جاڭا عيمارات جارقىن ىستەرگە قىزمەت ەتسىن

سارسەنبى كۇنى استانانىڭ ج.تاشەنوۆ اتىنداعى ورتالىق كوشەسىنىڭ بويىندا تۇرىك رەسپۋبليكاسى ەلشىلىگىنىڭ جاڭا عيماراتى سالتاناتتى جاعدايدا اشىلدى. ونىڭ اشىلۋ سالتاناتىنا قازاقستاندا رەسمي ساپارمەن جۇرگەن تۇركيا پرەزيدەنتى ابدۋللا گۇل قاتىستى. قازاقستان جاعىنان مەملەكەتتىك حاتشى – سىرتقى ىستەر ءمينيسترى قانات ساۋداباەۆ بولدى. ابدۋللا گۇل الدىمەن ەلشىلىك عي­ماراتىنىڭ الدىنا تۇرىك رەسپۋب­لي­كاسىنىڭ تۋىن كوتەردى, ودان كەي­ىن قىسقا ءسوز سويلەدى. ءوزىنىڭ ءسو­زىن­دە ول تۇركيا مەملەكەتى باۋىرلاس تۇركى حالىقتارىنىڭ تاۋەلسىز ەلدەر بولعانىنا شىن جۇرەكتەن قۋان­عا­نىن ەسكە الدى. كەزىندە ءبىز قازاق­ستان­نىڭ تاۋەلسىزدىگى جاريا­لان­عاننان كەيىن ءبىر ساعاتقا جەتپەيتىن ۋاقىتتا ونى تانىعان ەدىك, دەدى ول. بۇگىندە قازاقستان الەم تانيتىن, سىيلايتىن, ساناساتىن الىپ ەل بول­دى. پرەزيدەنت نۇرسۇلتان نا­زار­باەۆتىڭ باستاماسىمەن اسەم بولسا دا ەلدىڭ شەتىندە ورنالاسقان ال­ماتىدان استانا وسى جەرگە كوشى­رىلدى. مۇنىڭ تاريحي وقيعا بولعا­نىن ءبارىمىز دە بىلەمىز. ونىڭ قۇ­رى­لىسىنا تۇرىك فيرمالارى دا بەل­سەنە قاتىسىپ, مىڭداعان ادام جۇ­مىس ورىندارىمەن قامتاماسىز ەتىلدى. وسىلاي دەي كەلىپ, ودان ءارى ا.گۇل ەلشىلىك عيماراتىن سالۋعا ءوزى تۇركيانىڭ سىرتقى ىستەر ءمينيسترى بولىپ جۇرگەندە قاتىسقانىن اۋىزعا الدى. مىنە, بۇگىن سول عيماراتىمىز ىسكە قوسىلىپ وتىر, ونىڭ ءىشى نۇرعا تولىپ, باۋىرلاس ەكى ەلدىڭ اراسىنداعى ىنتىماقتاستىق پەن دوستىقتى دامىتۋعا قىزمەت ەتسىن, دەدى تۇركيا پرەزيدەنتى. ەلشىلىك كەشەنى ءۇش عيماراتتان تۇرادى ەكەن, ونىڭ ىشىندە ديپ­لو­ماتتار مەن قىزمەتكەرلەردىڭ الەۋ­مەتتىك جاعدايىن جاسايتىن ورىن­دار دا بار. كەشەننىڭ جالپى اۋما­عى 13 گا جەردى الىپ جاتىر. ابدۋللا گۇل تۇركيا مەملە­كە­تىنىڭ نەگىزىن قالاعان اسا كورنەكتى قايراتكەر مۇستافا كەمال اتا­تۇرىكتىڭ ەسكەرتكىشىنە گۇل شوقتارىن قويدى. جاقسىباي سامرات.