ايماقتار • 29 قاراشا، 2022

ەكىباستۇز: جاعداي ءالى دە كۇردەلى

93 رەت كورسەتىلدى

بۇعان دەيىن ەكىباستۇز قالاسىندا كوپقاباتتى 17 تۇرعىن ءۇي جىلۋعا قوسىلا الماي وتىرعانىن حابارلاعان ەدىك. كەشە تۇسكە قاراي اپات سالدارىنان قوسىمشا تاعى 25 كوپقاباتتى جانە 90 جەكە ۇيدە جىلۋ بەرۋ ماسەلەلەرى ءالى دە بولسىن شەشىلمەي وتىرعانى انىقتالدى. جىلۋ ماگيسترالىندا ىستىق سۋ جەتكىلىكتى بولعانىمەن، ىشكى جەلىلەردى رەتتەۋدە قيىندىقتار تۋىنداپ جاتىر. وعان قوسىمشا بريگادالار تارتىلدى.

كوللاجدى جاساعان زاۋرەش سماعۇل، «EQ»

قالانى جىلۋمەن جابدىقتاۋدى قالپىنا كەلتىرۋ جۇمىستارى جالعاسۋدا جانە وبلىس اكىمىنىڭ مىندەتىن اتقارۋشى ابىلقايىر سقاقوۆتىڭ جەكە باقىلاۋىندا، دەپ حابارلادى وبلىس اكىمىنىڭ ءباسپاسوز قىزمەتىنەن. كەشە تاڭەرتەڭ تۇرعىن ۇيلەر ماڭىنداعى ەسكى جەلىلەر قىسىمعا شىداس بەرمەي جارىلىپ، قالانىڭ كوپتەگەن جەرىنە جوندەۋشى مەن ارنايى تەحنيكا جۇمىلدىرىلدى.

جاۋاپتى ماماندار قازىرگى كۇنى ءىرى اقاۋلاردىڭ ەڭ سوڭعىسى – ءماشھۇر ءجۇسىپ كوشەسىندە توسەلگەن جىلۋ ماگيسترالى قالپىنا كەلتىرىلىپ جاتقانىن ايتادى. جىلۋسىز وتىرعان تۇرعىنداردى 1 200 جىلىتقىشپەن قامتاماسىز ەتۋ بويىنشا شارالار ۇيىمداستىرىلدى.

دۇيسەنبى كۇنى كەشكىلىك ەكىباستۇزدا پاۆلودار وبلىسى اكىمىنىڭ ءبىرىنشى ورىنباسارى ولەگ كرۋك، ەكىباستۇز قالاسىنىڭ اكىمى ايان بەيسەكين، «ورتالىق-ازيا ەلەكتروەنەرگەتيكالىق كورپوراتسياسى» اق باسقارما توراعاسى باعدات ورال جانە وبلىستىق توتەنشە جاعدايلار جونىندەگى دەپارتامەنت باستىعى جاسۇلان جۇماشەۆ وڭىرلىك كوممۋنيكاتسيالار قىزمەتىنىڭ ۇيىمداستىرۋىمەن ارنايى بريفينگ وتكىزدى.

شاھارداعى كەشەندى اپاتتى جويۋ جۇمىستارىنىڭ ۇزاققا سوزىلۋىنا نورمادان تىس ىسىراپ بولىپ جاتقان (3 ەسەگە جۋىق) سۋدىڭ قاي تۇستان جارىپ شىققانى انىقتالماعانى قيىندىق تۋدىرعان. ونىڭ ۇستىنە كەزىندە كوشەدەگى جىلۋ قۇبىرلارى اۋىستىرىلعاندا ءبىرىنىڭ ۇستىنە ءبىرى سالىنعان ەكەن. جەردى قوپارۋ كەزىندە بۇل بەي-بەرەكەت جوندەۋلەر كوپتەگەن قيىندىق تۋىنداتقان. سوعان قاراماستان جوندەۋ بريگادالارى 15 ءىرى اقاۋدى ءبىر جارىم تاۋلىكتىڭ ىشىندە قالپىنا كەلتىردى.

– تۇرعىن ۇيلەرگە بەرىلەتىن جىلۋ تەمپەراتۋراسى قازىرگى ۋاقىتتا 84-86 گرادۋسقا دەيىن قايتا قالپىنا كەلتىرىلدى. ءماشھۇر ءجۇسىپ كوشەسىندەگى ماگيسترالداعى كامەرالار سۋعا تولىپ قالعاندىقتان وسى جەلىدەن جىلۋ الاتىن 149 كوپقاباتتى باسپانا، 114 جەكە تۇرعىن ءۇي مەن 15 الەۋمەتتىك نىساندى اجىراتتىق. 6-8 ساعاتتان سوڭ ولارعا قايتا جىلۋ بەرىلە باستادى. قازىرگى ۋاقىتتا 17 تۇرعىن ءۇي، 2 الەۋمەتتىك عيمارات پەن ءبىر مەكەمە عانا ازىرشە جىلۋعا قوسىلعان جوق. بىراق بۇل ماسەلەنى دە جاقىن ارادا شەشەمىز، – دەدى بريفينگتە و.كرۋك.

