سۋرەتتى تۇسىرگەن ەرلان ومار, «EQ»
ءىس-شارالارعا اسكەري بولىمدەردىڭ جەكە قۇرامى, جەرگىلىكتى اتقارۋشى ورگاندار, قوعام وكىلدەرى, قارۋلى كۇشتەر مەن جەرگىلىكتى قاقتىعىستارعا قاتىسقان ارداگەرلەر, جاس ساربازداردىڭ تۋىستارى مەن جاقىندارى قاتىستى.
«وڭتۇستىك» وڭىرلىك قولباسشىلىعىندا 1600-دەن اسا سارباز انت بەردى. تارازدا سالتاناتتى ءىس-شارا «جەڭىس» قالالىق ساياباعىندا ءوتتى. اسكەر قولباسشىسى, گەنەرال-مايور مەرەكە كۇشەكباەۆ ساربازداردى وسىنداي ەلەۋلى كۇنمەن قۇتتىقتادى.
– باۋىرجان مومىش ۇلى اتىنداعى مەحانيكالاندىرىلعان قۇرامانىڭ جاۋىنگەرلەرى جەڭىس ساياباعىندا, باتىر ەسكەرتكىشىنىڭ جانىندا وتانىنا ادال بولۋعا انت بەرۋى جاۋىنگەرلىك ءداستۇردىڭ جالعاسىپ كەلە جاتقانىن بىلدىرسە كەرەك. وتان الدىنداعى قىزمەتتەرىڭدى ابىرويمەن اتقاراسىڭدار دەپ سەنەمىن, – دەدى گەنەرال-مايور مەرەكە كۇشەكباەۆ.
اقتاۋدىڭ اسكەري-تەڭىز بازاسىندا دا وسىنداي سالتاناتتى ءىس-شارا تەڭىزشى جاۋىنگەرلەردىڭ ساپقا تۇرۋىمەن باستالدى. پاۆلودار جانە شىعىس قازاقستان وبلىستارىنان شاقىرىلعان ماتروستار ءبىر اي ىشىندە تەڭىزشىلەردىڭ تىرشىلىگىن ۇيرەنىپ, كەمەدەگى قىزمەت نەگىزدەرىمەن جانە تەڭىز تەرمينولوگياسىمەن تانىسىپ ۇلگەردى.
– اسكەرگە پاۆلودار وبلىسىنان كەلدىم. ارينە, ارميانىڭ ءومىر ىرعاعى مۇلدە بولەك, ءبارى كۇن ءتارتىبى جانە ەرەجەلەرگە سايكەس جاسالادى. اسكەري-تەڭىز كۇشتەرىنە كەلگەنىمە قۋاندىم. تەڭىزشى بولۋ – جاۋاپكەرشىلىگى مول جانە قىزىقتى. مۇنداعى ەرەكشە داستۇرلەردى كومانديرلەر دە تانىستىرىپ جاتىر, – دەدى ماتروس اياز ماسىقباەۆ.
كوپتەگەن ساربازدىڭ اتا-انالارى مەن جاقىندارى سالتاناتتى انت قابىلداۋ راسىمىنە قاتىسۋعا كەلدى. كەشە عانا بوزبالا بوپ كەلگەن بالالارىنىڭ كەلبەتىنەن ەسەيگەنىن بايقادىق دەپ ايتىپ جاتتى.
– بۇگىن ۇلدارىمىز ءۇشىن ماڭىزدى كۇن – انت بەرۋ ءساتىن كوردىك. بۇل, اسىرەسە, دەسانت جاۋىنگەرلەر ءۇشىن ۇلكەن جاۋاپكەرشىلىك پەن ابىروي. اسكەردەگى بورىشىڭدى وتەۋ ەر ازاماتتار ءۇشىن وزىنە دەگەن سەنىمدىلىككە تاربيەلەيتىن تاماشا ءومىر مەكتەبى بولارى انىق, – دەدى پاۆلوداردان ەلورداداعى دەسانتتىق-شابۋىلداۋ قۇراماسىنا شاقىرىلعان ابزال ساماتتىڭ اناسى گۇلجانات حاميتوۆا.
كومانديرلەر ءىس-شاراعا كەلگەن قوناقتاردى ساربازدار قىزمەت ەتەتىن جاعدايمەن تانىستىرىپ, ولاردىڭ اسكەري قىزمەت توڭىرەگىندەگى سۇراقتارىنا جاۋاپ بەردى.
جالپى دايىندىق كۋرسىنان كەيىن اسكەري قىزمەتشىلەر ءتۇرلى ماماندىقتاردى ۇيرەنە باستايدى. ولارعا شتاتتىق قارۋ-جاراق پەن اسكەري تەحنيكا بەكىتىلەدى.
