اقتاۋدا ازەربايجان, قازاقستان جانە تۇركيا سىرتقى ىستەر جانە كولىك مينيسترلەرىنىڭ ەكىنشى ۇشجاقتى كەزدەسۋى ءوتىپ جاتىر. كەزدەسۋگە ازەربايجان سىرتقى ىستەر ءمينيسترى دجەيحۋن بايراموۆ, تۇركيا سىرتقى ىستەر ءمينيسترى مەۆلۇت چاۆۋشوعلۋ, قازاقستاننىڭ سىرتقى ىستەر ءمينيسترى مۇحتار تىلەۋبەردى, سونداي-اق گرۋزيا دەلەگاتسياسى دا قاتىسۋدا.
يندۋستريا جانە ينفراقۇرىلىمدىق دامۋ ءمينيسترى قايىربەك وسكەنباەۆ ترانسكاسپي حالىقارالىق كولىك باعىتى ارقىلى جۇكتەردى تاسىمالداۋدىڭ بىرنەشە ەسە وسكەنىن اتاپ ءوتىپ, اتالعان حالىقارالىق مارشرۋتتىڭ وتكىزۋ قابىلەتىن كەڭەيتۋ ءۇشىن قازاقستان تاراپىنان قابىلدانعان شارالار تۋرالى باياندادى.
27 ماۋسىمدا باكۋدە مينيسترلەردىڭ ءبىرىنشى وتىرىسى ءوتىپ, ونىڭ بارىسىندا باكۋ دەكلاراتسياسى قابىلداندى. قۇجات كولىك جانە كوممۋنيكاتسيا سالاسىنداعى ىنتىماقتاستىقتى كوزدەيدى. اقتاۋداعى تالقىلاۋلاردىڭ نەگىزگى تاقىرىپتارى ۇشجاقتى جانە ايماقتىق ىنتىماقتاستىقتى كەڭەيتۋ جانە كاسپي تەڭىزى ارقىلى وتەتىن شىعىس-باتىس ورتا ءدالىزىنىڭ الەۋەتىن دامىتۋ بولادى دەپ بولجانۋدا.