ەكىباستۇز قالاسىنىڭ اكىمى ايان بەيسەكين جىلۋ-ەلەكتر ستانساسىنىڭ دەر كە­زىندە ارەكەت ەتپەۋى سالدارىنان 18 كوپ­قاباتتى ءۇيدىڭ جىلۋ جەتكىزۋ قۇبىر­لا­رىندا سۋ قاتىپ قالعانىن راستادى.

– شاھارداعى 422 شاقىرىم جىلۋ تورابى جىلۋ-ەلەكتر ورتالىعىنا، 80 شاقىرىمى جەكە تۇتىنۋشىلارعا تيەسىلى. بۇل قۇبىرلاردىڭ شامامەن 90 پايىزىنىڭ توزىعى جەتكەن. «ەكىباستۇز جىلۋ-ەنەرگو» جشس جوندەۋ جۇمىستارىن جىل سا­يىن جۇرگىزگەنىمەن، جەكە تۇتىنۋشىلار بۇل باعىتتاعى ىسپەن مۇلدە اينالىسپايدى. تەك سوڭعى ەكى كۇننىڭ ىشىندە ولارعا قاراستى قۇبىرلاردان 90-نان استام اقاۋ انىقتالىپ، رەتكە كەلتىرىلدى. اتاپ وتەرلىگى، قالادا قۇرىلعان شۇعىل جەلىگە ەكى كۇننىڭ ىشىندە 800-دەي ساۋال تۇسكەن. جوعارىدا اتالعان 17 ۇيدە شامامەن 4 مىڭداي ادام تۇرادى. نەگىزگى ماسەلە بۇل جەردە قىسقا دايىندىقسىز كىرگەن كوپقاباتتى باسپانالارعا قاتىستى بولىپ تۇر. ال جىلۋ ماۋسىمىنا تىڭعىلىقتى ازىرلەنگەن ۇيلەردە تەمپەراتۋرا قالىپتى رەجىمگە جىلدام كوتەرىلدى. مەن بيىلعى 16 تامىزدا قالا اكىمى بولىپ تاعايىندالعاندا شاھار جىلۋ جۇيەسىن دايىنداۋعا ەندى عانا كىرىسىپ جاتقانىنا كۋا بولدىم، – دەدى ا.بەيسەكين.

ءبىر قىزىعى، جىلۋ ورتالىعى ءوز تۇتى­نۋشىلارىنان قانشا پايدا كورىپ وتىرعانى تۋرالى اقپارات جوقتىڭ قاسى. «ورتالىق-ازيا ەلەكتروەنەرگەتيكالىق كورپوراتسياسى» اق باسقارما توراعاسى باعدات ورال جۋرناليستەردىڭ بۇل تۋرالى ساۋالىنا جاۋاپ بەرە المادى. تەك ستانسانىڭ قاجەتتىلىگى ءۇشىن بيىلعا بولىنگەن قاراجات تۋرالى باياندادى.

