اتقارىلعان جۇمىستار سارالاندى

كەشە ەلىمىزدىڭ مەملەكەتتىك حاتشىسى – سىرتقى ىستەر ءمينيسترى قانات ساۋداباەۆتىڭ توراعالىق ەتۋىمەن پرەزيدەنت جانىنداعى سىبايلاس جەمقورلىققا قارسى كۇرەس ماسەلەلەرى جونىندەگى كوميسسيانىڭ كەزەكتى ءماجىلىسى بولىپ ءوتتى. وندا مەملەكەتتىك ورگانداردىڭ حالىقتىڭ كوشى-قون سالاسىندا سىبايلاس جەمقورلىققا قارسى ءىس-قيمىلى, سونداي-اق سولتۇستىك قازاقستان جانە باتىس قازاقستان وبلىستارى اكىمدىكتەرىنىڭ سىبايلاس جەمقورلىققا قارسى مەملەكەتتىك جانە وڭىرلىك باعدارلامالارىن ىسكە اسىرۋ بويىنشا قابىلداپ جاتقان شارالارى كۇن ءتارتىبىنىڭ نەگىزگى ماسەلەلەرى رەتىندە تالقىعا سالىندى. قانات ساۋداباەۆ تاۋەلسىزدىك العان كۇننەن باستاپ كوشى-قون ۇدەرىستەرىن رەتتەۋ ماسەلەلەرى قازاقستان  ساياساتىنىڭ جانە ەلباسىنىڭ ماڭىزدى ءارى جاۋاپتى باعىتتارى بولىپ كەلە جاتقاندىعىن ايتىپ ءوتتى. ودان ءارى ول رەسپۋبليكامىزدىڭ ءتيىمدى گەوساياسي ورنالاسۋى, تمد ەلدەرىمەن شەكارانىڭ اشىقتىعى, قولايلى ەكونوميكالىق جاعداي, الەۋمەتتىك-ساياسي تۇراقتىلىق, ليبەرالدى حالىق­ارا­لىق كوشى-قون ساياساتى قازاق­ستان­داعى شەتەلدىك ازاماتتاردىڭ ەڭبەك قىزمەتىنە, ونىڭ ىشىندە زاڭسىز كوشى-قون اۋقىمىنىڭ وسۋىنە مۇمكىندىك تۋعىزاتىن نەگىزگى فاكتورلار بولىپ تابىلاتىنىن جەتكىزدى. الايدا, توراعالىق ەتۋشى وسىن­داي يگىلىكتى ىستەر جاساپ جاتسا دا, شەتەلدىك جۇمىس كۇشىن پايدالانۋدا ءتيىستى ءتارتىپتىڭ جوقتىعى, زاڭنا­مالىق بازانىڭ جەتىلمەۋى, نەگىزگى كوشى-قون ۇردىستەرىنىڭ بيۋروكرات­تىعى سىبايلاس جەمقورلىقتىڭ حالىقتىڭ كوشى-قون سالاسىنداعى مەملەكەتتىك ورگانداردى باقىلاي­تىن قىزمەتكەرلەردىڭ ارا­سىندا وسۋىنە دە مۇمكىندىك تۋعىزىپ وتىر­عاندىعىن جاسىرمادى. وسى ماسەلەگە بايلانىستى تيىسىنشە ەڭبەك جانە حالىقتى الەۋمەتتىك قورعاۋ ءمينيسترى گۇلشارا ابدىقالىقوۆا مەن ىشكى ىستەر ءمينيسترى سەرىك بايماعانبەتوۆ بايانداما جاسادى. بۇعان قوسا, سونداي-اق, سولتۇستىك قازاقستان وبلىسىنىڭ اكىمى سەرىك ءبىلالوۆ پەن باتىس قازاقستان وبلى­سىنىڭ اكىمى باقتىعوجا ءىزمۇحام­بەتوۆتىڭ سىبايلاس جەمقورلىققا قارسى 2006-2010 جىلدارعا ارنالعان مەملەكەتتىك جانە وڭىرلىك باعدارلا­ما­لار­دى ىسكە اسىرۋ  جانە ەلباسىنىڭ ءتيىستى تاپسىرمالارىن ورىنداۋ ءجونىن­دەگى جۇمىستارى تۋرالى ەسەپتەرى تىڭدالدى. وتىرىس قورى­تىن­دىسى بويىنشا كوميسسيا تاراپىنان ءتيىستى مەملەكەتتىك ورگاندارعا قوشى-قون باقىلاۋى سالاسىندا جەمقور­لىققا قارسى 2006-2010 جىلدارعا ارنالعان مەملەكەتتىك جانە وڭىرلىك باعدارلاما­لاردى ىسكە اسىرۋ جوس­پارلارىن جانە مەملەكەت باس­شىسىنىڭ سىبايلاس جەمقورلىققا قارسى كۇرەستى كۇشەيتۋ جونىندەگى تاپسىرمالارىن ورىنداۋ بويىنشا تولىق شارالار قابىلداۋعا ۇسىنىم جاسالدى. الەكساندر تاسبولاتوۆ.