قورجىنىمىز جۇلدەمەن قوماقتى

جەكسەنبى كۇنى قاراعاندىدا ۆەلوسپورتتان وتكەن ازيا چەمپيوناتى مارەگە جەتتى. وسى سىندا قازاقستان قۇراماسى 7 التىن جۇلدەگە يە بولدى. ءسويتىپ, جاقىندا استانادا اياقتالعان قۇرلىقتىق دودانى ەسەپتەگەندە ۇلتتىق قۇراما بارلىعى 11 التىن مەدالدى جەڭىپ الدى. جارىستىڭ سوڭعى كۇنى رۋسلان تىلەۋباەۆ, ماكسيم يگلينسكي مەن دميتري گرۋزدەۆ تاس جولداعى توپتىق جارىستا بارلىق مەدالداردى يەلەندى. ولار 204,1 كم ار­نالعان سىندا توپ جاردى. بۇل ازيا چەمپيوناتىنداعى ەڭ قيىن قاشىقتىقتاعى جارىس بولىپ ەسەپتەلەدى. وسى بايگەدە وزا شاپقان ۆەلوشاباندوزدارىمىز جارىسقا قاتىسقان 18 ەلدىڭ 77 سپورت­­شىسىنىڭ اراسىنان قارا ءۇزىپ, مارەگە ءبىرىنشى جەتتى. ءسويتىپ, وسى كۇنى قازاقستان قۇراماسى التىن مەدالدار سانىمەن ءبىرىنشى ورىن الدى. ال جالپى جۇلدەلەر سانى بويىنشا ەلىمىز 32 مەدالدى يەلەنگەن وڭتۇستىك كورەيا قۇراماسىن العا جىبەرىپ, ەكىنشى ورىنعا يە بولدى. ءبىزدىڭ كوماندا ازيا دوداسىندا 22 مەدالدى ەنشىلەدى. جالپى, بيىلعى ازيا چەمپيوناتى جاقسى دەڭگەيدە ءوتتى دەۋگە بولادى. اس­تانا­دا­عى جارىستا وتانداس­تارى­مىز 4 التىن جۇلدە السا, قاراعاندى تاس جولدارىندا 7 رەت قۇرمەت تۇعىرىنىڭ ەڭ بيىك ساتىسىنا كوتەرىلدى. جارىس كەزىندە قازاقستاندىقتاردان جوعارىدا اتالعان سپورتشىلاردان باسقا ۆيكتور وكيشەۆ, گريگوري شتەين, ايەلدەردەن نادەجدا گەنەلەۆا, ەكاتەرينا يۋرايتيس چەمپيوندىق اتاقتى يەلەندى. ال ۇلتتىق قۇراماعا سوڭعى كۇندەرى كۇمىس جۇلدەنى ەۆگەني گيديچ, ولەگ زەملياكوۆ, قولا مەدالدى الەكسەي ۆولوشين مەن ماقسات ايازباەۆ سىيلادى. وسى كۇندەرى قاراعاندىدا تاڭەرتەڭ +4س, قاتتى جەل سوعىپ, جاڭبىر جاۋسا دا وتانداستارىمىز نامىستى قولدان بەرمەدى.  اۋا رايىنىڭ قولايسىزدىعىنا قاراماستان 45 كم قاشىقتىققا, ودان كەيىن 30 كم قاشىقتىققا ارنالعان سىندا دميتري گرۋزدەۆ (ەرلەر) پەن ۆيكتور وكيشەۆ (اندەر) مارەگە ءبىرىنشى كەلدى. ودان كەيىن قازاقستان قۇراماسى ءبىر كۇندە ءبىر قاشىقتىقتا وتكەن جارىستا جۇلدەلى ورىنداردىڭ ءبارىن الدى. 125 كم ارنالعان سىندا گريگوري شتەين التىن مەدالدى, ەۆگەني گيديچ كۇمىس, الەكسەي ۆولوشين قولا جۇلدەنى يەلەندى. چەمپيوناتتىڭ سوڭعى كۇن­دەرى قازاقستان قۇراما­­­سىنىڭ جاسوسپىرىمدەرى دە اعالارىنان قالىس قالمادى. قىزدار اراسىندا 75 كم قاشىقتىققا ار­نالعان باسەكەدە نادەجدا گەنەلەۆا توپ جارسا, 23 جاس­قا دەيىنگى جاسوسپىرىمدەر ارا­سىنداعى 172,7 كم توپتىق جارىستا ۆاديم گالەەۆ مارە سىزىعىن ءبىرىنشى بولىپ كەستى. ولەگ زەملياكوۆ ەكىنشى, ماقسات ايازباەۆ ءۇشىنشى ورىن الدى. تاعى ءبىر سپورتشىمىز باقتيار قوجاتاەۆ مارەگە بەسىنشى بولىپ جەتتى. ايەلدەر 125,6 كم توپتىق جارىستا التىن جۇلدەگە قول جەتكىزە المادى. بۇل بايگەدە قىتايلىق تايپەي سپورتشىسى مەي يۋ حسياو ءبىرىنشى ورىندى, كۇمىس  مەدالدى قىتايلىق سيانگاننىڭ وكىلى  حسياو يۋان دياو, قولا جۇلدەنى كورەيالىق سانگۋن گۋ يەمدەندى. داستان كەنجالين, «ەگەمەن قازاقستان».