– نەگىزگى اقاۋ ستانسادان ەمەس، جىلۋ جەلىلەرىنەن شىعىپ وتىرعانىنا نازار اۋدارعىم كەلەدى. نىساندا جوندەۋ جۇمىستارى ۋاقىتىندا اياقتالىپ، قىسقا ازىرلىكپەن كىردى. بيىل ءبىزدىڭ كورپوراتسيا ەكىباستۇزداعى جىلۋ ورتالىعىنداعى قۇرال-جابدىقتاردى جوندەۋگە 300 ملن تەڭگە، ال جىلۋ جەلىلەرىن جاڭارتۋعا 200 ملن تەڭگە كولەمىندە قاراجات ءبولدى. شامامەن 600 مەتر قۇبىر اۋىستىرىلدى. كومپانيا 2023 جىلعا تاريفتەردى كوتەرۋ تۋرالى ءتيىستى ورگاندارعا ءوز ۇسىنىستارىن جولداپ قويعان. سەبەبى قازىرگى تاريفپەن ورتالىقتى ۇستاپ تۇرۋ، جوندەۋ جۇمىستارىن جۇرگىزۋ مۇلدە ويعا سىيمايدى. ءبىزدىڭ ەسەبىمىزشە، ءتاريفتى كوتەرۋگە 3 باعىت نەگىزگە الىنادى. اۋەلى شامامەن جىل سايىن 3 ملرد تەڭگەگە جوندەۋ جۇرگىزۋ قاجەت. ودان سوڭ جىل سايىن قۇنى وسەتىن كومىردى ساتىپ الۋ قارجىلاندىرىلۋى كەرەك. ال سوڭعىسى، كاسىپورىنداعى قىزمەتكەرلەردىڭ جالاقىسىن ءوسىرۋ. سوندا شامامەن ءبىزدىڭ قازىرگى قولدانىستاعى ءتاريفىمىز 108 پايىزعا ءوسۋى كەرەك. ياعني 1 گيگوكالوري ءۇشىن باعا 5 300 تەڭگەدەن 11 500 تەڭگەگە كوتەرىلەدى. بىراق بۇل قاراپايىم تۇتىنۋشىلار ءۇشىن تاريف ەكى ەسەگە قىمباتتايدى دەگەن ءسوز ەمەس. بيۋدجەتتەن ءار گيگوكالوريا ءۇشىن قارجى تولەنەدى، ال پاتەرىندە جىلۋ ەسەپتەگىش قۇرالى بار ءۇي يەلەرى قازىر اي سايىن نەبارى 1 800 تەڭگەدەي عانا تولەپ وتىر­عا­نىن ەسكەرۋ كەرەك. دەي تۇرعانمەن، تاريف قۇراۋشى ستاۆكالاردى ءوسىرۋ بارلىق ماسەلەنى شەشپەيدى. ستانسانى، جەلىلەردى جاڭارتۋ ءۇشىن كەشەندى شەشىمدەر قابىلدانۋى كەرەك. ءبىزدىڭ تاراپىمىزدان ءتيىستى ورگاندارعا مەنشىك يەسىن وزگەرتۋ تۋرالى حات جازىلعانىن جاسىرمايمىز. بولاشاقتا بۇل كاسىپورىن 50/50 تۇرىندە مەملەكەتپەن سەرىكتەسىپ باسقارىلا ما، الدە تولىقتاي مەملەكەت مەنشىگىنە وتە مە، ونى ۇكىمەت شەشەدى. بىراق قازىرگى ماڭىزدى ماسەلە – اپاتتان كەيىنگى سالداردى تولىق جويىپ، پاتەرلەر مەن الەۋمەتتىك نىسانداردى جىلىتۋ، – دەدى ول.

بۇعان قوسا كورپوراتسيا باسشىسى ەكىباستۇز قالاسىنىڭ تىزگىنىن ايان بەي­سەكين ۇستاعالى تۇتىنۋشىلاردىڭ ەلەكتر جارىعى ءۇشىن قارىزدارى ءبىرتالاي ازاي­عانىن اتاپ ءوتتى. مىسال ءۇشىن بيۋد­جەتتىك مەكەمەلەردىڭ بورىشى ءجۇز پايىز وتەلگەن. ال جەكە تۇتىنۋشىلاردان جىلدار بويى قوردالانىپ قالعان 450 ملن تەڭگە قارىز ءالى دە بولسىن ساقتالۋدا.

بريفينگ بارىسىندا وبلىستىق توتەن­شە جاعدايلار دەپارتامەنتىنىڭ باستىعى جاسۇلان جۇماشەۆ قالادا توتەنشە جاع­دايدىڭ جاريالانۋىنا بايلانىستى 84 بالا مەن اۋرۋحانادا ەم قابىلداپ جاتقان 39 ناۋقاستىڭ وبلىس ورتالىعىنا اۋىستىرىلعانىن اتاپ ءوتتى.

ەكىباستۇزدا اياز ءالى قىسىپ تۇر. سالدا­رى­نان كوشەلەردەگى ەسكى جىلۋ قۇبىرلارى عانا ەمەس، ابدەن سۋىقتاپ قالعان پاتەرلەردەگى جىلۋ باتارەيالارى دا قىسىمعا شىداس بەرمەي جارىلىپ جاتىر. تۇرعىندار جا­رىق­تىڭ ءجيى ءوشىپ قالاتىنىنا، كەيبىر ۇيلەردە سۋدىڭ جوقتىعىنا شاعىم ايتۋدا.

 

پاۆلودار وبلىسى،

ەكىباستۇز قالاسى

سوڭعى جاڭالىقتار

استانادا «ۆaitursynuly.kz» سايتىنىڭ تۇساۋكەسەرى ءوتتى

احمەت بايتۇرسىن ۇلى • 03 اقپان، 2023

ۇقساس جاڭالىقتار