قوعام • 24 قاراشا، 2022

جۇقا مۇز – جاسىرىن قاۋىپ

ەرتىس وزەنىنىڭ ساعاسىندا بالىق اۋلاپ جۇرگەن ازامات مۇز استىنا ءتۇسىپ كەتىپ، قازا بولدى. تولىق قاتىپ ۇلگەرمەگەن جۇقا مۇز 60 جاستاعى بالىقشىنىڭ سالماعىن كوتەرە الماعان. توتەنشە جاعداي قىزمەتكەرلەرى قىسقى بالىق اۋلاۋ ماۋسىمىن باستاپ كەتۋ ءالى دە قاۋىپتى ەكەنىن ەسكەرتىپ وتىر.

مۇرات قاپان ۇلى

ەرتىس-بايان وڭىرىندە قاراشا ايىنىڭ ەكىنشى ونكۇندىگىنەن شىڭىلتىر اياز تۇرىپ، اۋا رايى قىتىمىر قىسقا ءتان مىنەز كورسەتكەنى بالىق اۋلاۋعا قۇمار الگى ادامدى تىم اۋەستەندىرىپ جۇرگەن بولۋى كەرەك. ۋسولكا وزەنىنىڭ ۇستىنە قاتقان جۇقا مۇزعا شىعىپ، ويىق جاساي بەرگەندە سۋىق سۋعا كۇمپ بەرگەن. وكىنىشكە قاراي، الپىستى القىمداپ قالعان ارىستاي ازاماتتى قۇتقارۋ مۇمكىن بولمادى. قۇتقارۋشىلار كەلىپ ۇلگەرگەنشە سۋعا تۇنشىعىپ كەتتى. وبلىستىق توتەنشە جاعدايلار دەپارتامەنتىنىڭ ءباسپاسوز قىزمەتى حابارلاعانداي، الگى ازامات جاعادان نەبارى 5-6 مەتر عانا ۇزاعان ەكەن.

– قۇتقارۋشىلار حابار تۇسكەن بەتتە جەتىپ، ەر ادامدى سۋدان الىپ شىققاندا ءبارى كەش بولعان. ەستەن تانىپ، كوپ مولشەردە سۋ جۇتىپ قويعانى سەبەپتى جۇرەگى توقتاعان سىڭايلى. جەدەل جاردەم كولىگى تەز كەلگەنىمەن قۇتقارۋ مۇمكىن بولمادى، – دەلىنگەن دەپارتامەنت حابارلاماسىندا.

توتەنشە جاعداي قىزمەتكەرلەرى بالىق اۋلاۋ كەزىندەگى ورىن الۋى ىقتيمال باقىتسىز جاعدايلاردىڭ باستى سەبەبى – مۇزدا قاۋىپسىزدىك تالاپتارىن ساقتاماۋ، جۇقا مۇزدىڭ ۇستىمەن كولىكپەن جانە جاياۋ ءوتۋ دەيدى. قاراپايىم قاۋىپسىزدىك ەرەجەلەرىن ەسكەرمەۋ قايعىلى وقيعاعا اكەپ سوقتىرادى.

پاۆلودار وبلىسى توتەنشە جاعدايلار دەپارتامەنتى ازاماتتىق قورعانىس باسقارماسىنىڭ اعا وفيتسەرى، كاپيتان قازبەك رىمبەكوۆتىڭ ايتۋىنشا، بيىلعى جىل باسىنان وڭىردە مۇز ۇستىندە بالىق اۋلاپ ءجۇرىپ 3 ادام سۋعا باتىپ كەتكەن.

«قىس مەزگىلى قارساڭىندا بەتىنە مۇز قاتقان سۋ قويماسىنىڭ بەتىنە شىعۋ وتە قاۋىپتى. الايدا كوپتەگەن ادامدار ساقتىق شارالارىن ەلەمەيدى. سۋدىڭ بەتى قاتتى قاتپاسا دا كوپتەگەن ادامدار بالىق اۋلاۋعا شىعىپ جاتادى. ءبىز تۇراقتى رەيدتەر ارقىلى وقىس وقيعالاردىڭ الدىن الۋدى ويلايمىز. بالىقشىلاردىڭ كوپشىلىگى اۋا رايىنا قاراماي، كوزسىز تاۋەكەلگە بەل بۋادى. ال بالالار سۋ بەتىن سىرعاناق الاڭىنا اينالدىرادى. جازاتايىم وقيعالار ورىن الماس ءۇشىن اۋەلى قاتتى ايازدى كۇتكەن ابزال»، دەيدى مامان.

بالىق اۋلاۋ ءۇشىن تۇششى سۋدا قالىڭدىعى كەمىندە 10 سانتيمەتر جانە تۇزدى سۋدا 15 سانتيمەتر مۇز ادام ءۇشىن قاۋىپسىز دەپ سانالادى ەكەن. وزەن ساعالارى مەن وزەندەردە مۇزدىڭ بەرىكتىگى ءالسىز بولادى. مۇز اعىندى سۋلاردا، سونداي-اق سۋ وسىمدىكتەرى وسەتىن اۋماقتاردا، اعاشتارعا، بۇتالار مەن قامىستارعا جاقىن جەرلەردە بەرىك بولمايدى. ەگەر اۋا تەمپەراتۋراسى 0 گرادۋستان جوعارى بولسا، وندا مۇزدىڭ بەرىكتىگى 25%-عا تومەندەيدى. ماماندار مۇزدىڭ بەرىكتىگىن كوزبەن شولىپ انىقتاۋعا بولادى دەيدى. كوك ءتۇستى مۇز بەرىك، اق ءتۇستىنىڭ بەرىكتىگى 2 ەسە از، سۇر، كۇڭگىرت-اق نەمەسە سارعىش رەڭدى بولسا سەنىمسىز دەگەن ءسوز.

پاۆلودار وبلىسى