سالتاناتتى جيىندا ەلىمىزدىڭ الەۋمەتتىك, قوعامدىق ومىرىنە بەلسەنە ارالاسىپ, مۇقتاج جاندارعا قول ۇشىن سوزىپ جۇرگەن 42 ۆولونتەر مەن ۆولونتەرلىك ۇيىمدار ماراپاتقا يە بولدى.
– بۇگىندە ۆولونتەرلىكتى دامىتۋدىڭ 2021-2023 جىلدارعا ارنالعان جول كارتاسى جۇزەگە اسىپ جاتىر. وندا مەملەكەت باسشىسىنىڭ ۆولونتەر جىلى اياسىنداعى تاپسىرمالارىن ىسكە اسىرۋداعى شارالار كەشەنى قاراستىرىلعان. ۆولونتەرلەردى دايارلاۋدىڭ بىرىڭعاي باعدارلاماسى دا دايىندالدى. قازىر ۆولونتەرلىك قىزمەتكە اتسالىسىپ جۇرگەن ازاماتتار مەن ۇيىمدار سانىنىڭ تۇراقتى ءوسۋى قالىپتى جاعدايعا اينالدى. وسىدان 2 جىل بۇرىن ۆولونتەرلىك ۇيىمداردىڭ سانى 224 بولسا, بۇگىنگى تاڭدا ول 700-گە جۋىقتادى. بەلسەندى ۆولونتەرلەر سانى 50 مىڭنان 200 مىڭعا, ياعني 4 ەسە ءوستى. ونىڭ 65 پايىزى – 29-دان 54 جاسقا دەيىنگى ازاماتتار, – دەدى اقپارات جانە قوعامدىق دامۋ ءمينيسترى دارحان قىدىرالى.
جيىندا ايتىلعانداي, قوعامنىڭ الەۋمەتتىك سۇرانىستارىن ەسكەرە وتىرىپ, جانۋارلاردى قورعاۋ, ەكولوگيا, ازاماتتاردىڭ ۇزاق ءومىر ءسۇرۋىن قامتاماسىز ەتۋ سياقتى ۇزدىك جوبالار جالعاسىن تاپتى. جوبالار اياسىنداعى ءتۇرلى الەۋمەتتىك ءىس-شاراعا 20 مىڭنان استام ۆولونتەر قاتىستى. جانۋارلاردى قورعاۋ باعىتى بويىنشا 100-دەن استام يەسىز جانۋار ارنايى مەكەمەلەرگە ورنالاستىرىلدى. «كۇمىس ۆولونتەرلىككە» مىڭعا جۋىق زەينەت جاسىنداعى ازاماتتار قوسىلدى.
سونىمەن قاتار جيىندا قازاقستانداعى بۇۇ-نىڭ اتقارۋشى ۇيلەستىرۋشىسى ارتۋر ۆان ديزەن ۇيىمنىڭ اتىنان ءۇش ەرىكتىنى ماراپاتتاپ, جىل بويى 70 ءوتىنىش كەلىپ تۇسكەنىن, ولاردىڭ بارلىعىنىڭ وزىندىك ماڭىزى بارىن ايتتى.
ەرىكتىلەر وسىدان بىرنەشە جىل بۇرىنعى ارىستاعى جارىلىس پەن ماڭعىستاۋداعى قۋاڭشىلىق كەزىندە جانە كەشەگى قوستانايداعى الاپات ءورت تۇسىندا ەرەكشە بەلسەندىلىك تانىتقانىن بىلەمىز. سونىمەن قاتار ولار ەكىباستۇزداعى كەلەڭسىز جاعدايدا دا قول ۇشىن سوزىپ, كومەك كورسەتىپ كەلەدى. وسىعان وراي «توتەنشە جاعدايلاردى جويۋعا بەلسەندى قاتىسقانى ءۇشىن» نوميناتسياسى تاعايىندالىپ, اتالعان وبلىستاردىڭ ۇزدىك ەرىكتىلەرى ەرەكشە نازاردا بولدى. ال «ۇزدىك الەۋمەتتىك كومەكشى» نوميناتسياسىنىڭ جەڭىمپازدارى جىل بويى مۇمكىندىگى شەكتەۋلى جاندارعا, قاريالارعا, الەۋمەتتىڭ وسال توپتارىنىڭ جانىنان تابىلعان. وسى ورايدا استانا قالاسىنىڭ بەس وتباسىنا ازىق-ت ۇلىك جەتكىزىپ تۇرعان مارال ەسەكەشەۆا مەن جەتىسۋ وڭىرىنەن كەلگەن, وقۋشىلارعا الەۋمەتتىك, پسيحولوگيالىق كومەك كورسەتكەن جانسەرىك بايدەنوۆتىڭ ەڭبەگى زور. ولار «ەڭبەكتىڭ ەلەنگەنى جاقسى, بىراق بۇل ءبىزدىڭ ادامي پارىزىمىز» دەپ سانايدى.
