19 جاستاعى جىگىت تەمىرلان تاس جولى مەن مانگەلدين كوشەسىنىڭ قيىلىسىندا ورنالاسقان كوپىردەن سەكىرۋگە وقتالعان.
بايلانىس قۇرالدارى ارقىلى شۇعىل اقپارات العان 6506 اسكەري ءبولىمىنىڭ جاساقتار بويىنشا كەزەكشىسى اعا لەيتەنانت سەرجان ساعىنبەك بىردەن شارا قولدانادى. ول دەرەۋ قاراماعىنداعى جاۋىنگەرلەر ەفرەيتور نۇرداۋلەت ورازباەۆ جانە قاتارداعى ۆيتالي كوچەتكوۆپەن بىرلەسىپ, حابارلامادا كورسەتىلگەن مەكەنجايعا جىلدام كەلىپ جەتەدى.
– اقپاراتتا ايتىلعان جەرگە كەلسەك, راسىمەن دە جاس جىگىت كوپىردەن ءوزىن-ءوزى تاستاۋعا دايىن تۇر ەكەن. بىردەن وعان بەت الىپ, رايىنان قايتارۋعا تىرىستىق. ول ء«ومىر سۇرگىم كەلمەيدى», «ولگىم كەلەدى» دەپ ايقايلاپ جاتتى. ەپتەپ كوپىر قورشاۋىنىڭ بەرگى جاعىنا وتكىزدىك, – دەيدى اعا لەيتەنانت سەرجان ساعىنبەك.
جەدەل ءارى كاسىبي تۇردە ارەكەت ەتكەن اسكەري قىزمەتشىلەر جاس جىگىتپەن جاقىنىراق سويلەسىپ, بۇل نيەتىنىڭ دۇرىس ەمەستىگىن ءتۇسىندىردى. سول ماڭداعى وتكىنشىلەر دە جىگىتتى بۇل ارەكەتىنەن باس تارتۋعا شاقىردى. ەكى ويلى تۇرعان ازامات ءسال تىنىشتالعاندا, ۇلاندىقتار مەن جولاۋشىلار ونى ۇزاقتاۋ جەرگە الىپ كەتتى. تىنىشتاندىرىپ, وقيعا ورنىنا كەلگەن قۇقىق قورعاۋ قىزمەتكەرلەرىنە تاپسىردى. 2003 جىلى تۋعان بۇل ازاماتتان ءىستىڭ ءمان-جايىن انىقتاۋ ماقساتىندا ءتارتىپ ساقشىلارى ونى اباي اۋدانىنىڭ پوليتسيا باسقارماسىنا اكەتتى. قۇقىقتىق ءتارتىپ اسكەرلەرىنىڭ ۇيلەسىمدى ءىس-قيمىلدارىنىڭ ارقاسىندا ادام ءومىرى قۇتقارىلدى.
