءىس قوزعاۋ نەگىزدەرىن شەكتەيتىن نۇسقاۋ جولدادىم. بيزنەسكە قارسى قوزعالعان ءىستى پروكۋرور 24 ساعات ىشىندە تەكسەرۋگە مىندەتتى. ەگەر زاڭ بۇزىلسا, ءىس بىردەن توقتاتىلادى.
ەندى ناتيجەسىنە توقتالساق. بۇرىن ءبىر ايدا 150 ءىس تىركەلەتىن. نۇسقاۋ قابىلدانعان سوڭ بۇل سان ەكى ەسە ازايدى. سوڭعى ەكى اي ىشىندە پروكۋرورلار 500-گە جۋىق قىلمىستىق ءىستى توقتاتتى. جالپى, بيزنەستى قورعاۋ ماقساتىندا كەشەندى جۇمىستار جاسالۋدا. كاسىپكەرلەردى تەكسەرۋ 8 ەسە ازايدى. بارلىق تەكسەرۋ پروكۋراتۋرادا تىركەلەدى. بۇل جۇمىستىڭ ءبارى اۆتوماتتى جۇيەدە جاسالادى. ونىڭ كومەگىمەن جىلىنا 1 مىڭداي زاڭسىز تەكسەرۋدى تىركەۋگە جول بەرىلمەيدى.
«قامقور» قوسىمشاسى ارقىلى كاسىپكەر تەكسەرۋ بارىسىن باقىلاي الادى. قانداي ماسەلەمەن تەكسەرۋگە كەلەدى, تەكسەرۋ قورىتىندىسىن, كىمدەر كەلەدى – ءبارىن جۇيەدەن كورۋگە بولادى. بۇل ينسترۋمەنتتەردى ءارى قاراي جەتىلدىرىپ جاتىرمىز.
– پروكۋراتۋرا كۇنى قارساڭىندا ارىپتەستەرىڭىزدىڭ كۇندەلىكتى جۇمىسى تۋرالى قىسقاشا ايتىپ وتسەڭىز...
– پروكۋرور جۇمىسى قاجىرلى ەڭبەكتى تالاپ ەتەدى. اڭگىمەمىزدىڭ باسىندا ايتىپ كەتتىم, قاداعالاۋ سالاسى جان-جاقتى. ادامدار پروكۋرورعا بار ءۇمىتىن ارتىپ كەلەدى. سول ءۇمىت وتىن وشىرمەي, بارىنشا كومەكتەسۋ, قيىن كەزدە دەمەۋ جاساۋ – ءبىزدىڭ ەڭ باستى مىندەتىمىز.
ءبىر كۇندە جۇزدەگەن ارىز-شاعىم ءتۇسىپ جاتادى. اسىرەسە قىلمىستىق سالا بويىنشا ماسەلەلەر تەز شەشۋدى تالاپ ەتەدى. ويتكەنى ادامنىڭ قۇقىعىن شەكتەۋگە جول بەرمەۋ – اسا ماڭىزدى. وسى جاۋاپتى مىندەتتەردى ورىنداۋ ءۇشىن پروكۋرور تاباندى, بەلسەندى, ءبىلىمدى, الدىنا ناقتى ماقسات قويا بىلەتىن, ساليقالى ءارى ءادىل, ەلمەن ءتىل تابىسىپ جۇمىس ىستەي الاتىن, سىندارلى جاعدايدا تەز شەشىم قابىلداي الاتىن قىزمەتكەر بولۋعا ءتيىس.
ارىپتەستەرىم وتانىمىزدىڭ وركەندەۋى ءۇشىن زاڭعا ادال قىزمەت ەتۋدى جالعاستىرىپ, قويىلعان مىندەتتەرگە اسا جوعارى كاسىبي دەڭگەيدە قول جەتكىزەدى دەپ سەنەمىن. ءتول مەرەكەمىز قۇتتى بولسىن!
– اڭگىمەڭىزگە راحمەت.
اڭگىمەلەسكەن
بانۋ ءادىلجان,
«Egemen Qazaqstan»
