شەتەلدىك ەسەپتەگى كولىكتەر زاڭداستىرىلادى

كولىكتى زاڭداستىرۋ ءۇشىن يەسى مىنا­داي قۇجاتتاردى تاپسىرۋعا ءتيىس: فورما بويىنشا ءوتىنىش; ءوتىنىم بەرۋ­شىنىڭ جەكە باسىن كۋالان­دىراتىن قۇجات; ترانسپورت قۇرالى­نىڭ پاسپورتى نەمەسە ترانسپورت قۇرالىن تىركەۋ تۋرالى كۋالىك; ترانسپورت قۇرالىنا مەنشىك قۇقىعىن راستايتىن قۇجات.

ءتيىستى قۇجاتتار قابىلدان­عاننان كەيىن كولىك تەكسەرۋگە جىبەرى­لەدى، تەك­سەرىس ناتيجەسى ارنايى بازا­عا تىر­كەلەدى. كولىكتى زاڭداس­تىرۋ تۋرا­لى ءوتىنىم ەكى جۇمىس كۇنى ىشىندە قاراس­تىرىلادى. شەشىم شىعا­رى­لىپ، ءوتىنىمدى قابىلدايدى نەمەسە زاڭداس­تىرۋدان باس تارتادى. كولىك يەسىن حاباردار ەتۋ ءۇشىن ونىڭ تەلەفو­نىنا 1414 نومىرىنەن SMS جىبەرىلەدى. حا­بار­لاما ماتىنىندە قابىلدانعان شە­شىم، ترانسپورت قۇرالىنىڭ بىرەگەي ءنومىرى، مودەلى مەن ماركاسى كورسەتىلەدى.

ەگەر كولىك يەسى كورسەتىلگەن قۇجات تىزبەسىن تولىق ۇسىنباعان جاعداي­دا; ۇسىنىلعان قۇجاتتاردان تۇزەتۋ بەلگىلەرى بايقالعان بولسا; قۇجاتتار قازاقستان رەسپۋب­ليكاسىنىڭ سونداي قۇجات تۋرالى زاڭناما تالاپتارىنا ساي كەلمەسە; ترانسپورت قۇرالى وزگە مەملەكەتتىڭ قۇزىرلى ورگانىن­داعى بۇرىنعى تۇرعىلىقتى جەرى بو­يىنشا تىركەۋدەن شەشىلمەسە، وندا ءوتىنىم قاناعاتتاندىرىلمايدى. مۇن­داي جاعدايدا كولىك يەسى كەلەسى ءوتى­­نىمدى قايتادان 2023 جىلدىڭ 1 شىل­­دەسىنە دەيىن بەرە الادى. 2022 جىل­­دىڭ 1 قىركۇيەگىنەن كەيىن ەل اۋما­­عىنا كىرگىزىلگەن كولىكتەر زاڭداس­تىرىل­مايدى. ىشكى ىستەر ورگاندارى قاي كولىكتىڭ قازاقستانعا قاشان اكەلىنگەنىن شەكارا قىزمەتى مەن ساق­تاندىرۋ ۇيىمدارىنىڭ دەرەكتەر بازاسى ارقىلى انىقتايدى.

كولىكتى زاڭداستىرۋعا قاتىستى وڭ شەشىم العاننان كەيىن، ەاەو قۇرامىنا كىرمەيتىن مەملەكەتتەن، ماسەلەن، گرۋزيادان اكەلىنگەن كولىكتى كەدەن راسىمىنەن وتكىزۋگە تۋرا كەلەدى. زاڭداستىرۋعا جاتاتىن كولىك ءۇشىن باستاپقى تىركەۋ قۇنى – 200 000 تەڭگە. زاڭداستىرىلعان اۆتوكولىك يەلەرى ۋتيل الىمنان بوساتىلادى.

