ساحناداعى وزبەكستاننىڭ حالىق ءارتىسى مۋناجات يۋلچيەۆا ەكەن. ءاننىڭ اتى – «مۋستاحزود». تۇلا بويدى تولىق شارلاپ, تەڭىزدىڭ اق كوبىك تولقىنىنداي ءبىر سوعىپ وتكەن جانىمىزدى كەيىنگى قىزىلدى-جاسىلدى كويلەك, مىڭ بۇرالعان بي جىلىتتى. سۇيەمەلدەپ وينالعان ءار اسپاپتىڭ ءۇنى ساحناداعى ءار قيمىلمەن ۇندەسىپ, بىرگە بيلەپ جاتقانداي.
وزبەكتىڭ ونەرىمەن ساعىنىسا كورىسىپ, تاڭعالا تامسانۋىمىزعا وزبەك مادەنيەتى كۇندەرى سەبەپشى بولىپ وتىر. قاليبەك قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترىندا وتكەن گالا-كونتسەرتتە وزبەكستان رەسپۋبليكاسىنىڭ جەتەكشى سوليستەرى مەن شىعارماشىلىق ۇجىمدارى ونەر كورسەتتى. سالتاناتتى كەشكە وزبەكستان رەسپۋبليكاسى مادەنيەت ءمينيسترىنىڭ ءبىرىنشى ورىنباسارى باحادىر احمەدوۆ, قازاقستان رەسپۋبليكاسى مادەنيەت جانە سپورت ءمينيسترى داۋرەن اباەۆ قاتىستى.
«وزدەرىڭىزگە بەلگىلى, ەكى ەل اراسىنداعى تاريحي-مادەني بايلانىس ەجەلدەن ۇلكەن سيپاتقا يە. ونەرىمىز بىرگە ورىستەپ, ءداستۇرىمىز قاتار قانات جايىپ كەلەدى. وزبەك پەن قازاق – تامىرى ءبىر, تاريحى ورتاق تۋىس حالىقتار. ءبىزدى ءابۋ ناسىر ءال-فارابي, احمەت ياساۋي, الىشەر ناۋاي, اباي سياقتى ادامزاتقا ورتاق الىپتار شوعىرى بىرىكتىرەدى. ءبىز – ءبىر-بىرىمىزگە ءان-جىرىمىزبەن دە, تاعدىرىمىزبەن دە جاقىن باۋىرلارمىز. بۇگىن سىزدەر بىزگە ارنايى الىپ كەلگەن مازمۇنى تەرەڭ, ماعىناسى باي باعدارلامالار كوشى سول يگى ساباقتاستىقتى جالعاستىرىپ وتىر», دەدى داۋرەن اباەۆ.
سونداي-اق ول قوس تاراپ الداعى ۋاقىتتا دا مادەني الماسۋدان بولەك, بىرلەسكەن ورتاق جوبالاردى جۇزەگە اسىرۋ قاجەت ەكەنىن اتاپ ءوتتى.
ء«بىز بۇرىننان تاتۋلىقتى تابىسقا, بىرلىكتى بەرەكەگە اينالدىرىپ كەلە جاتقان اعايىنداس حالىقتارمىز. وعان قازاقتىڭ قابىرعالى ءۇش ءبيىنىڭ ەكەۋ – تولە بي مەن ايتەكە ءبيدىڭ وزبەك توپىراعىندا جاتۋىنىڭ ءوزى دالەل. سول تۋىستىق تۋى قاشاندا بيىك جەلبىرەپ, كورشىلەس ەكى ەلدىڭ كوشى دە, كولىگى دە الدا بولا بەرسىن دەگىم كەلەدى. وزبەك اعايىندارشا ايتساق: «ۋزوقداعي قاردوشتان ياقينداگي قўشني ياحشي». ياعني «الىستاعى اعايىننان جاقىنداعى كورشىڭ ارتىق». ءبىزدى ەكى مىڭ شاقىرىمنان استام شەكارا عانا ەمەس, ەكى مىڭجىلدىق تاريح بىرىكتىرەدى», دەدى مينيستر.
وزبەك تاراپى دا مادەنيەت جانە سپورت مينيسترلىگىنە ءىس-شارالاردى ۇيىمداستىرۋعا قولداۋ بىلدىرگەنى ءۇشىن العىس ايتتى.
«وزبەك پەن قازاق حالىقتارىنىڭ ءوزارا سىيلاستىق, دوستىق, تۋىسقاندىق قارىم-قاتىناسى ەرتەدەن جالعاسىپ كەلەدى. مەملەكەتتەر باسشىلارى جۇرگىزىپ وتىرعان سارابدال ساياساتتىڭ ناتيجەسىندە بارلىق سالاداعىداي مادەنيەت پەن ونەردە دە ىنتىماقتاستىقتىڭ جاڭا مۇمكىندىكتەرى اشىلىپ, ۇلتتىق ونەردى ناسيحاتتاۋدا جاڭا بەلەستەرگە اتتادىق. ايتا كەتەرلىگى, ەكى ەل اراسىندا ءوزارا مادەنيەت كۇندەرىن وتكىزۋ داستۇرگە اينالدى. بۇل – ءبىزدىڭ بەرىك مادەني-رۋحاني قارىم-قاتىناسىمىزدىڭ دالەلى. ەڭ باستىسى, مادەنيەتتەر اراسىنداعى بايلانىستى ءۇزىپ الماۋىمىز كەرەك», دەدى وزبەكستان رەسپۋبليكاسى مادەنيەت ءمينيسترىنىڭ ءبىرىنشى ورىنباسارى باحادىر احمەدوۆ.
