ايماقتار • 26 قاراشا، 2022

كارديولوگيا ينستيتۋتىندا العاش رەت جۇرەكتىڭ جاساندى قارىنشاسى سالىندى

الماتىدا العاش رەت كارديولوگيا جانە ىشكى اۋرۋلار عزي-دا 60 جاستاعى پاتسيەنتكە جۇرەكتىڭ جاساندى سول جاق قارىنشاسى (LVAD) يمپلانتاتسيالاندى. بۇعان دەيىن جۇرەكتى مەحانيكالىق قولداۋ باعدارلاماسى استانا قالاسىنداعى ۇلتتىق كارديوحيرۋرگيا عىلىمي ورتالىعىندا ەنگىزىلگەن بولاتىن، دەپ حابارلايدى Egemen.kz.

ايناش ەسالى

بۇگىنگى تاڭدا جەر بەتىندە 26 ميلليون ادام جۇرەك فۋنكتسياسىنىڭ جەتكىلىكسىزدىگىنەن زارداپ شەگەدى، بۇل كەسەل پاتسيەنتتەردىڭ 20%-دا ءورشيدى. جىل سايىن وسى دەرتتىڭ سالدارىنا بايلانىستى 1 ملن ادام اۋرۋحاناعا جاتقىزىلادى.

جۇرەك فۋنكتسياسىنىڭ جەتكىلىكسىزدىگى – جۇرەك بۇلشىقەتى اعزانىڭ قان مەن وتتەگىگە قاجەتتىلىگىن قاناعاتتاندىرۋ ءۇشىن جەتكىلىكتى مولشەردە قان ايداي المايتىن سوزىلمالى پروگرەسسيۆتى احۋال. ناۋقاستى ەنتىگۋ، كەۋدەنىڭ قىسىلۋى، اياقتىڭ ءىسىنۋى، بۇيرەگى مازالايدى. اسقىنا كەلە مۇنىڭ سوڭى اجال قۇشتىرۋى مۇمكىن.

سوزىلمالى جۇرەك فۋنكتسياسىنىڭ جەتكىلىكسىزدىگى قاتەرلى ىسىكتەن كەيىنگى ءولىم-جىتىمگە جەتەلەيتىن اۋرۋدىڭ ءبىرى. ال LVAD يمپلانتاتسياسى اۋىر سجج دياگنوزى قويىلعان ناۋقاستاردى ەمدەۋدىڭ جاڭا ءداۋىرى دەسەك تە بولادى.

«يمپلانتاتسيالاناتىن جۇرەك سورعىسى جۇرەككە قاندى بۇكىل اعزامەن ايداۋعا كومەكتەسەدى جانە سجج بەلگىلەرىن جەڭىلدەتەدى. جۇرەكتىڭ قىزمەتى دە جاقسارىپ، ناۋقاسقا جۇرەك ترانسپلانتاتسياسىن كۇتۋگە مۇمكىندىك بەرەدى. كەيبىر ناۋقاستار ءۇشىن بۇل ءومىردى ۇزارتۋدىڭ جالعىز مۇمكىندىگى»، دەيدى كارديولوگيا جانە ىشكى اۋرۋلار عزي باسقارما توراعاسى، پروفەسسور روزا قۋانىشبەكوۆا.

كلينيكا باسشىسىنىڭ ايتۋىنشا، ەكى تۇتىگى بار، بىرەۋى قولقاعا، ەكىنشىسى جۇرەكتىڭ سول جاق قارىنشاسىنا قوسىلعان شاعىن سورعى سول جاق قارىنشانىڭ قىزمەتىن اتقارادى. LVAD ءومىردى ۇزارتۋعا، بۇرىنعى قالپىنا ورالۋعا مۇمكىندىك بەرەدى. جاساندى جۇرەگى بار ناۋقاستىڭ باسقا ادامداردان ايىرماشىلىعى – ونىڭ تامىر سوعىسى بولمايدى.

«بۇل وپەراتسيانى كلينيكامىزدىڭ كارديوحيرۋرگتارى استاناداعى ۇلتتىق كارديوحيرۋرگيالىق عىلىمي ورتالىقتاعى ارىپتەستەرىمەن بىرگە جاسادى. ءبىز جۇرەككە جوعارى تەحنولوگيالىق وپەراتسيالاردىڭ بارلىق تۇرلەرىن جاسايمىز. كەلەشەكتە جۇرەك پاتولوگياسىن ەمدەۋدىڭ جاڭا زاماناۋي ادىستەرىن ۇلعايتۋدى جانە ودان ءارى ەنگىزۋدى جوسپارلاپ وتىرمىز»، دەيدى روزا توحتاناليقىزى.

«كومەكشى مەحانيكالىق قۇرىلعىنى يمپلانتاتسيالاۋعا كورسەتكىشتەر – بۇل شۋنتتاۋ، كلاپانداردى پروتەزدەۋ، كارديوستيمۋلياتوردى يمپلانتاتسيالاۋ نەمەسە ءدارى - دارمەكپەن ەمدەۋ سياقتى باسقا ەمدەۋ تۇرلەرى كومەكتەسە المايتىن جۇرەك اۋرۋىنىڭ اۋىر نەمەسە تەرمينالدىق ساتىسىنداعى پاتسيەنتتەر»، دەدى عزي كارديوحيرۋرگيا بولىمشەسىنىڭ مەڭگەرۋشىسى رۇستەم تولەۋتاەۆ.