قارجى نارىعىن رەتتەۋ جانە دامىتۋ اگەنتتىگىنىڭ حابارلاۋىنشا, وسى باعدارلاما ارقىلى كەز كەلگەن اتا-انا قازاقستاندا نەمەسە شەتەلدە كاسىپتىك جانە جوعارى وقۋ ورىندارىنىڭ اقىسىن تولەۋگە جەتكىلىكتى اقشا جيناي الادى. قازىر مبجج باعدارلاماسىنا 4 ەكىنشى دەڭگەيلى بانك قاتىسىپ جاتىر. ولاردا 33,5 ملرد تەڭگە قارجىسى بار 22 مىڭنان استام ءبىلىم بەرۋ دەپوزيتتەرى اشىلعان.
مۇنداي ينۆەستيتسيالىق ءونىمدى بانكتەرمەن قاتار ساقتاندىرۋ ۇيىمدارى دا ۇسىنادى. مجبب شەڭبەرىندە ءبىلىم بەرۋ جيناقتاۋشى ءومىردى ساقتاندىرۋ شارتىنا قول قويۋ ارقىلى اتا-انالار ساقتاندىرۋ ۇيىمى ەسەپتەگەن ينۆەستيتسيالىق كىرىستەن باسقا جىلىنا 5 پايىز مەملەكەت سىيلىقاقىسىن الا وتىرىپ, بالالارىنىڭ وقۋى ءۇشىن جيناقتاۋعا مۇمكىندىك الادى (حالىقتىڭ باسىم ساناتىنا, مىسالى, جەتىمدەرگە, مۇگەدەكتەرگە, كوپبالالى وتباسى بالالارىنا – جىلىنا 7 پايىز).
بۇل ساقتاندىرۋ ءونىمىنىڭ بىرنەشە ارتىقشىلىعى بار. بىرىنشىدەن, دەپوزيتتەن ايىرماشىلىعى (8 پايىزدان 10 پايىزعا دەيىن) ساقتاندىرۋ شارتىنىڭ بارلىق مەرزىمىندە كىرىستىلىك مولشەرلەمەسىنە كەپىلدىك بەرىلەدى. ەكىنشىدەن, ساقتاندىرۋ تولەمىنە كەپىلدىك بەرۋ قورى بارلىق جينالعان سومانى تولىعىمەن جابادى. ال قازاقستان دەپوزيتتەرگە كەپىلدىك بەرۋ قورى تەك 20 ملن تەڭگەگە دەيىنگى سومالاردى تولەپ بەرەدى. ۇشىنشىدەن, اتا-اناسى ەڭبەك قابىلەتىنەن ايىرىلعان نەمەسە قايتىس بولعان جاعدايدا جيناقتالعان سوما مولشەرىنە قاراماستان وقۋ قۇنى تولىعىمەن تولەنەدى.
ءبىلىم بەرۋ جيناقتاۋ ساقتاندىرۋ ءونىمىن ەنگىزۋ كوپتەگەن اتا-انانىڭ ءوز بالاسىنىڭ وقۋى ءۇشىن قارجى جيناۋىنا مۇمكىندىك بەرەدى. بۇل – مەملەكەت تاراپىنان سۋبسيديالاناتىن العاشقى ساقتاندىرۋ ءونىمى.
ەسكە سالايىق, 2022 جىلدىڭ 12 قىركۇيەگىندە ساقتاندىرۋ ۇيىمدارىنىڭ مبجج باعدارلاماسىنا قاتىسۋىنا مۇمكىندىك بەرەتىن وزگەرىستەر جاسالدى.