قىرعىز رەسپۋبليكاسىنىڭ زاڭ­ناماسىنا سايكەس كەدەندىك باجداردى، سالىقتاردى تولەي وتىرىپ، كەدەندىك رەسىمدەۋدەن وتكەن اۆتوموبيلدەردى باس­تاپقى تىركەۋ ولار­دى يەلىكتەن شى­عارۋ (ساتۋ) قۇقى­عىن 2025 جىلعى 1 قاڭ­تار­عا دە­يىن شەكتەي وتىرىپ جۇزەگە اسى­رى­لادى. اتالعان مەرزىم­نەن كەيىن ولار ەۋرازيالىق ەكونو­ميكالىق وداق­تىڭ تاۋارى دەپ تانىلىپ، ولارعا قويىل­عان شەكتەۋ الىنىپ تاستالادى. قىر­عىز اۆتوموبيلدەرىنىڭ كەدەندىك ايىر­ما­شىلىعى تولەنگەن جاعدايدا ولاردى باستاپقى تىركەۋ يەلىكتەن شىعارۋ قۇقىعىن شەكتەمەي جۇزەگە اسىرىلادى.

ارمەنيادان اكەلىنگەن كولىك­تەردى دە تىركەۋ ولاردى قايتا ساتۋ قۇقىعىن شەكتەمەي رەتتەلمەك. ويتكەنى 2023 جىلدىڭ 1 قاڭتارىنان كەيىن ولار دا ەاەو تاۋارى دەپ ەسەپتەلەدى. بۇل قازىرگى ۋاقىتتا سارى ءنومىر تاعىپ جۇرگەن كولىكتەرگە دە قاتىستى.

ەگەر ترانسپورت قۇرالىنىڭ پاسپورتى نەمەسە ترانسپورت قۇرالىن تىركەۋ تۋرالى كۋالىك بولماسا، ال ترانسپورت قۇرالى بۇرىن جول قوزعالىسىنا نە بولماسا ەاەو اۋماعىندا پايدالانۋعا جىبەرىلمەسە جانە ىزدەۋدە بولماسا، وندا سۋبەكتىنى مەملەكەتتىك كىرىستەر ورگانىنىڭ قىزمەتكەرلەرى تەكسە­رەدى. وسى ۋاقىتقا دەيىن نە كەدەندىك باج سالىعىن، نە وزگە دە جارنالاردى تولەمەستەن ەل اۋماعىنا زاڭسىز جولمەن اكەلىنگەن اۆتوكولىكتەردى تىركەۋگە بولادى. ول ءۇشىن بارلىق ءتيىستى سوما تولەنۋگە ءتيىس.

بۇل قاۋلى جەلتوقساننىڭ ورتاسىنا دەيىن تالقىلانادى. دەمەك، رەسمي قاۋلى جاڭا جىل قارساڭىندا جارياعا جولدانۋى ابدەن مۇمكىن. ەسكە سالا­يىق، قاۋلىعا سايكەس شەتەلدىك كولىك­تەردى تىركەۋ 2023 جىلدىڭ 1 قاڭ­تارى مەن 1 شىلدەسى ارالىعىندا جۇر­گىزىلەدى دەپ جوسپارلانىپ وتىر.

بۇعان دەيىن شەتەلدىك كولىك­تەردى زاڭداستىرۋ تۋرالى قۇجات­تى ءماجىلىس تە، سەنات تا ماقۇل­دادى. سەنات دەپۋتاتى عۇمار دۇيسەم­باەۆتىڭ ايتۋىنشا، 2022 جىلعى 1 قىركۇيەككە دەيىن كەلگەن ماشينالاردى زاڭداستىرۋ ءۇشىن بىرىڭعاي الىمنىڭ بەلگىلەنۋى 300 مىڭعا جۋىق كولىكتى تىركەۋگە مۇم­كىندىك بەرەدى جانە جەرگىلىكتى بيۋد­جەتكە تۇسەتىن كولىك سالىعى ارتادى.