الماتى وبلىسى ەڭبەكشىقازاق اۋدانىنىڭ ەسىك قالاسىندا جىلىنا 120 توننا فورەل وسىرەتىن جاڭا بالىق شارۋاشىلىعى اشىلدى. بۇگىندە باسسەيندەرگە 100 مىڭ فورەل شاباعى جىبەرىلدى.
شارۋاشىلىق باسشىسى مارلەن ءتۇرسىنالىنىڭ ايتۋىنشا, جوباعا جۇمسالعان قارجىنىڭ كوپ بولىگىن مەملەكەت قايتارادى. جالپى, جوبانى ىسكە اسىرۋ ءۇشىن 80 ملن تەڭگەگە جۋىق جەكە ينۆەستيتسيا سالىنعان. دايىن ءونىم 2023 جىلدىڭ ەكىنشى توقسانىندا ساتىلىمعا شىعادى دەپ كۇتىلۋدە.
«كوپتەن كۇتكەن العاشقى شارۋاشىلىعىمىزدى اشىپ جاتىرمىز. مۇنداي شارۋاشىلىقتى ەلىمىزدىڭ ءار بۇرىشىنان اشۋعا بولادى. سەبەبى ەلىمىزدىڭ ءار وڭىرىندە بولۋى كەرەك. قازىر مەملەكەتتىك باعدارلاما ءجۇرىپ جاتىر. وسى شارۋاشىلىققا جۇمسالعان شىعىننىڭ 25 پايىزى ينۆەستيتسيالىق سۋبسيديا ارقىلى قايتارىلادى. باسقا شىعىنداردىڭ دا كوپ بولىگىن مەملەكەت وتەپ بەرەدى», دەدى كاسىپكەر.
سونىمەن قاتار مارلەن ەكى جىل بۇرىپ «بالىق مەكتەبى» جوباسىن باستاپ, كاسىپكەرلەر جانە بالىق وسىرۋمەن اينالىسقىسى كەلەتىندەرگە شارۋاشىلىقتى ۇيرەتۋدى قولعا العان بولاتىن. وسى ۋاقىتقا دەيىن 205 ادام ءبىلىم العان. مەكتەپ بىتىرگەن 30 تۇلەك الماتى, اقتوبە, شىعىس قازاقستان, تۇركىستان, جامبىل جانە جەتىسۋ وبلىستارىندا وزدەرىنىڭ بالىق ءوسىرۋ شارۋاشىلىعىن اشقان.
«وسىنداي شارۋاشىلىقتى اشقىسى كەلەتىن ازاماتتارعا «بالىق مەكتەبى» جوباسى بار. كاسىپكە كەتەتىن شىعىن, ونى قالاي جۇرگىزۋ كەرەك, مەملەكەتتەن قانداي كومەك بار جانە ونى الۋ ءۇشىن قانداي قۇجاتتار كەرەگىن وسى جوبانىڭ اياسىندا ءتۇسىندىرىپ بەرەمىز», دەدى م.ءتۇرسىنالى.
سونداي-اق «اتامەكەن» ۇلتتىق كاسىپكەرلەر پالاتاسىنىڭ اوك دەپارتامەنتىنىڭ ديرەكتورى ەربول ەسەنەەۆ قازاقستانداعى بالىق شارۋاشىلىعىنىڭ جاعدايىن باياندادى. ونىڭ ايتۋىنشا, سىرتتان 40 مىڭ توننا بالىق كەلەدى. بۇل وزىمىزدە وندىرىلەتىن مولشەرگە جۋىقتايدى جانە ونى ەلىمىزدە وندىرۋگە مۇمكىندىك زور.
«قازاقستاندا ورتاشا ەسەپپەن 50-55 مىڭ توننا بالىق وندىرىلەدى, بۇل وتە از. سالقىنداتىلعان جانە مۇزداتىلعان بالىقتىڭ يمپورتى 40 مىڭ توننانى قۇرايدى, ونىڭ سوماسى – 110 ملن دوللار. مۇنشا بالىقتى ەلىمىزدە دە وندىرە الامىز جانە ءوندىرۋىمىز كەرەك. ويتكەنى الەۋەتىمىز جوعارى. ماسەلەن, تاۋارلى بالىق پەن بالىق ءوسىرۋ بويىنشا سۋ ايدىندارىنىڭ جالپى اۋدانى – 125,8 مىڭ گا. بۇكىل ليحتەنشتەين مەملەكەتىنىڭ اۋماعىمەن سالىستىرۋعا بولادى. سول سەبەپتى ۇلتتىق كاسىپكەرلەر پالاتاسى مۇنداي جوبالاردى ءاردايىم قولدايدى», دەدى ە.ەسەنەەۆ.
ەسكە سالا كەتەلىك, بالىق شارۋاشىلىعىن دامىتۋدىڭ 2021-2030 جىلدارعا ارنالعان باعدارلاماسىنىڭ ينديكاتورلارى مەملەكەتتىك قولداۋ شارالارىنا عانا ەمەس, سونداي-اق وسىنداي كاسىپكەرلەردىڭ بەلسەندى قىزمەتىنە باعىتتالعان.
