چەمپيوناتتىڭ اشىلۋ سالتاناتىنا استانا قالاسى دەنە شىنىقتىرۋ جانە سپورت باسقارماسىنىڭ بۇقارالىق سپورت ءبولىمىنىڭ باسشىسى ازامات اعزاموۆ, №2 بالالار مەن جاسوسپىرىمدەردىڭ مامانداندىرىلعان سپورت مەكتەبىنىڭ باسشىسى باۋىرجان ساحارباەۆ, شورت-ترەكتەن باس جاتتىقتىرۋشى, قر ەڭبەك سىڭىرگەن قايراتكەر مادىعالي قارسىبەكوۆ, شورت-ترەكتەن ەل قۇراماسىنىڭ باس جاتتىقتىرۋشىسى نۇربەرگەن جۇماعازيەۆ قاتىستى.
ۇيىمداستىرۋشىلاردىڭ ايتۋىنشا, جارىسقا ەلىمىزدىڭ كوكشەتاۋ, قوستاناي, قىزىلوردا, سولتۇستىك قازاقستان وبلىسى جانە استانا قالاسىنان 163 قاتىسۋشى تىركەلگەن. ولار ەكى كۇن بويى باق سىنايتىن بولادى.
«بالالار جىلى اياسىندا وتكىزىلىپ وتىرعان بۇگىنگى چەمپيوناتقا 2009 جىلى تۋعان جانە ودان ۇلكەن جاستاعى جەتكىنشەكتەر قاتىسىپ جاتىر. جارىستىڭ ماقساتى – قىسقى سپورت تۇرلەرىن, ونىڭ ىشىندە شورت-ترەكتى دامىتۋ, سپورتتى ناسيحاتتاۋ. ەلىمىزدىڭ بەس وڭىرىنەن كەلگەن بالالار ەكى كۇن بويى ناعىز ۇزدىكتەردى انىقتايدى», دەدى باۋىرجان ساحارباەۆ.
سونىمەن قاتار جارىسقا حالىقارالىق دارەجەدەگى سپورت شەبەرى, الەم كۋبوگى مەن الەم بىرىنشىلىكتەرىنىڭ جۇلدەگەرى, جاقىندا عانا شورت-ترەكتەن وتكەن الەم كۋبوگى كەزەڭىندە كۇمىس جۇلدە العان ابزال اجىعاليەۆ قۇرمەتتى قوناق رەتىندە شاقىرىلعان.
«شورت-ترەك ەلىمىزدە جاڭادان دامىپ كەلە جاتقان سپورت ءتۇرى دەسە دە بولادى. مۇنداي جارىستار وتە قىزىقتى وتەدى. ويتكەنى بۇل جەتكىنشەكتەردىڭ العاشقى بەلەستەرى, ەستە قالاتىن جارىستارى بولماق. ولار ءۇشىن مۇنداي تۋرنيرلەر جاڭا تاجىريبە, جاڭا مۇمكىندىك سىيلايدى. مۇز ايدىنىندا ونەر كورسەتەتىن كىشكەنتاي سپورتشىلارىمىزعا ساتتىلىك تىلەيمىن. جەتكىنشەكتەرگە ايتار كەڭەسىم, اينالىسىپ جۇرگەن بۇل سپورت تۇرلەرى, ەڭ الدىمەن, وزدەرىنە ۇناۋى كەرەك. سپورتقا دەگەن ماحاببات بولعاندا عانا ۇلكەن ناتيجەلەرگە قول جەتكىزە الادى. وسى شورت-ترەكپەن اينالىسىپ كەلە جاتقانىما 18 جىل بولدى. قىسقى سپورتتىڭ وسى ءتۇرىن دامىتۋعا ءوز ۇلەسىمدى قوسقىم كەلەدى. بۇگىنگى جاس ءىزباسارلارىمىز بولاشاقتا وليمپيادا جالاۋىن جەلبىرەتەدى دەگەن ۇمىتتەمىن», دەيدى ابزال اجىعاليەۆ.
ايتا كەتسەك, اتالعان چەمپيوناتتا الداعى قىسقى ماۋسىمعا ۇزدىك سپورتشىلاردان تۇراتىن استانا قالاسىنىڭ قۇراما كومانداسى جاساقتالادى. جەڭىمپازدار ءار جاس توبىنداعى جانە ءار قاشىقتىق بويىنشا جەكە بىرىنشىلىكتەردە انىقتالىپ, ديپلومدارمەن, مەدالدارمەن ماراپاتتالادى.
