بولاشاق كومپوزيتور 1930 جىلى قازىرگى سانكت-پەتەربۋرگ قالاسىندا ومىرگە كەلگەن. اكەسى دارىگەر-حيرۋرگ, اناسى سۋرەتشى بولعان. كەيىپكەرىمىز بالا كۇنىنەن كىتاپتى جاقسى كورىپ, پۋشكيننىڭ پوەزياسى مەن پاۋستوۆسكيدىڭ رومانتيكالىق پروزاسىن ءسۇيىپ وقىعان. سونىڭ اسەرىمەن جازۋشى بولسام دەپ ارمانداپتى. بىراق بۇل ويىنان ۇلى كومپوزيتور يوگانن شتراۋستىڭ ءومىربايانى جەلىسىمەن تۇسىرىلگەن «ۇلكەن ۆالس» ءفيلمىن كورگەسىن بىردەن اينىپ, كومپوزيتور بولۋعا قۇشتارلىعى ويانادى. ءسويتىپ, ونەرگە ىنتىق ورەن الدىمەن مۋزىكا مەكتەبىندە, ودان سوڭ مۋزىكالىق ۋچيليششەدە ءتالىم الدى. كەيىن لەنينگراد مەملەكەتتىك كونسەرۆاتورياسىن ءتامامداپ, كاسىبي مۋزىكانت بولدى.
ايتۋلى ونەر يەسىنىڭ شىعارماشىلىعى سان قىرلى دەسەك بولادى. ول كوركەم فيلم, سپەكتاكل جانە ەستراداعا عانا مۋزىكا جازىپ قويعان جوق, سونىمەن بىرگە بالەت, وپەرا, سيمفونيا سەكىلدى كۇردەلى جانرلارعا قالام تارتىپ, بىرەگەي شىعارمالار تۋدىردى. ءبىز ماقالامىزدا اندرەي پەتروۆتىڭ كوركەم فيلمدەرگە جازعان مۋزىكاسى تۋرالى ءسوز قوزعايمىز.
كومپوزيتور كوركەم فيلمدەرگە مۋزىكانى وتكەن عاسىردىڭ 60-شى جىلدارىنىڭ باسىنان جازا باستادى. العاشقى جازعان مۋزىكاسى «سينەي پتيتسە» اتتى فيلمگە ارنالدى. بۇل تۋىندىدا باستى رولدەردى ەليزابەت تەيلور, مارگاريتا تەرەحوۆا جانە بالەرينا نادەجدا پاۆلوۆا سەكىلدى تانىمال اكتريسالار ويناعان. كينوداعى جولى ءساتتى باستالعان كومپوزيتور ودان كەيىن «ماسكەۋدى ارالاپ كەلەمىن», «ادام – امفيبيا», «دوس تۋرالى ءان» جانە ت.ب. فيلمدەرگە مۋزىكا جازدى. ونى جۇرتشىلىق وتە جىلى قابىلدادى. ماسەلەن, كورنەكتى رەجيسسەر گەورگي دانەليا تۇسىرگەن «ماسكەۋدى ارالاپ كەلەمىن» اتتى كوركەم ءفيلمدى ءالى كۇنگە كورەرمەن زور ىقىلاسپەن تاماشالايدى. ءبىر جاعىنان, وسى تۋىندىنىڭ ءساتتى شىعۋىنا شىعارماعا ءوڭ بەرىپ تۇرعان مۋزىكاسىنىڭ اسەرى ۇلكەن. شىنىندا دا, كينو باستالعاننان ادامنىڭ سەزىمىن تەربەيتىن ويناقى اسەم ساز بىردەن تارتىپ اكەتەدى. مۇنى اندرەي پەتروۆتىڭ شەبەرلىگى دەۋگە بولادى.
