پرەزيدەنت • 30 قاراشا، 2022

پرەزيدەنت فرانتسيانىڭ جەتەكشى كومپانيالارىنىڭ باسشىلارىمەن كەزدەستى

99 رەت كورسەتىلدى

ءىس-شاراعا Total Energies، Orano، Saint Gobain، Boehringer Ingelheim France، Soufflet Group، BPI France، Vicat، Syctom، Pellenc، FICT مال شارۋاشىلىعى قاۋىمداستىعى، Total Eren، PCM، Safran، Thales، Groupe EDF، Assystem، Alstom، Evolution International، MHB SAS، Exa International، Airbus، Rungis – Semmaris، MBDA، SOPREMA، لۋي ۆيكات جانە باسقا دا ءىرى كومپانيالاردىڭ باسشىلارى قاتىستى، دەپ حابارلايدى Egemen.kz اقورداعا سىلتەمە جاساپ.

كەزدەسۋ بارىسىندا پرەزيدەنت بۇگىندە حالىقارالىق قوعامداستىق كۇردەلى گەوساياسي جانە ەكونوميكالىق ماسەلەلەرمەن بەتپە-بەت كەلىپ وتىرعانىن ايتتى. ونىڭ ايتۋىنشا، جاڭا سىن-قاتەرلەر جاڭا مۇمكىندىكتەرگە جول اشادى. قيىن-قىستاۋ كەزەڭ – بايلانىس ورناتىپ، سەرىكتەستىكتى دامىتۋ ءۇشىن قولايلى ۋاقىت.

ء«بىز ورتاق ەكونوميكالىق جانە ساياسي مۇددەلەرىمىزدى ودان ءارى ىلگەرىلەتۋ ءۇشىن فرانتسيامەن جانە جالپى ەۋروپامەن اراداعى قارىم-قاتىناستى جولعا قويعىمىز كەلەدى»، دەدى قاسىم-جومارت توقاەۆ.

مەملەكەت باسشىسى قازاقستان ەركىن جانە باسەكەگە قابىلەتتى نارىقتىق ەكونوميكانى نىعايتۋدى كوزدەپ وتىرعانىن اتاپ ءوتتى. سونداي-اق مونوپوليادان ارىلۋ قازاقستاندى قۋاتتى، باسەكەگە قابىلەتتى جانە ينۆەستورلارعا تارتىمدى ەتەدى دەپ سانايدى. ول بيزنەس احۋالدى جاقسارتۋ ءۇشىن زاڭناماعا ودان ءارى ءتيىستى وزگەرتۋلەردى ەنگىزۋگە دايىن ەكەنىن جەتكىزدى.

«بۇل جۇمىستىڭ العاشقى ناتيجەلەرى ماكروەكونوميكالىق دەرەكتەردەن كورىنىپ وتىر. بيىلعى 10 ايدا ءجىو ءوسىمى 2،5 پايىزدى قۇرادى. بۇل بولجانعان ناتيجەدەن جوعارى. قولدانىستاعى تاسىمال تىزبەگىنىڭ ۇزىلۋىنە قاراماستان ءبىزدىڭ ەكسپورتىمىز 50 پايىزعا (63،8 ملرد دوللار) جۋىق ءوستى. 2022 جىلدىڭ العاشقى التى ايىندا شەتەلدىك سەرىكتەستەرىمىز ءبىزدىڭ ەكونوميكامىزعا شامامەن 15 ميلليارد دوللار ينۆەستيتسيا قۇيدى. بۇل وتكەن جىلمەن سالىستىرعاندا شامامەن 30 پايىزعا كوپ. الداعى 7 جىلدا ءبىز 150 ميلليارد دوللار تىكەلەي شەتەل ينۆەستيتسياسىن تارتۋدى جوسپارلاپ وتىرمىز. قازاقستان ينۆەستيتسيا سالۋ جونىنەن ورتالىق ازياداعى ەڭ تارتىمدى ەل بولۋى ءۇشىن ينۆەستيتسيالىق ساياساتىمىزدى ۇنەمى جەتىلدىرىپ وتىرامىز»، دەدى قاسىم-جومارت توقاەۆ.

س

بۇل رەتتە، پرەزيدەنت فرانتسيا قازاقستاننىڭ نەگىزگى ەكونوميكالىق ارىپتەستەرىنىڭ ءبىرى ەكەنىن اتاپ ءوتتى.

«بيىلعى توعىز ايدا قازاقستان مەن فرانتسيا اراسىنداعى تاۋار اينالىمى 12 پايىزعا ءوستى. بۇگىندە 170-تەن استام فرانتسۋز كومپانياسى، سونىڭ ىشىندە Total Energies، Orano، Airbus، Vicat، Air Liquide، Alstom، Saint-Gobain جانە باسقالارى قازاقستاندا تابىستى جۇمىس ىستەپ جاتىر. ولاردىڭ بارلىعى قازاقستان ەكونوميكاسىنا ەلەۋلى ۇلەس قوسىپ كەلەدى. فرانتسيانىڭ قازاقستانداعى ساۋدا وكىلدىگىن قۇرۋ ىنتىماقتاستىعىمىزدى نىعايتۋعا ءوز سەپتىگىن تيگىزەر ەدى دەپ سانايمىن. ءبىز ونىڭ تەزىرەك قۇرىلعانىن قۇپتايمىز. سونداي-اق فرانتسۋز كومپانيالارىن ەلىمىزدىڭ ينۆەستيتسيالىق مۇمكىندىكتەرىن قاراستىرۋعا شاقىرامىن. جيىنعا قاتىسۋشىلاردىڭ بارىنە قازاقستان قاۋىپسىز جانە تۇراقتى ينۆەستيتسيالىق ورتا قالىپتاستىرۋعا كەپىلدىك بەرەتىنىن نىق سەنىممەن ايتا الامىن»، دەدى مەملەكەت باسشىسى.

م

سونىمەن قاتار مەملەكەت باسشىسى ەنەرگەتيكا، كولىك جانە لوگيستيكا، تسيفرلاندىرۋ سالالارىنداعى ىنتىماقتاستىق پەرسپەكتيۆالارىنا توقتالدى.

پرەزيدەنت قازاقستان مەن فرانتسيا اراسىنداعى ەكونوميكالىق سەرىكتەستىك بارلىق سالادا ءارتاراپتانىپ، كەڭەيە بەرەتىنىنە سەنىم ءبىلدىردى.

«بۇگىنگى كونسترۋكتيۆتى ديالوگ بيزنەستى وركەندەتۋگە جانە ورتاق دامۋعا نيەتتى ەكەنىمىزدى تاعى دا ناقتىلاۋعا مۇمكىندىك بەرەدى. مەنىڭ اكىمشىلىگىم فرانتسۋز كومپانيالارىنا وڭىردەگى ەكونوميكاسى ەڭ قارقىندى دامىپ كەلە جاتقان ەلدەردىڭ بىرىندە بيزنەس جۇرگىزۋى ءۇشىن بارلىق قاجەتتى قولداۋ كورسەتۋگە دايىن»، دەدى مەملەكەت باسشىسى.

م

سوڭعى جاڭالىقتار

ۇقساس جاڭالىقتار