گالا-كونتسەرتتە حالىق ارتىستەرى مۋنوجات يۋلچيەۆا, جەڭىسبەك پيازوۆ, مانسۇر تاشماتوۆ, ماحمۇد نامازوۆ, ودان بولەك مەملەكەتتىك سىيلىقتاردىڭ لاۋرەاتتارى ۋمۋد يسرايلوۆ, شيرين ماماتوۆا, بوبۋر كەنجاەۆ, باسقا دا انشىلەر مەن «ناۋرىز» بي ءانسامبلى ونەر كورسەتتى. مەرەكەلىك كەشتى يۋنۋس رادجابي اتىنداعى «ماكوم» ءانسامبلى سان ءتۇرلى اسپاپپەن سۇيەمەلدەدى. سازدى كەشتەن بولەك تەاتر فويەسىندە وزبەكستاننىڭ ۇلتتىق قولونەر جانە بەينەلەۋ ونەرى ۇلگىلەرىنىڭ كومپوزيتسيالىق كورمەسى قويىلدى. وزبەكتىڭ ۇلتتىق كيىمدەرى مەن قولدان جاسالعان بۇيىمدارى ساتىلدى.
ايتا كەتەيىك, ەكى كۇنگە جالعاسقان وزبەك مادەنيەتى كۇندەرىنىڭ ساياسي ماڭىزى ۇلكەن. قازاقستان مەن وزبەكستان اراسىنداعى ديپلوماتيالىق قاتىناستاردىڭ ورناعانىنا 30 جىل تولۋىنا وراي ۇيىمداستىرىلعان مەرەكەلىك ءىس-شارالار اياسىندا دوڭگەلەك ۇستەلدەر, كورمەلەر مەن شەبەرلىك ساباقتارى وتكىزىلدى. سونداي-اق ەكى ەلدىڭ ناشار كورەتىن ازاماتتارعا ارنالعان ارنايى كىتاپحانا وكىلدەرى «ىنتىماق, بىرلىك, كەلىسىم – ەڭ اسىل بايلىق ەل ءۇشىن» اتتى ءىس-شارادا باس قوستى. وزبەك مادەنيەتىنىڭ العاشقى كۇنىندە ەكى ەلدىڭ ارنايى كىتاپحانالارىنىڭ بىرلەسىپ جاساعان تۇڭعىش جوباسى شوكير حوليكوۆتىڭ «شاي» قىسقامەتراجدى ءفيلمىنىڭ كورسەتىلىمى ءوتتى. كانن فەستيۆالىندە باس جۇلدەگە يە بولعان مۇمكىندىگى شەكتەۋلى جاندار تۋرالى ەرەكشە فورماتتا دىبىسسىز تۇسىرىلگەن كينوتۋىندىنى قازاقستاننىڭ ارنايى كىتاپحاناسىنىڭ ستۋدياسى زاعيپ وقىرماندار ءۇشىن قازاق تىلىنە دىبىستاعان نۇسقاسىن ۇسىندى. ءفيلمدى قازاق تىلىنە دىبىستاعان مامانداردىڭ ءبىرى – استانا قالاسىنىڭ زاعيپ جانە ناشار كورەتىن ازاماتتارعا ارنالعان كىتاپحانا قىزمەتكەرى شاحسانا مومبەكوۆا مەن تانىمال ديكتور قۋات احمەتجان. ال ءفيلمدى دىبىسپەن ارلەپ, قاجەتتى جەرىندە ءسوز ماعىناسىنا قاراي اۋەن قوسقان دىبىس رەجيسسەرى قايسار تۇرماعانبەت.
سونىمەن قاتار ورتالىق بالالار جانە جاسوسپىرىمدەر كىتاپحاناسىندا وتكەن ءىس-شارادا زاعيپ جاندارعا ارنالعان تيفلوقۇرىلعىلار, كىتاپحانا ستۋدياسى ءونىمى بولعان اۋديوكىتاپتار جانە تاعى باسقا قۇرالدار قويىلعان كورمە ۇيىمداستىرىلدى. ءىس-شارادا وزبەكستان كىتاپحاناسىنىڭ وكىلدەرى ەلىمىزدىڭ زاعيپ وقىرماندارىنا ا.بايتۇرسىن ۇلى مەن ى.التىنسارين شىعارمالارىنىڭ بەدەرلى قارىپتە باسىپ شىعارىلعان كىتابىن سىيعا تارتتى.