اسىرەسە كومپوزيتوردىڭ رەجيسسەر ەلدار ريازانوۆپەن شىعارماشىلىق بايلانىسى وعان ۇلكەن داڭق اكەلدى. ەكەۋىنىڭ تاندەمىنەن تۋعان «قىزمەتتەستەر حيكاياسى», «مۇڭلى رومانس», «ۆوكزالدا كەزدەسكەن ەكەۋ», «اۆتوموبيلدەن ساقتان» جانە ت.ب. تۋىندىلارى كەڭەس كينوسىنىڭ كلاسسيكاسىنا اينالدى. بۇگىندە ەكى سەريالى «قىزمەتتەستەر حيكاياسىنان» جارىققا شىققانىنا 45 جىلدان اسا ۋاقىت وتسە دە ونى كورەرمەن ءالى قىزىعىپ كورەدى. ستاتيستيكا باسقارماسىنىڭ قاتارداعى قىزمەتكەرى, جالعىزباستى اكە اناتولي ەفرەموۆيچ نوۆوسەلتسەۆ پەن مەكەمە باسشىسى, تۇرمىس قۇرماعان ليۋدميلا پروكوپەۆنا كالۋگينا اراسىندا وربىگەن وقيعا سول كەزەڭدەگى قوعامنىڭ الەۋمەتتىك شىندىعىن نانىمدى بەينەلەگەن. فيلم جارىققا شىققاندا ونى 58 ميلليون ادام تاماشالاپ, جوعارى باعالاعان. بۇل تۋىندىدا رەجيسسەرمەن بىرگە كومپوزيتوردىڭ ەڭبەگى ەرەكشە ەكەنىن ايتامىز. اسىرەسە تابيعات كورىنىستەرىمەن ۇندەسە جازىلعان اۋەزدى اۋەن ادام جانىن تولقىتىپ, اسەم كۇيگە بولەيدى. سونداي-اق «ۆوكزالدا كەزدەسكەن ەكەۋ» اتتى فيلمدەگى پەتروۆتىڭ مۋزىكاسى بۋفەتشى ايەل ۆەرا مەن ماسكەۋلىك پيانيست پلاتون ءريابينيننىڭ اراسىنداعى ماحاببات سەزىمىن جىپ-جىلى جەتكىزىپ, ونىڭ مازمۇنىن بايىتا تۇسكەن.
سونىمەن بىرگە گەورگي دانەليانىڭ 1979 جىلى تۇسىرگەن «كۇزگى مارافون» ءفيلمىنىڭ مۋزىكاسى اتالعان تۋىندىداعى ادال, ەڭبەكقور, ءبىلىمدى باس كەيىپكەردىڭ جان-دۇنيەسىمەن ۇيلەسىپ تۇرعانىن كورەسىز. جالپى, وسى كينوداعى وقيعالاردى كومپوزيتور تاپ باسىپ, ايشىقتى ورە بىلگەن. دانەليا ول تۋرالى: «ونىڭ تالانتىن جوعارى باعالايمىن. وتە سەنىمدى ادام. سوندىقتان دا وعان رۋحاني قاجەتتىلىكتى سەزىنەتىن بارلىق نارسەگە سەنە الدىم» دەپ ايتىپتى.
تالانت يەسى گەورگي دانەليا, ەلدار ريازانوۆ جانە تاعى باسقا بەلگىلى رەجيسسەرلەردىڭ بىرىنەن ءبىرى وتەتىن تۋىندىلارىنا جازعان مۋزىكاسى ارقىلى قانشاما كورەرمەندى رۋحاني لاززاتقا بولەدى. بىردە گەورگي دانەليا ونى مەرەيتويىمەن قۇتتىقتاپ, وعان: ء«سىز ەلدار ريازانوۆتىڭ فيلمدەرىنە مۋزىكانى ماعان سەكىلدى ەمەس, جانىڭىزدى سالماي جازىڭىز», دەپ ازىلدەپ حات جولداپتى. سوعان قاراعاندا ونىڭ رەجيسسەرلەر اراسىندا بەدەلى جوعارى بولعاندىعىن بايقايمىز. تالانتتى تۇلعا باس-اياعى 80-نەن اسا فيلمگە مۋزىكا جازىپ, كينودا قولتاڭباسىن قالدىردى.
قورىتا كەلگەندە, كسرو مەملەكەتتىك سىيلىعىنىڭ ەكى مارتە لاۋرەاتى, كومپوزيتور اندرەي پەتروۆتىڭ ونەردەگى ونەگەلى ءىزى مۋزىكا الەمىندە سايراپ جاتىر. سوندىقتان دا وعان جاقىن دوستارى «مۋزىكا ءرىتسارى» دەپ باعا بەرىپتى. وسى سوزگە ونىڭ بارلىق بولمىسى سىيىپ تۇر.
